San Juan 1 - Nivaclé Bible

Nivacleesh cava Dios Lhasinôc

¹ Nich'a chitôlhesh'e pava matas ti p'alha' ti caaj pa Ya'clish. Pa lhech Ya'clishesh yi'jop pa Dios lhech lhavaatsha pa Dios.

² Côque lhjunash lhapesh ti nich'a ti yi'jop pa Dios.

³ Lhacôm'a nava matas tô'lha ti yivclanjat cô lhech Ya'clish; ca ama lhôn cô lhech pa tanca navclantaj nava vaclan nôqueesh.*xa*

⁴ Lhavaatsha ti yi'shi' pa vatmônlhajayash pa lhech vatmônlhajayash lhqu'isjuyajesh papi yiey na cotsjaat.

⁵ Pa lhech vatqu'isjuyaj yitujatsham pa tulhitaj, lhan'e pa tulhitaj pa tanca namcat pa lhech.

⁶ Caaj ja ve'lha nivacle nichen pa Dios, jô lhech lhey Juan.*xb*

⁷ Ti nam pa lhech pa tanyôjijayesh ti nôclich'e ti tasinôyesh pa vatqu'isjuyaj, jaspa chinuesha lhacôm'a pava yit'esh'in pa lhech.

⁸ Pa Juan nilhetaja ca vatqu'isjuyajeesh, tsi'sha ti chincheneshnee ti tanyôjijayesh ca nasinôqui pa lhech vatqu'isjuyaj.

⁹ Pa lhech yijô' vatqu'isjuyaj pan nôclit'apee lhacôm'a papi nivacle ti namey na cotsjaat.

¹⁰ Jô lhech jan Ya'clishesh p'alha ti yiey na cotsjaat; pa tanefeneshelh pa Dios ti yisnatshelh lhacôm'a na tuc'a'ey na cotsjaat. Taj ti napi yiey na cotsjaat ninteesh ca nach'ana jô lhech.

¹¹ Natajeshey japin yitsôt'ajesh taj japu lhech ninteesh ca natcuumjulh.

¹² Taj ti papi yit'esh ti t'acuumjulh pa nincacuesh shta, papi lhech yamey ti lhclesesh pa Dios.

¹³ Papi lhech lhclesesh pa Dios nintô'lhesham pa lhjunash papi nivacle ti nivat'as vooy pa Dios tôlhesha ti yicts'ôyanesh papi lhech.

¹⁴ Jô lhech Ya'clish nivacleesh, jan yi'jotshiin shta muc, yamqu'een pa lhencheyash shi' shta pava yijô'. Javanshelh ja lhasnôycheyash ti yivi'sinatesh ja Lhaôs ti yijutem pa Lhtata.

¹⁵ Ja Juan yinôôclhanita ti nifac pa yit'esh ti yisitsenesh: “Lhech nôque, nan jaychayjulh'in ti jayeetsha ti nijooylhayich'e na lhech yaashyitapee, lhayaash ti apis ti caajyic'oya.”

¹⁶ Shtatôôlhsha pava isis lhcufayjates ti nijutjooy yajatesh.

¹⁷ Chiyjuteyjoom lhapesh pa Moisés pava vatyôjijates; vooy vitsha pa vatencheyash shi' pa yijô' tô'lha ja Jesucristo.

¹⁸ Ampapu ca ve'lhaa ca nivan lhapesh pa Dios, ve'lha ja Lhaôs, jan Diosesh shta, lhech jô lhech shintôyjata pa lhjunash pa Dios.

Pa Juan Vatnayjayash lhavo' vancatôyjata pa lhjunash pa Jesucristo

¹⁹ Japi judíos, Jerusalén lhavos, yicheney japi vatcasinôc shi' japi levitas ja Juan jaspa niyôsesh'in ts'ivee pan tôlhshi'.

²⁰ Pa tanôôclhanite'ma ti yit'esh: —Ni yalhecha ja Cristo.

