Levítico 21 - Nivaclé Bible

Pava lhnônashem papi vatcasinôc

¹ Pa Lhcaanvacle yit'esha pa Moisês: “Asinôyshem japi vatcasinôc lhcles ja Aarón, pa anfacleem ca ya aj ca nivat'sasiyanesh pa lhavu'vat papi vaf ti lhavelhavot'esh,

² pa ya aj ca lhecha ca lhetaja pa yie' papi lhavelhavot'esh, jan lhjunash lhpa lhamimi, pa lhtata, pa lhaôs ja't'ajesha lhpa lhôse, pa lhch'inish

³ ja't'ajesha lhpa lhch'injô ve'lhasha'ne ti jôjjeclay yi'jop lhayaash ti nintajayay; vooy papi lhech isjop ca nivat'sasiyanesh.

⁴ Taj ti sasjop jayu ca nivat'sasiyanesh ca ninamjatch'e lhpa lhavelhche tjayaay.

⁵ “Pa sasjop jayu ca nivoc'ajatch'e pa lhshatech, pa ya aj ca nit'ovôsch'e pava lhpôsey, pa ya aj ca nivo'matansha'ne pa lhavu'vat,*xr*

⁶ vooy ca nivatvenchatesh lhacôm'a na lh'Dios pa ya aj ca yiclôquic'oya na lhey, lhayaash japi lhech ti yieshjop pava tcufayjat'esh ti napjunsham shi' lhpa lhayucuvejop na lh'Dios; pa nôque lhjunash pa isjop jayu ti ninvô'mesh ti vatvenchatem.

⁷ “Pa tanca lhecha ca isa'jop ca lhjayaeesh jayu lhpa ôcjeclô yichtasham'in, pa ya aj ca lhecha lhpa ôcjeclô tanclôôy ja't'ajesha ti tinvômque, lhayaash ti chiyvenchatem na lh'Dios.

⁸ Pa lhetipaesh ca atanuelhc'oya lhacôm'a, lhayaash japi lhech ti yieshjop lhpa lhayucuve na a'Dioselh. Vooy japi lhech chiy'isinatelh'am, lhayaash yivaatsha, ya Lhcaanvacle, ya issha'ne pa yalhech ti ja'isiyansha'ne.

⁹ “Lhpa lhôse pa vatcasinô ca ninach'itajesh ti yichtasham'in pa yinvaclematanesh pa lhtata pa isjop jayu ca mônlhaa ca chinôp'ôlh.

¹⁰ “Vooy pa lhanvacle papi vatcasinôc ti chiyashjatesh ti chiyuyjatch'e pava chiyvenchatesh t'uyjatshiyis, ti tôlh'ejop pa lhape' ti chiyp'aclanesham pa lhshatech. Pa lhe'naa ti sasjop ca nisachan pava lhayees pa ya aj ca nic'asteshlhtapee lhpa yuych'e ti yitacshin'in;

¹¹ pa tanca lhecha ca isa'jop ca nôquey pan yie' pa lhavu'vat pa vaf: pa tanca lhecha yiey pa lhjunash pa lhtata ja't'ajesha lhpa lhamimi ca nivat'sasiyanesh.

¹² Pa ya aj ca nitay'ôcjic'oya na is'ôcji lhtôvash na lh'Dios, pa ya aj ca nancôtjatsha'ne pa lhjunash ti lhasnôyech'e na is'ôcji lhtôvash, lhayaash na lhech ti chip'aclaneshch'e pa lhape' ti yivenchatesh na lh'Dios. Yivaatsha ya Lhcaanvacle.

¹³ “Pa isjop jayu ca lhjayaeesh lhpa lhutsja.

¹⁴ Nive'lhaaesh ca isa'jop ca lhjayaeesh jayu lhpa ôsch'acche ja't'ajesha lhpa tinvômque, lhpa lhanclô' ja't'ajesha lhpa yichtasham'in; lhpa lhjaya'esh lhecha lhpa lhutsja tô'lha papi yitsôt'ajesh lhchifas,

¹⁵ ca jaspa tanca napecshichamch'e papi lhcles yiey papi lhchifas; lhayaash yivaatsha, ya Lhcaanvacle, ti javenchatyitam.”

Pava chiycavoychatjulh papi vatcasinô'esh

¹⁶ Pa Lhcaanvacle yiyôjiesha pa Moisês pa yit'esha:

¹⁷ “Anfacleem ja Aarón nôqueesh shi' pa lhjunashch'e jayu, ca ya aj na jayu papi lhcles papi sasshi ti nichinvashanem jayu ca nôveshjop ja lhcufayjat yucuve na lh'Dios.

¹⁸ Nava jayeesh ti tanca lhecha papi sasshi ca isa'jop jayu ca nôveshnee ca nasnatesh: ca lhetaja pa tacluuc, pa ancooc, pa lhnaash ja't'ajesha pava lhacfey ti sassha'neen,

¹⁹ pava lhcaclôy ja't'ajesha pava t'itjuy ti yipôctesch'e,

²⁰ pa cupjôm, pa yicôcten'in, pan climshi pa lhtôsej, pan t'sôôôy pan tavomatacheysha'ne pa t'ôj, ja't'ajesha pava lhcônshiyis ti sasshi.

²¹ Nive'lhaa papi lhcles ja vatcasinô Aarón ca nicaajtaj ti sasshi ca nôveshjop na Lhcaanvacle pava lhcufayjates ca ninapjunsham; ca nicaaj papi sasshi, pa nilhe'naa ti sasjop jayu ca nôveshjop pa lhcufayjat yucuve na lh'Dios.

²² Isjop ca nituj lhpa lhech yucuve shi' pav'elh chiy'isiyan shi' pava yaash ti chiy'isiyan,

²³ taj ti sasjop jayu ca nôc'ôcji yiey na t'ôyish'e na sivôclôc lhayeech pa ya aj ca natc'uya na itôvat'esh, jaspa tanca nachajeshshicham ti sasshi na lhjunash ti lhasnôyich'e na yivaatsha is'ôcji lhtôvash. Yivaatsha ya Lhcaanvacle, ti javooyshiyitam napi lhech.”

²⁴ Vooy pa Moisês yachajeshemch'e shta cavôque ja Aarón, japi lhcles shi' lhacôm'a japi Israel lhavos.