Jonás 3 - Nivaclé Bible

Papi Nínive lhavos tanôychatvatsham'in

¹ Pa Lhcaanvacle napu'esh ti yiyôjia ja Jonás, ti yit'esh:

² “Alhun ca meey ja uj yitsaat Nínive ca achayemch'e nava jayeetshem jayu.”

^3-4 Ja Jonás pa nitshaam ti yichey ja Nínive, jan t'ônash ti yiyôjiesha pa Lhcaanvacle. Ja Nínive yitsaat ujey ti yitshaam pa pu'jana java nalhus yicheshch'e ti t'ôtaay. Ja Jonás ti yitshaam ja yitsaat pa t'ôtaych'e ja ve'lha nalhu, pa yisitsenesh java yit'esh'in: “¡Nôqu'e' pava cuarenta nalhus pa chinvômjat jayu na Nínive!”

⁵ Japi tsitenas'e ja yitsaat, japi pitesch'e shi' japi tiqu'icsha'ne pa yuesha lhacôm'a pa Dios, pa yich'ayaneshvatsham'in pa vat'ayipcuyash, pa yuych'ejop ts'ivee java p'ajavsha'ne ti tanôclitesh ti ôôytejem.*xl*

⁶ Meelh ti yaya'esh ja lhanvacle ja Nínive pa nitsham'e vitsha ja lhc'o'vat pa niclanshi java isis t'uyjatshiyis lhanvaclevos, pa yuych'e java p'ajavsha'ne pa yie' cotsjaat.

⁷ Pa nijooylha, ja lhcaanvacle shi' japi lhcumjafas pa yitôyjata lhacôm'a japi yie' ja yitsaat ja yivaclhitesh lhayôjijat: “Ya aj na cum papu ca nattsaccun. Pa ya aj ca lhecha ca nicunjan shi' ca niyôjayan pava vôcôc shi' pava tashinshtas.

⁸ Pa vena lhjunasha pa uyelhch'esha'ne lhacôm'a pava p'ajavsha'ne ca ninôclitesh ti ôôytejem, pa nitôneyjop pa Dios lhacôm'a pa t'unaj ts'ivee. Pa ve'lha'a'e ts'ivee ca nivô'mesh pa niysa' lhjunash shi' pa lhcômclôniyash ti yisnatesh'in yamja nôqueesh.

⁹ Ameesh pa Dios ca shinvaych'aclajelh pa lhfanishjooj ca nivômjatesh pa lhavôôc, pa tan jayu ca shtavafelhsha'ne.”

¹⁰ Pa yi'vanesh pa Dios pava yisnatesh japi nivacle yiey ja Nínive ti vômeshjop pa niysa' lhjunash, pa yaychavalhsha ti ya aj ca nicôctiyan yiey jan lhjunash ti chaytajemjulh.