²¹ Pa niyôsesh'in shta ts'ivee: —¿Pa a she ajalh? ¿A lhech nataney pa chiytôyjata pava ti vaclan lhey Elías? Pa yicuulh ja Juan pa yit'esh: —Am, ni yalhecha. Pa lhechesh pa niyôsesh ts'ivee shta: —¿A lhech nataney pa chiytôyjata pava ti vaclan pan chiyaya'julh'in? Pa yicuulh pa yit'esh: —Am.*xd* ,

²² Pa lhechesh pa yit'esha shta ts'ivee: —¿A she ajaalh? Anfacleelhyam, jaspa janfacle'lhem jayu vitsha japin tsichenelh'ay. ¿Ta lhteesh'avne avaatsha?

²³ Yicuulh shta ja Juan: —Yivaatsha vat'ôjôjyish jan yie' ja cotsjaat ti ampapu ca nôv'e' ti yit'esh: ‘Atsôôtjatelhc'oya pa lhnôyish pa Lhcaanvacle’, yiey pa t'ônashesh lhapesh pa chiytôyjata pava ti vaclan lhey Isaías.

²⁴ Japin tô'lha japi fariseos japi lhech tasinôyelh ja Juan,

²⁵ pa yit'esh ts'ivee ti niyôsesh: —¿Pa ta t'e lhayaash ti lhavancanajayan? ca tin'e lhteesh ti ni a Cristoa, ni alhecha shta pa Elías, ni a lhecha shta pa'elh chiytôyjata pava ti vaclan.

²⁶ Yicuulh ja Juan pa yit'esh: —Yivaatsha javancanajayanesh pa yinôôt; taj ti nan yi'shi' acaavjuelh, pa tanca antôfaacshelh avaatsheelh.

²⁷ Lhech jayu lhavaatsha ja nijooylhayich'e, jô lhech ti vatjutsaeshyic'oya. Lhech jô lhech nivanajulhjatsham ca nuqueem'e pava lhavtes pava t'acfiyis.

²⁸ Cavôque matas vaclan'e ja Betábara yiey ja pachamey ja tovôc Jordán lhum'ôcjinucjulh, yiey jan yiesh'e ja Juan ti vancanajayan.

Pa Jesús tashinshtajesh lhclôesh pa Dios

²⁹ Vooy ti nalhu pa lhechesh pa yivanjulh ja Juan ja Jesús ti nachey pan yie', pa yit'esh: —Ovalhelhjulh, nôquejulh ana nan yivômjatemch'e jayu papi nivacle pava lhsasch'esha'ne. Na lhech tashinshtajesh vatcufayjat'esh, vooy pa Dios tcufayesh.

³⁰ Lhech na lhech jasinôqui lhapesh ti jayeesh: ‘Nijooylhayich'e jayu pa ve'lha nivacle ya'sheshyic'oya ti t'un'in, lhayaash ti p'alha ti caaj lhapesh, lhan'e pa ya ch'apaey'in ca nascat'aj.’

³¹ Yivaatsha ni apisa ca nastôfa'clesh; pa nôquen lhayaash janatshina pa javancanajayanesh pa yinôôt, pa jaspa nitôfaclesh jayu napi Israel lhcles.

³² Pa lhechesh pa tanôôclhaniteshlhavne shta ja Juan pa yit'esh: —Ja'van ja Espíritu Santo vatjôney ja ofo tôlheychisham na vôôs pa nacheyshicham jô lhech pa mônlhashi.

³³ Jôjjeclay ninastôya jôque, taj ti vooy jan tsicheneshnee ca javancanajayanesh pa yinôôt, lhech jô lhech yit'eshyi: ‘Ca avantajesh ja Espíritu pa ve'lha nivacle ca nôôvtaj'apee, lhech jô lhech vancanajayanesh jayu ja Espíritu Santo.’

³⁴ Ja'van tane jô lhech, pa janôôclhanitsha ti yijô' ti Dios Lhaôs.”

Papi vatjutsa' Jesús t'eyjatsjanjas

³⁵ Vooy ti nalhu lhech yielh'e shta ja Juan shi' japi napu' t'eyjatsjanjas.

³⁶ Pa meelh ti yivanch'e jô lhech ja Jesús ti naashjop, pa yit'esh ja Juan: —¡Ovalhelhch'e côcôô tashinshtajesh lhclô'esh pa Dios!

³⁷ Meelh ti yipe'ya japi napu' t'eyjatsjanjas ja Juan ti nôque yit'esh, pa lhechesh pa voqu'e ts'ivee japi lhech ja Jesús.

