Levítico 11 - Nivaclé Bible

¹ Pa Lhcaanvacle yiyôjiesha pa Moisês shi' pa Aarón pa yit'esha:

² “Anfacle'lhem napi Israel lhavos, lhacôm'a pava yaquisetes yiey na cotsjaat pava isjop ca nituj,

³ pavan yachajesh pa lhôc ja't'ajesha ti yic'asvatjulh pava lhafjus;

⁴ Taj ti sasjop ca atujelh pav'elh yaquisetes ti lha'mataj yachajesh pa lhôc ja't'ajesha yic'asvatjulh pava lhafjus: “Pa camello, lhavaatsha yachajesh pa lhôc taj ti ninc'asvatjulh pava lhafjus. Pa isjop ca natôôyshelha ti sas pa lhech yaquiset.

⁵ “Pa chajanitaj, lhayaash ti yachajesh pa lhôc taj ti ninc'asvatjulh pava lhafjus. Pa isjop ca natôôyshelha ti sas pa lhech yaquiset.

⁶ “Pa nônjate, lhayaash ti yachajesh pa lhôc taj ti ninc'asvatjulh pava lhafjus. Pa isjop ca natôôyshelha ti sas pa lhech yaquiset.

⁷ “Pa vojotaj, caajtaj pava lhafjus ti lha'mataj ti yic'asvatjulh, taj ti ninachajesh pa lhôc. Pa isjop ca natôôyshelha ti sas pa lhech yaquiset.

⁸ “Sasjop ca atujelh pa t'asjaan pava lhech yaquisetes, pa ya aj ca ajayelha pa lhavu'vat ti vaf. Pa isjop ca natôôyshelha ti sas pava lhech yaquisetes.

⁹ “Pava sajech yi'shi' pa yinôôt, ca lhechtaja pa uj yinôôt ja't'ajesha pa lhôjôyish, isjop ca tsi'shaa ca atujelh pava caaj pava lhafas shi' pava t'ôjechey.

¹⁰ Taj ti pava amem pava lhafas shi' pava t'ôjechey, pa isjop ca natôôyshelha ti chiyapun pava lhech yaquisetes, lhama'taj pava yi'shi' pa uj tovôc ja't'ajesha pa lhôjôyish, pa lhech lhjunash pava yaquisetes tiqu'icsha'ne shi' pava us.

¹¹ Pa sasjop ca atujelh pa t'asjaan; pa isjop ca natôôyshelha ti chiyapun pava lhech yaquisetes, pa chiyapun shta pa lhavu'vat ti vaf.

¹² Lhacôm'a pava yaquisetes yi'shi' pa yinôôt ti amem pava lhafas shi' pava t'ôjechey, pa isjop ca natôôyshelha ti chiyapun.

¹³ “Pava ajôclôs sasjop ca atujelh shta pav'elh; pavan chiytôyesha ti chiyapun: pa stavuun, lhpa c'afoc shi' pa aclavo,

¹⁴ lhpa chajaninjô shi' pav'elh sheyanôjis,

¹⁵ lhacôm'a pava nalhjunashvatc'oya yacutsha'ne ajôclôs,

¹⁶ Pa vônjalhôj, pa c'o'mi shi' pava nalhjunashvatc'oya ajôclôs pitesch'e pava lhcaclôy.

¹⁷ Pa tocoj, pa pôtsej,

¹⁸ pa anotaj, pa josinôjôtaj, pa yit'ô,

¹⁹ pa yôjôj shi' lhacôm'a pav'elh ajôclôs pites pava lhavoc, lhpa t'isô shi' lhpa sheyô.

²⁰ “Lhacôm'a pava tinvos pava yifô'yô shi' ti t'ôtaay, isjop ca natôôyshelha ti chiyapun,

²¹ taj ti isjop ca atujelh pava lha'mataj ti yifô'yô shi' ti t'ôtaay ti caaj shta pava lhcaclôy ti nachajvane pava lhafoc ti t'eclestchisham.

²² Pava lhech isjop ca atujelh: pava nalhjunashvatc'oya fanjay, pava fanjay lhnavot usch'e, pava caftsisjôyoc, shi' pava jpônjas.

²³ Taj ti lhacôm'a pav'elh tinvosesh ti yifô'yô shi' ti t'ôtaay isjop ca natôôyshelha ti chiyapun.

²⁴ “Cavôque lhjunashch'e pa nasasiyanelh jayu: “Papu ca naôvtaj'e ti t'ajaya pa lhavu'vat ti vaf pava lhech yaquisetes, pa vat'sasiyanesh jayu pa namja pa tulh.

²⁵ “Papu ca naôvtaj'e ti t'acum'ôcji pa lhavu'vat ti vaf pava lhech yaquisetes, pa isjop jayu ca nicleesh pava yuych'e, pa vat'sasiyanesh jayu pa namja pa tulh.

²⁶ “Lhacôm'a pava yaquisetes ti caaj pava lhafjus ti ninc'asvatjulh ti ninachajesh pa lhôc isjop ca natôôyshelha pa lhech yaquiset ti sas, vooy papu ca nit'ajaytaja pa vat'sasiyanesh jayu.

²⁷ “Pa ca naôvtaj'e pa yaquiset ti yichatjulh'e pava lhafoc ti t'ôta'yesh pava lhpanôquey, pa isjop ca natôôyshelha pa lhech yaquiset ti sas; pa ca naôvtaj'e papu ca nit'ajaytaja pa lhavu'vat ti vaf pa ve'lha pva lhech pa vat'sasiyanesh jayu pa namja pa tulh.

