Jonás 2 - Nivaclé Bible

Pa t'alhjayash pa Jonás

¹ Pa lhechesh ja Jonás pa t'a'lhey pa Lhcaanvacle lh'Dios ti yich'e' tasham pa sajech,

² pa yit'esh: “Na yitanaputsjayash jayôn'ay'ajop, Lhcaanvacle, vooy avaatsha lhascuulh.*xe* Jatô'lhesh'e java apatosch'e pa vatvafi' ti jayôn'ay, vooy avaatsha lhaspeya'.*xf*

³ Ti lhtsu'jam ja apatoj na tovôc, ti lhasclôpjalhesh java yich ja yinôôt. Java usch'e na tovôc ti lhanchenyi ti naashyitapeeen.*xg*

⁴ Pa tsicha'vayjatey ti lhtsu'e ajuyish;*xh* pa tsaychavalhjatey ti tanca t'ôyi'sheey ca yi'van ja lhasnôyech ishjanjavat.

⁵ Nava yinôtes yamyijop'in lhacôm'a; pa yip'oyitapee na apatoj tovôc; nava taclôôc yi'shi' na yinôôt pa yiclôpjalh na yishatech.

⁶ Pa ts'iyalhp'oji yiey ja apatoj'ech'e;*xi* ¡pa tsicha'vayey ti ôyjôlhôyech'esh ti chiyp'oyic'oya! Taj ti avaatsha Lhcaanvacle, yi'Dios, lhtsilhjenesh pa vatvafi'.*xj*

⁷ Pa tsicha'vayey na yimônlhajayash ti tayyijop, pa tsitôyjat'ay avaatsha, Lhcaanvacle; na yalhjayash yam'ay'in ti yiey ja lhasnôyech ishjanjavat.

⁸ Papi voqu'e' java chiydiosiyan pa vômeshjop ti yivo'yeshch'esha'ne.

⁹ Taj ti yivaatsha, ti ts'ishamesh'a na yôjôj, pa jajut'ay jayu nava yicufayjates; pa c'ôfisjach'e'am jayu nava yifacjes ti jasnatesh'am.*xk* ¡Ave'lha, Lhcaanvacle, isjop ti lhatqu'ilhjey!”

¹⁰ Pa lhechesh pa Lhcaanvacle pa yiyôjia pa sajech lhtata ca natcuyesh'e ja Jonás ja cotsjaat t'un'e'.