³⁸ Pa yovalheyt'ôyiish ja Jesús pa yivanjulh japuque yijoqu'esha'ne, pa yit'esh ja Jesús ti niy'ôs: —¿She pa lhnachelhey? Pa yicuulh ts'ivee japuque pa yit'esh: —Vanqu'eyjatsjan, ¿Ta lhôv'e'in?

³⁹ Pa yicuulh ja Jesús pa yit'esh: —Atalhunelh ca avanelhey. Pa lhechesh pa voqu'e ts'ivee pa yivaney pan yie'in, pa yaajlheesh ti mônlhajop ts'ivee japuque pa lhech nalhu, eem ti pa lha nuut na jumcuclaay.

⁴⁰ Japi lhech napu' vat'eyjatsjanjas japin yipe'ya java lhclishay ja Juan, jô'tajesh ti voqu'e ts'ivee shta ja Jesús, ve'lha jô lhech lhey Andrés, lhch'inish ja Simón Pedro.

⁴¹ Lhech jô lhech Andrés vooysha'nejop tatsha ja lhchecla' Simón pa yit'esh: —Nich'a javanelh ja Mesías (nôque yich'e' Cristo.)

⁴² Pa lhechesh pa yô'yaney ja Andrés ja Simón jan yie' ja Jesús. Pa meelh ti yamey ts'ivee pa yovalhsha'ne chin ja Jesús, pa yit'esh ti yiyôjaa: —Avaatsha a Simón, atata ja Jonás, avaatsha ey jayu nôqueesh Cefas (nôque yich'e' shta Pedro.)

Pa Jesús tôney pa Felipe shi' pa Natanael

⁴³ Vooy ti nalhu shta pa yeetajesh ca natjuyey ja Jesús ja Galilea, pa lhechesh pa yi'van ja Felipe, pa yit'esh ti yiyôjaa: —Atatvoyich'e.

⁴⁴ Ja Felipe lhavtsat'esh ja Betsaida, jan lhavtsat'esh yitsha ja Andrés shi' ja Pedro.

⁴⁵ Lhan'e ja Felipe vooysha'ne vitsha ja Natanael, pa yit'esh ti yiyôjaa: —Javanelh ja nivacle jan yi'sesh'e lhapesh pa Moisés jan yi'shi' java vatyôjijates, jan yi'sesh'e shta papi chiytôyjata pava ti vaclan. Jô lhech lhanquey Jesús, José lhô'sesh, Nazaret lhavo'.

⁴⁶ Pa yit'esh ja Natanael ti yicuulh: —¿Nitôôlhtaj'e t'ejô ja Nazaret pa lhech lhjunash issha'ne? Pa yit'esh ja Felipe ti yicuulh: —Anachey ca a'van vitsha.

⁴⁷ Meelh ti yivanjulh ja Jesús ja Natanael ti nachey, pa yit'esha ti yasinôqui: —Naô ana nan yijô' ti Israel lhavo', ampa ca lhjôts'ôclônjayasha lhavaatsha.

⁴⁸ Pa lhechesh pa niy'ôs ja Natanael pa yit'esh: p —¿Ta yie' ti lhasvan ti lhantôfaacyish? Pa yicuulh ja Jesús pa yit'esh: —P'alha ti c'avan'ay ti lhôv'ôcji lhja higoyuc, ti jôjjeclay nitôn'ay ja Felipe.

⁴⁹ Yicuulh ja Natanael pa yit'esh: —Vanqu'eyjatsjan, avaatsha a Dios Lhaôs, avaatsha lhanvacleash napi Israel lhavos.

⁵⁰ Yicuulh yitsha ja Jesús pa yit'esh: —¿Tam'ey t'e ti jaspa niascacu ti janfacl'am nalhche ti c'avan'ôcji lhja higoyuc? Taj ti a'lheesh côque yaash jayu apee java matas ca c'avanjayintajesh.

⁵¹ Pa yit'esh shta ja Jesús: —Yijô' ti jayeetshelh'a, lhavanelh jayu na vôôs ca camamtajeey. Lhavanelh jayu shta ca natajeyshicham'in na Nivacle Lhô'sesh japi lhángeles ja Dios, shi' ca napectajchishamch'een.