²⁸ Lhech lhjunash shta pan t'acum'ôcji pa lhavu'vat ti vaf pava lhech yaquisetes, pa isjop jayu ca nicleesh pava yuych'e pa vatsasiyan jayu pa namja pa tulh, pa isjop ca natôôyshelha ti sas pava lhech yaquisetes.

²⁹ “Pava yaquisetes ti t'ôta'yesh pa t'oot yiey na cotsjaat, pa isjop ca natôôyshelha pa lhjunash ti sas pava lhech: pava c'amitas, pava am'as shi' pav'elh nalhjunashvatc'oya yaquisetes,

³⁰ pava shinvunis, pava alhutas, pava shnilh'ôs, pava shnilh'ôtas shi' pava caclô'mas.

³¹ “Pava aclôj yaquisetes ti caaj, pava lhech isjop ca natôôyshelha ti sassha'ne. Pa ca naôvtaj'e papu ca nit'ajaytaja pa nivat'sasiyanesh jayu pa namja pa tulh.

³² “Pa yisasiyan jayu shta pa ca naôvtaj'e ca ninataj'apee pa lhvu'vat ti vaf pava lhech yaquisetes. Ca lhechtaja pava yiclôy, lhpa vat'uyjatshiy, ca lhechtaja pa tinôj, lhpa vatcatinôj, ja't'ajesha pa ca naôvtaj'e ti chit'acumesh'in, pa isjop ca chineyshi jayu pa yinôôt pa nivatsasiyanesh jayu pa namja pa tulh; pa nanjooylhach'e ca isa' pa lhech.

³³ “Pa ca naôvtaj'e ca nancôôtajsha'ne pa lhavu'vat pava lhech yaquisetes ti vaf va ninatajch'e pa tô'lhôs, pa lhacôm'a pava yich'e' pa lhech ti yisasiyan vooy pa tô'lhôs pa chinoflhit.

³⁴ Lhacôm'a pa vatôc ti natsheyshi pa yinôôt pa lhech tô'lhôs pa sasshi jayu; pa lhacôm'a pa chiyôji' ti yich'e' pa lhech sasshi' jayu.

³⁵ Lhacôm'a pava lhech ti nat'eyshi pa yaquiset ti vaf pa yisasiyan jayu lha'ma ca lhechtaja lhpa itôji ja't'ajesha lhpa yucuveyshiy, pa isjop jayu ca chinvômjatsha'ne. Pa lhech yisasiyan pa isjop jayu ca natôôyshelha avaatsheelh.

³⁶ “Taj ti pa yinôôt yalha tôlh'e'in ja't'ajesha pa t'itsech ti chiyôji', mônlheesh jayu ti isshi'; taj ti papu ti t'acum'e pa lhech yaquiset ti vaf, pa vat'sasiyan jayu.

³⁷ “Ca nivaftaj pa ve'lha pava lhech yaquisetes pa ninatajeyshi pava vatcôvjiyanche, pa mônlheesh jayu ti isshi';

³⁸ taj ti pava vatcôjiyanchey ca nivaaytajshi ca ninatajeyshi pa ve'lha pava yaquisetes ti vaf, pa isjop jayu ca natôôyshelha ti yisasiyan.

³⁹ “Nan lhjunash ca nivaftaj pa yaquiset ti lhenelh ca atujelh, vooy pan t'ajaya pa lhavu'vat pa nivat'sasiyan jayu pa namja pa tulh;

⁴⁰ pan tuj pa t'asjaan pa yaquiset vaf, pa isjop jayu ca nicleesh pava yuych'e pa vat'sasiyan jayu pa namja pa tulh; shi' pan t'acum'e pa lhavu'vat pa yaquiset vaf pa isjop shta ca nicleesh pava yuych'e pa vat'sasiyan jayu pa namja pa tulh.

⁴¹ “Ya aj ca atujelh pa ca ve'lhaa pava yaquisetes t'ôta'yesh pa t'oot; pava lhech yaquisetes chiyapun.

⁴² “Lhacôm'a pava yaquisetes t'ôta'yesh pa t'oot yiey na cotsjaat, pa sasjop ca atujelh pa ca ve'lhaa, ca lhechtaja pava t'ôta'yesh pa t'oot ja't'ajesha pava t'ôta'yesh pava yichatjulh lhafoc ja't'ajesha pava yaash pava lhafoc, pava lhech yaquisetes chiyapun.

⁴³ Pa ya aj ca anapuneshelh shi' ca avat'sasinatshelh avaasheelh pava lhech yaquisetes t'ôta'yesh pa t'oot,

⁴⁴ lhayaash ti ya'lhech ya Lhcaanvacle, a'Diosyishelh. Avaatsheelh isjop ca avat'isinatshelh lhacôm'a ca a'isiseelh, lhayaash yivaatsha ya is. Pa ya aj ca avat'sasiyanshelh pava yaquisetes t'ôta'yesh pa t'oot yiey na cotsjaat.

⁴⁵ Ya lhech ya'Lhcaanvacle nan nayjatelh'e ja Egipto jaspa a'Diosshelh. Pa lhe'naa avaatsheelh ti isjop ca avat'isinatelh, lhayaash yivaatsha ti ya is.”*xñ*

⁴⁶ Navôque chinafaycuteshelh t'ajuya pava yaquisetes, pava ajôclôs shi' lhacôm'a pava yi'shi' ti yachajshiin pa yinôôt, pa lhacôm'a pava yaquisetes t'ôta'yesh pa t'oot yiey na cotsjaat,

⁴⁷ ca jaspa isjop ca natô'yelha pava isis shi' pava sas, shi' pava yaquisetes isjop ti chituj shi' pava sasjop ca chintuj.