Levítico 23 - Nivaclé Bible

¹ Pa Lhcaanvacle yiyôjiesha pa Moisês pa yit'esha:

² “Anfacleem japi Israel lhavos navôque: Navôque chinôôclhanitey t'ajuya ti chiyôclôjesh na Lhcaanvacle, navan lhtônshelh'atay jayu ti lhtayshelhvane pa is.

³ “Acumelh'in jayu java ve'lhayama nalhus, vooy ja napu'yama nalhu sasjop jayu pa ca acumelh'e;*xt* jô lhech nalhu t'ajuya ti chit'ichayshi pa asnatshelh jayu pa is ayjayashelhvane. Yiey pava lhôvelh'e jô lhech nalhuesh ti chit'ichayshi ti chiyisclaneshemshi na Lhcaanvacle.

⁴ “Navôque chinôôclhaniteyjop ca asnatajeshelh pa is ayjayashelhvane ca asclaneshelhemshi na Lhcaanvacle, java lhech isjop ca ayshelhvane jayu.

⁵ “Vooy ja nalhu catorce ja vatjutsa' jive'cla ca nuutajeey, pa asnatshelh jayu ja Pascua ca asclaneshelhemshi na Lhcaanvacle.*xu*

⁶ “Ja nalhu quince jô lhech jive'cla pa asnatshelh jayu ja vatc'usiyashesh'in pava yucuvec ameyshi pa yiyalhiyan*xv* ca asclaneshelhemshi na Lhcaanvacle. Pa môôjelhch'e pava napu'yama nalhus ca atujelh jayu lhpa yucuve ameyshi pa yiyalhiyan.

⁷ Ja vatjutsa' nalhu asnatshelh jayu pa is ayjayashelhvane. Pa ya aj pa ca ve'lhaa pa ca acu'melh'e.

⁸ Pa môôjelhch'e java napu'yama nalhus ca napjunelhemsham pava lhatcufaayshelhem na Lhcaanvacle, vooy ja napu'yama nalhu pa asnatshelh jayu pa is ayjayashelhvane. Pa ya aj na jayu pa ca ve'lhaa ca acu'melh'e.”

Pa vatc'usiyashesh pa vatjutsa' vatcavcalhech

⁹ Pa Lhcaanvacle yiyôjiesha pa Moisês pa yit'esha:

¹⁰ “Anfacleem japi Israel lhavos navôque: Meelh ca môtajelhsham ja cotsjaat ti jajutelh'ay jayu, ca nicaajtaj pa acavcalhech'elh trigo, pa isjop jayu ca acha'jelhey pa vatcasinô pa vatjutsa' ti t'ôcfeelhsham ti lhanclaneelhshi.

¹¹ Vooy pa nijooylha nalhu ja nalhu ti chit'ichayshi, vooy pa vatcasinô pa yicha'jey t'ajuyish jayu na Lhcaanvacle ti lhcufayjat'esh, pa jaspa chincumeshjulh.

¹² Pa lhech nalhu ti yicha'jey pava chiyôcfashaam, pa yicha'jey jayu shta pa ve'lha tashinshtaj ve'lha lhnincôp amem pa lhayasha, ti chiylhônsham ti chiyisclaneshemshi na Lhcaanvacle.

¹³ Pa nanchaaj jayu shta pava cuatro kilos y medio pa isshi' climshi chiyot'ateshi pa lhape', ca nanchajey na Lhcaanvacle ti vatcufayjat'esh ti chiylhônsham ti chiyacônch'e pa lhniish. Pan lhjunash ti chiyôtsiyesh pa vatcufayjat'esh, pa isjop jayu ca nichaajjop pa ve'lha litro pa ôtjayetas t'i'.

¹⁴ Pa namjey pa nalhu ca achaajtajelhey pa acufayjatelhem na Lhcaanvacle, pa ya aj cum ca atujelh lhpa yucuve, nilhecha pa chiycôclôôlh trigo ja't'ajesha pava yup'asha'ne. Nôque vatyôjijat ninvôômji, ti tôlhesh'e jayu papi vatanavot pa namja papi lhcles yiey pavan lhôvelh'e ts'ivee.

¹⁵ “Pa nitô'lhesh'e pa nalhu ti lhcha'jelh pava t'ôcfeeelhsham trigo ti lhatcufaayshelh, pa lhech nalhu ti tôlh'e' ti chit'ichayshi, pa isjop ca atsjulheelh pava napu'yama yameyc'oya.

