Levítico 10 - Nivaclé Bible

Pa lhsasch'e pa Nadab shi' pa Abiú

¹ Pa Nadab shi' pa Abiú, lhcles pa Aarón, ve'lhee ts'ivee ti yichaaj pava chiyanch'e pa itôj, ti yinesh'apee ts'ivee pa acôjqu'e pa lhniish pa tcufayjatesh pa venalha itôj yie' t'ajuyish pa Lhcaanvacle ti nilhecha ca nitayôjijanesh.

² Pa lhechesh pa tôlhey t'ajuyish pa Lhcaanvacle pa itôj pa yivutunshisha'ne lhacôm'a. Pa lhech lhjunash ti vaf'e' t'ajiyish ts'ivee pa Lhcaanvacle.

³ Pa nijooylhach'e pa Moisês ti yit'esha pa Aarón: —Côque yen pa Lhcaanvacle ti nifac ti yit'esh: ‘Papi ca shalhatajayam pa janôclitem jayu na yiisiyash, pa lhacôm'a napi Israel lhavos ti janôclitem jayu na yilhasnôycheyash.’ Vooy pa Aarón pa nints'isenatey

⁴ Pa nijooylhach'e pa Moisês ti tôney pa Misael shi' pa Elzafán, lhcles pa Uziel, lhatjooc pa Aarón, pa yit'esha: —Anachelhey ca ayjatelh'ôcji na is'ôcji lhtôvash capi avelhavot'elh, ca acha'jelhfach'eec'oya na vat'ichavat

⁵ Papi lhech pa yicheyshi pa vooy pavan yuych'e yitsôt'ajesh pa chiychajeshfach'ee ts'ivee yiey pa fach'ee pa vat'ichavat, jan tônashesh ti tayôjijanesh pa Moisês.

Pava chiyajulhjatemey shi' pava tanyôjijayesh papi vatcasinôc

⁶ Pa nijooylha pa Moisês ti yit'esha pa Aarón shi' papi lhcles Eleazar shi' pa Itamar: —Pa ya aj ca an'ateelh ca nisachan pava aye'selh pa ya aj ca ac'astelhch'e pava t'uyelhch'e ti lhtacshinelh'in, ca ya aj ca anvafjayuelhsha'ne pa ya aj ca suyaa pa Dios napi vatachifas. Pa isjop ca nitafshiyvatsham'in japi avelhavot'elh lhacôm'a japi Israel lhavos, lhayaash pa Lhcaanvacle ti yit'eshe'ma pa lhavôôc ti napjuneshey.

⁷ Pa tanca alhecheelh ca ayelh'e na chiyuy'een na Tsha'nuvo'esh ti Chivatvan'e pa jaspa tanca avafelh, lhayaash avaatsheelh ti chinaisinatshelhjop pa lhape' pa Lhcaanvacle. Pan t'ônasheshem pa Moisês ti yiyôjiesha pa lhech lhfanishesh ts'ivee.

⁸ Jô'tajesh pa Lhcaanvacle ti yasinôqui pa Aarón pa yit'esha:

⁹ “Meelh avaatsha ja't'ajesha napi acles ti lhôquelh'ôcji na Tsha'nuvo'esh ti Chivatvan'e, pa sasjop jayu ca ayôelhshi pa ôtjayetas t'i' pa nilhecha pa tanqu'etsjey ca ya aj ca avafelhsha'ne. Nôque vatyôjijat ninvôômji, ti tôlhesh'e papi vatanavot pa namja papi lhcles,

¹⁰ ca jaspa natô'yelhc'oya pa lhjunash pava isis shi' pava niysisa, pa yie' pa lhasnôyech shi' pa sas,

¹¹ pa isjop shta ca afaycutesh napi Israel lhavos lhacôm'a nava lhayôjijates na Lhcaanvacle ti yiyôjiesha ja Moisês.”

¹² Pa nijooylhach'e pa Moisês ti yit'esha pa Aarón shi' pa Eleazar shi' pa Itamar, papi napu' lhcles mônlhajop pa Aarón: —Acumelh'e na vatcufayjat'esh nava chiycôvjiyan navan mônlhee ti chinapjunemsham pa Lhcaanvacle, pa atujelh pan ameyshi pa yiyalhiyan veeshelhjop na itôvat'esh, lhayaash navôque ti lhasnôyech'esh.

¹³ Atujelh ca veeshelh'e na lhasnôyech'e, lhayaash navôque ti chiyjuyjat'a shi' napi acles ti vatcufayjatesesh ti chiylhônsham ti chiyôclôjesh pa Lhcaanvacle.*xl* Navôque jayinyôjijayesh.

¹⁴ Vooy ja t'oot, ti chiytsôôtjatesh ti chiycufa'yesh, shi' ja lht'oycha, jan chiycufa'yeshlhatam, pa isjop jayu ca atujelh'e yiey pa is'e', avaatsha shi' napi acles yitsjôy shi' napi ôcjeclôy, lhayaash navôque ti yetônjop ti lhcufayjatesjop ti vaniisclanch'e napi Israel lhavos.

¹⁵ Pa lht'oycha t'ajuya ti chiycufa'yeshlhatam, vooy pa t'oot pa lhech vatcufayjat'esh ti chiytsôôtjateshi, pa achajelhey t'ajuyish pa Lhcaanvacle pa veeshelhjop ti chiytsôôtjatesh ti vatcufayjat'esh, pa u'ja pava lhôtjes ti chiycufa'yesh ti chinapjunsham. Navôque a'na yajatesh jayu ti t'ajuy'e shi' napi acles, jan t'ônashesh pa Lhcaanvacle ti tayôjijanesh.*xm*

¹⁶ Pa lhechesh pa Moisés tay'ôtsjanesh pa fusuc ti chiycufa'yeshjop pa sasch'e, ti yi'van ti apis ti chinapjunsham. Pa lhechesh pa suya pa Eleazar shi' pa Itamar, papi napu' lhcles mônlhajop pa Aarón, pa yit'esha:

¹⁷ —¿Ta t'e lhayaash ti naatujelh ja vatcufayjat'eshjop pa sasch'e yiey na lhasnôyich'e? Navôque ya'shesh ti lhasnôyjes,*xn* vooy pa Lhcaanvacle yijutelh'ay ca jaspa acuumjelha pava tameneshlhavach napi vatachifas shi' ca natcumeshelh'ajulh pa Lhcaanvacle ti chiyvômjatch'e pava lhsasch'e.

¹⁸ Vooy pava lhavoyey tanca chinchaj'ôcji na is'ôcji lhtôvash, avaatsheelh tajulhey ca atujelh pa vatcufayjat yiey na lhasnôyich'e, yiey jan yônashesh ti jayiyôjijanesh.

¹⁹ Vooy pa Aarón pa yicuulh: —A'va, apis nalhche napi lhech yiesh'e t'ajuyish pa Lhcaanvacle java vatcufayjatesjop pa sasch'e shi' java yilhônsham, vooy yivaatsha vaclanyam cavôque matas. Nan lhjunash ca tuj lhôn nôqueesh ja vatcufayjat'eshjop pa sasch'e, ¿pa nanshamtajeshyi t'e pa Lhcaanvacle?

²⁰ C'oya ti yipe'yeesh côque pa Moisês, pa lhech yôjeshem'e.