Levítico 2 - Nivaclé Bible

Pava vatcufayjatesesh pava chiycôvjiyan

¹ “Meelh papu ca nanchaajtajey na Lhcaanvacle pa lhcufayjat'esh pava chiycôvjiyan, pa isjop jayu ca nanchaaj pa isshi' climshi, pan chiyôtsiysham pa lhape' shi' pa acôjqu'e pa lhniish;

² pa nanjooylha ca nicha'jey japi lhcles ja Aarón, japin vatcasinôclesh, pa ve'lhaa japi lhech ca natcumesham pa climshi pa lhape' pa nu'esham lhacôm'a pa acôjqu'e pa lhniish, pa ninapjunesham yiey na itôvat'esh ti lhcufayajat'esh t'ajuya ti yaychavalheshch'e ti yacônch'e pa lhniish na Lhcaanvacle.

³ Vooy pan mônlhee pa vatcufayjat'esh, ti chiylhôneemsham na Lhcaanvacle ti chiyôclôjesh, pa lhech chiyvenchatesh ja Aarón shi' japi lhcles.

⁴ “Meelh papin yieshnee pa lhcufayjat'esh pava chiycôvjiyan chiyajotshi chiyineshch'e lhpa yucuveshi pa isshi' climshi chiyipjôôj pa lhape', taj ti ameyshi pava yiyalhiyan, ja't'ajesha pava chiyclasayanch'e pa climshi ameyshi pava yiyalhiyan pa chiyisichat'apee pa lhape'.

⁵ “Ca acufaytajesh pava chiycôvjiyan chiycaclôôlh, pa lhecha pa isshi' climshi, chiyipjôôj pa lhape' ameyshi pava yiyalhiyan;

⁶ pa ac'asatshisha'ne pa asichat'apee pa lhape', pa lhech vatcufayjat'esh pava chiycôvjiyan.

⁷ “Ca acufaytajesh pava chiycôvjiyan chitatayesh, pa isjop jayu ca u'eyshi pa isshi' climshi shi' pa lhape'.

⁸ Ca avaclhitajesh cavôque matas pa isjop jayu ca acha'jey t'ajuyish na Lhcaanvacle shi' ca ajutshey ja vatcasinô, vooy jô lhech pa nichaajshey na itôvat'esh.

⁹ Pa lhech'e ja vatcasinô ca natcum'e pa tiqu'in pa vatcufayjat, pa ninapjunsham yiey na itôvat'esh ti vatcufayjat'esh ti chiyaychavalheshch'e, ti yacônch'e pa lhniish na Lhcaanvacle.

¹⁰ Vooy pava mônlhee pa vatcufayjat'esh, pa lhech chiyvenchat ti yi'shi' pava vatcufayjates ti chinapjunsham ti chiyôclôjesh na Lhcaanvacle, t'ajuya ja Aarón shi' japi lhcles.

¹¹ “Ya aj ca u'elheyshi ca ve'lhaa pava yiyalhiyan pava vatcufayjat'esesh pava chiycôvjiyan ti lhôveshelhjop na Lhcaanvacle. Pa ya aj na pava nalhjunash'in yiyalhiyan pa nilhecha pa acôyech ca isa'jop jayu ca anapjuneshelh ti acufayjat'eshelhem na Lhcaanvacle.

¹² Isjop ca anchajeelhey pava yieshi pa yiyalhiyan shi' pa acôyech na Lhcaanvacle ti acufayjateseshelh pava vatjutsa' lhay, taj ti ya aj ca alhônelh'e yiey na itôvat'esh ca nacônch'e pa lhniish na Lhcaanvacle.

¹³ “Lhacôm'a pava lhatcufaayshelh ti chiycôvjiyan isjop ca u'elheyshi pa tsifoni,*xb* pa ya aj ca avashanem pava acufayjatesesh pava chiycôvjiyan ca ameeyshi pa tsifoni ti t'ônashesh'am na a'Dios. Lhacôm'a pava acufayjates isjop ca u'eyshi pa tsifoni.

¹⁴ “Ca vi'tajeshjop na Lhcaanvacle pa acufayjat'esh pava chiycôvjiyan pava vatjutsa' lhay ti lhcôvjiyan, isjop ca lhecha pava yiiyshi chiycaclôôlhsha'ne shi' pava lhtôsjey yup'asha'ne lhacfaashi pava vatjutsa' lhay ti lhanclanshi.

¹⁵ Pava lhech vatcufayjates isjop ca u'eyshi pa lhape' shi' pa acôjqu'e pa lhniish, lhayaash ti vatcufayjatesesh pava lhech chiycôvjiyan.

¹⁶ Nijooylha pa vatcasinô ca ninapjunsham pava napu' lhtôsjeyesh pava chiyicfaashi shi' pa lhape', pa nu'esham lhacôm'a pa acôjqu'e pa lhniish, pava lhech vatcufayjateseshjop ti chiyaychavalheshch'e ti chinapjunemsham ti chiyôclôjesh na Lhcaanvacle.