¹⁶ Vooy pa nijooylhach'e nalhu pa napu'yama nalhu ti chit'ichayshi, pa u'elhvatsham jayu lhacôm'a pava cincuenta nalhus. Pa lhecheesh pa anchaje'lhey jayu na Lhcaanvacle pa nich'a lhatcufaayshelh pa trigo,

¹⁷ pa lhcha'jelhey jayu pava ajpôyjeyelh pava napu' yucuvec pa isshi' climshi chiyajotesh pa yiyalhiyan, pa ve'lha ts'ivee pa yichatjulha kilos pat'ajôôj, ti acufayjateseshelhem pava vatjutsa' lhay na Lhcaanvacle.

¹⁸ Pa u'jelha pava yucuvec ti lhcha'jelh jayu pava napu'yama tashinshtas ve'lha lhnincôp amem pa lhayasha, ve'lha pa vôcô lhaôs shi' pava napu' tashinshtas jayanjas, ti chiylhônsham ti chiyisclaneshemshi na Lhcaanvacle, ti chinapjunemsham ti yacônch'e pa lhniish na lhech, shi' shta pava lhatcufaayshelh pava chiycôvjiyan shi' pa ôtjayetas t'i'.

¹⁹ “Pa acufayeshelh jayu shta pa fusuc ti vatcufayjat'eshjop pa sasch'e, shi' pava napu' tashinshtas ve'lha lhnincôp ti vatcufayjat'eshjop ti chivaniisclanch'e.

²⁰ Vooy pa vatcasinô tcufayesh jayu pava yaquisetes ti chiytsôôtjatesh yiey t'ajuyish na Lhcaanvacle, pa nu'ja lhpa yucuve'esh pava vatjutsa' lhay shi' pava napu' tashinshtas. Ti chiyvenchatesh na Lhcaanvacle t'ajuya pa vatcasinô.

²¹ “Pa lhech nalhu isjop ca asnatshelh pa is ayjayashelhvane, pa ya aj ca asnatshelh pa ca acumjayasheelh. Nôque vatyôjijat ninvôômji, tôlhesh'e jayu papi vatanavot pa namja papi lhcles yiey pa ca vi'tajelh'e avaatsheelh.*xw*

²² “Meelh ca namtajeyjop ti lhanclaneelhshi, pa ya aj ca anclaneelhshi pava yôjesh'esha'ne lhay yiey pa acac'ovat'elh, pa ya aj ca achajeshelhch'e ca anclaneelhshi pava lhay mônlhashi. An'ateelh'ec'oya papi ts'aclaaysha'ne shi' papi vena tôlhshi'. Yivaatsha ya Lhcaanvacle, a'Diosyishelh avaatsheelh.”*xx*

Pa vatc'usiyashesh pava vat'ônjanchey

²³ Pa Lhcaanvacle yiyôjiesha pa Moisês pa yit'esha:

²⁴ “Anfacleem japi Israel lhavos navôque: Pa vatjutsa' nalhu pa jive'cla napu'yama pa asnatshelh jayu pa nalhu ti chit'ichayshi shi' pa is ayjayashelhvane ti chiyaychavalheshch'e ti chifuyuqu'e pava vat'ônjanchey.

²⁵ Isjop jayu ca alhônelhsham pa acufayjat'elh ca asclaneshelhemshi na Lhcaanvacle, pa ya aj na jayu pa ca ve'lhaa ca acu'melh'e.”

Pa nalhu ti Chiyvômajatch'e

²⁶ Pa Lhcaanvacle yiyôjiesha pa Moisês pa yit'esha:

²⁷ “Pa nalhu napu'nôjesh pa lhech jive'cla napu'yama Lhnalhu ti Chiyvômjatch'e.*xy* Isjop jayu ca asnatshelh pa is ayjayashelhvane, pa avclanjatelhjop pa lhech nalhu pa vat'ayipcuyash, pa chinlhônsham pa vatcufayjat ca chinasclaneshemshi na Lhcaanvacle.

²⁸ Ya aj pa ca ve'lhaa ca avclanjatelh pa acumjayashelh pa lhech nalhu, lhayaash pa lhech ti Lhnalhu ti Chiyvômajatch'e, ti t'acuumjelh'ajulh jayu ti chiyvômjatch'e yiey t'ajuyish na Lhcaanvacle ti a'Dioselh.

²⁹ Papi ninavclanjatjop pa vat'ayipcuyash pa lhech nalhu, papu ca naôvtaj'e pa chiyjutfach'eec'oya jayu papi lhchifas.

³⁰ Vooy papu ca natcuumtaj'in pa lhech nalhu pa ca naôvtaj'e papu pa jayjatshi japu papi lhchifas.

