Jonás 4 - Nivaclé Bible

Pa t'asuyi pa Jonás

¹ Vooy ja Jonás ninajulhjatey java lhfanishesh pa Dios, pa ujesh ti yapunch'e.

² Pa nôque lhjunash ti t'a'lhey pa Lhcaanvacle, pa yit'esh: —A'va, Lhcaanvacle, côque jayeesh'in ti vaclan jayu ti jôjjeclay jôv'e'in ja yicootsjat. Pa lhe'naa ti jentaj ti jaclôtajey tatsha ja Tarsis, lhayaash ti tsitôy'a ti a'lhech a Dios ti lhnôôy shi' ti lhatcavts'aclay, pa tanca avanjop'in ca asuya,*xm* ti yaashc'oya pa encheyash ti lhanfac pa vatclôyitsjayash pa nijooylhach'e ti lhanvaych'aclaj'avne.

³ Pa lhe'naa, Lhcaanvacle, jatants'aclanesh'a ca ayjatyijop na yimônlhajayash. Ya'shesh ti tajulheyam ca javaf ca niyamônlhaaa.

⁴ Taj ti pa Lhcaanvacle yit'esh ti yicuulh: —¿Tajulhey'am t'e ti lhech lhjunash ti nasuyinat?

⁵ Pa tayshi ja yitsaat ja Jonás pa t'ichay'e yiey ja lhum'ôcjinucjulh; lhech'e ti yisnatesh ja lhajpeclivat'esh java t'aclôôc pa yi'shi' ja lhajpec, pa tach'antajeshc'oya pa ca navclaneem ja yitsaat.

⁶ Pa lhechesh pa Dios Lhcaanvacle yivclanjatc'oya lhja ve'lha voytayuc ti yitôlhjatshijop ti yajulhjat'apee ja Jonás, vooy ja lhajpec pa yicapinat'e ja lhshatech jaspa yivômjateshemch'e pa nilhc'usiyasha. Vooy ja Jonás pa uj ti nishamesh lhja lhech voytayuc.

⁷ Taj ti, vooy ja nalhu ti nôcjuulh vooy pa Dios pa yanshi' pa tinvo' pa tuj tasham lhja voytayuc, vooy lhja lhech pa vafshaam.

⁸ Meelh na jumcuclaay ti vacha', vooy pa Dios pa yivclanjatjop ti tanu'ey pa lhaviim cusch'e' yiey na lhum'ôcjinuc. Vooy na jumcuclaay pa cuse'mey ja lhshatech ja Jonás, pa nichavayjatey ti nicavômjatsu'esh, pa yentaj ca nivaf. —Ya'sheshc'oya ti tajulhey ca javaf ca yamônlhaa —yit'eshlhavne.

⁹ Taj ti pa Dios yit'esh ti yicuulh: —¿Tajulhey'am pa lhech lhjunash ti nasuyiyan lhayaash ti vafshaam lhca voytayuc? —¡Jech, tajulhtajeyam! —yit'esh ti yicuulh ja Jonás—. ¡Tajulhey ca javafesh na yisuyi!

¹⁰ Pa lhechesh pa yit'esh pa Lhcaanvacle: —Avaatsha naacôvjiyan lhca voytayuc, pa naatôlhjatshi; ve'lha ja tulh ti tôôlh vooy jeelh tulh pa vafshaam. Taj ti pa lhatcavts'aclayesh.

¹¹ Taj ti pa ya'shesh ti tajulheyam ti jaycavts'aclayesh napi yiey na Nínive, na lhech uj yitsaat nan yie' japi yaash ti ciento veinte mil taôvclas ampa ca natmenesh lhavach shi' java acloj yaquisetes.