³¹ “Ya aj ca asnatshelh pa ca acumjayasheelh. Na lhech vayôjijat ninvôômji, tôlhesh'e jayu papi vatanavot pa namja papi lhcles yiey pa ca vi'tajelh'e avaatsheelh.

³² T'ajuyelh'a avaatsheelh pa nalhu ti chit'ichayshi shi' ca avclanjatelh pa vat'ayipcuyash, pa atsjulheelh pa nuutey pa nalhu yichatjulhyama pa lhech jive'cla pa namjey pa nuutesh pa nijooylha nalhu.”

Pa vatc'usiyashesh pava vatajpeclevtisesh pava t'aclôôc

³³ Pa Lhcaanvacle yiyôjiesha pa Moisês pa yit'esha:

³⁴ “Anfacleem japi Israel lhavos navôque: pa nalhu quince pa lhech jive'cla napu'yama, pa môôjelhch'e pava napu'yama nalhus ca asnatshelh jayu pa vatc'usiyashesh ti Vatajpeclevtesesh pava T'aclôôc*xz* ti chiyisclaneshemshi na Lhcaanvacle,

³⁵ nôquee pa is ayjayashelhvane pa vatjutsa' nalhu. Pa ya aj ca asnatshelh pa acumjayashelh.

³⁶ Pa môôjelhch'e pava lhech napu'yama nalhus pa alhônelhsham pava lhatcufaayshelh ca asclaneshelhemshi na Lhcaanvacle, vooy pa pu'janayama nalhu pa asnatshelh jayu shta pa is ayjayashelhvane pa alhônelhemsham jayu pa acufayjat'elh na Lhcaanvacle. Ti lhnalhu'esh pa vatc'usiyash pa sasjop ca asnatshelh pa acumjayashelh.

³⁷ “Pava lhech chinôôclhanitey chiyivclanjatem na Lhcaanvacle, pavan chinfaclelh'am ca asnatshelh pa is ayjayashelhvaneen shi' ca anchaje'lhey'in jayu na Lhcaanvacle pava lhatcufaayshelh, ti chiylhônsham pava lhatcufaayshelh pava chiycôvjiyan, pava vatcufayjatesesh pa ôtjayetas t'i', nan lhjunash pa nalhu ti chiyetônelh'am,

³⁸ pa avenchatelhc'oya pava nalhus ti chit'ichayshi ca asclaneshelhemshi na Lhcaanvacle, shi' shta pava lhtisshelh shi' shta pava lhatcufaayshelh ti lhanfacleem ja't'ajesha pava tôlhelh'a ti lhasnatshelh.

³⁹ “Pa nalhu quince pa jive'cla napu'yama ti apis ti lhanclaneelhshi pa acavcalhech'elh, pa asnatshelh jayu pa vatc'usiyashesh pava napu'yama nalhus*xa* pa asclaneshelhemshi na Lhcaanvacle, ti chit'ichayshi pa vatjutsa' nalhu shi' pa pu'janayama nalhu.

⁴⁰ Pa vatjutsa' nalhu lhatcumelh'e jayu pava lhay pava isis aacjuy, pava lhsashay pava ftsuuc shi' pava lhavôôysey pava aacjuy jpeclematses shi' pava t'aclôôc tôlhshi' pa tovôc, pa môôjelhch'e pava napu'yama nalhus ca anshameshelh ti yie' t'ajuyish na Lhcaanvacle a'Dioselh.

⁴¹ Yinjôt pa yincôôp pa lhech jive'cla napu'yama ti lhasnatshelh'in jayu pa vatc'usiyashesh pava napu'yama nalhus ca asclaneshelhemshi na Lhcaanvacle. Nôque vatyôjijat ninvôômji, tôlhesh'e jayu papi vatanavot pa namja papi lhcles.

⁴² Pa nôqueshch'e pava lhech napu'yama nalhus lhacôm'a avaatsheelh Israel avoselh ti lhanvat'aselhnee, pa lhôvelh'ôcjiin jayu pava vatajpeclevtesesh pava t'aclôôc,

⁴³ pa jaspa lhacôm'a papi acleselh ca nitô'ya ti jayjat'e ja Egipto japi Israel lhavos, ti jasnatshem ca nôv'ôcji java vatajpeclevtesesh pava t'aclôôc. Yivaatsha ya Lhcaanvacle lh'Diosyish.”

⁴⁴ Nôque lhjunashesh pa Moisês ti nifaclemch'e papi Israel lhavos pava yinôôclhanitey ti chiyivclanjatem pa Lhcaanvacle.