Hechos 1 - Nivaclé Bible

Chinfac pa Espíritu Santo

¹ Yi'shi' na vatjutsa' yiqu'isjayanach, na yenach Teófilo, qu'isesh'e lhacôm'a cava lhfanishlhavach ja Jesús, shi' ja tôlhesh'e ti nich'a vanqu'eyjatsjan,*xa*

² yamjey ja nalhu ti vapecleychisham pa vôôs. Jôjjeclay ninapecley pa vôôs ti t'apayeshesha'ne japi t'eyjatsjanjas ti yiyôjiesha pa Espíritu Santo pava ca lhfanishalhavach jayu.

³ Pa vooy ti nôjeshch'e pa lhavafi pa nivacleeshjop ti tanôclitem papi lhech pa yicheshch'e pava cuarenta nalhus ti vatvanjiyinesh pa tanôôclhanitshe'ma pava matas ti yijô' ti mônlha, pa yasinôquiem pa lhanvacleyash pa Dios.

⁴ Jôjjeclay mônlhajop japi t'eyjatsjanjas ti yiyôjia ja Jesús ca lhech mônlheee cum yiey ja Jerusalén. Pa yit'esha: —Ach'anelhjop cum vooy ca namtajeyjop ca nifac ja Tata ca nijutajelh'ay yiey jan yônashelh'am tatsha.*xb*

⁵ Yijô' ca Juan vancanajayanesh pa yinôôt taj ti napu' pava nalhus amc'oya pa chinanajayanshelh jayu vitsha pa Espíritu Santo.,

Pa Jesús vapecsham pa vôôs

⁶ Papin tayelhva'ne ja Jesús pa niyôsesh: —Lhcaanvacle, ¿lhteesh ca iyitsjatesh tatsha papi Israel lhavos pa lhanvacleyash?

⁷ Pa yicuulh ja Jesús: —Tanca natô'yelha pa nalhu, ve'lhajop ja Tata ca nasnatajesh, lhayaash ti caajjop pa t'unaj ca nasnatesh;

⁸ vooy ca ninatajelh'ayshicham pa Espíritu Santo, pa nijutelh'ay pa vat'unaj pa meelhey ca atsasinôquielhc'oya na Jerusalén, shi' nan tc'a'ey ja Judea shi' ja Samaria, pa amjelhey lhac'o' lhacôm'a na cotsjaat.

⁹ Meelh ti tifeshch'e atesha cavôque ti yit'esh, pa yalhatajesh ti yi'van ts'ivee ti yicheychisham pa vôôs, pa nam lhpa ve'lha vôse' pa capeshch'e ja Jesús pa ninvan t'ôyish'e.*xe*

¹⁰ Jôjjeclay mônlheesh ti yovalhch'een ts'ivee ja Jesús pa yalhatajesh ti vatsavatshi lhcachivat ts'ivee papi napu' nivacle climsha'ne pava t'uyjatshiyis

¹¹ pa yit'esha ts'ivee papi lhech: —Galilea lhavos, ¿ta t'e lhayaash ti naant'atelheychisham na vôôs? Lhech ja Jesús jan tôlhelh'ajop ti yicheychisham ja vôôs, jô lhech tapecshicham jayu jan lhjunash na ti lhavanelh ti yitshaam ja vôôs.

Chit'acumeyshi pa Matías ca nanc'ayôjey pa Judas

¹² Pa lhechesh pa tapecley ts'ivee ja Jerusalén tôlh'e lhja utiyuc yi'apee pa Olivochat: pa nuyey ts'ivee pa nitojach'e nôyish yiey pan t'ônashesh pa vatyôjijatjop pa nalhu ti chit'ichayshi.

¹³ Meelh ti yamjam ts'ivee pa yitsaat pa yicheychisham pa tojquisham lhtôvash pa jpôyich pan yie'in. Japi lhech ja Pedro, ja Jacobo, ja Juan, ja Andrés, ja Felipe, ja Tomás, ja Bartolomé, ja Mateo, ja Jacobo, lhaôs pa Alfeo, ja Simón Celote, shi' ja Judas, lhch'inish ja Jacobo.*xf*

¹⁴ Japi lhech lhacôm'a ti ve'lheelhsham'in pa t'alhjayashelh japi lhch'injavot ja Jesús, nôquee lhja María lhamimi ja Jesús shi' jap'elh ôcjeclôy.

¹⁵ Pava lhech nalhus vatsavatshi lhcaavju ja Pedro papi lhavelhavot yameyshi ciento veinte papi lhech, pa yit'esha:

¹⁶ “Yivelhavot, suyeshi jum ca nofisch'e cava lhclishayem pa Espíritu Santo pa David ti chiyi'sesh'e jan chiyit'eshem ca Judas, can yijoeyc'oya papi yôcfa' ja Jesús.

¹⁷ Cô lhech yi'tajôtshi casvaatsha, yi'tajshi shta na cascumjayash.

¹⁸ Taj ti yich lhavaatsha pa yichenjulh pa cotsjaat pava pesoc tô'lha pa lhsasch'e; pa nijooylha ti tac'oychisham pa yitsemajshicham pa lhshatech pa yitsassham pa nachfach'ee pava lhavaclay.

¹⁹ Meelh ti yitô'ya papi yiey ja Jerusalén pa lhqueyesh pa lhech cotsjaat Acéldama, côque nôque yich'e' ‘Lhjoot pava vatvoyey.’*xg*

²⁰ Lhayaash ti lhech t'ônashesh na vatqu'isjayanach yi'shi' nava Salmos: ‘Vapecleyjop ti ampapu ca nôv'ôcji pa lhajpôyich, pa ama papu ca nôv'ôcji pa lhech.’ Pa yit'esha shta: ‘Pa vooy pa'elh nancayôjesh na lhcumjayash.’ *xh* ,

²¹ “Caaj napi yijôtshi casvaatsha nivacle napi shtatônôycheelhshane'en java nalhus ti jôjjeclay mônlhajôtshi ja Lhcaanvacle Jesús,

²² jan t'aplhuqu'e ti vancanajayan ca Juan pa yamjey ti yicheychisham pa vôôs. Suyeshi ca ninacheshjooy ca nitônôclitesh ca nanfac pa lhneetshamjayash ja Jesús.”*xj* ,

²³ Lhechesh pa t'apayeyshi japi napu' japi lhech: ja José, lhanquey shta Barsabás, lhey shta Justo shi' ja Matías.

²⁴ Pa nôque yit'esh ti t'aalh ts'ivee: “Lhcaanvacle, avaatsha lhantôfa'clesha'ne pava lhcachic lhacôm'a, anôôclhanitelhayam pa yie' napuque napu' napi lhatcumeyshi'atam

²⁵ pa jaspa natcum'e na lhcumjayash ca eyjatsjanach Judas ti yistanjat'in pa lhsasch'e, can yichey pan yie' ti chiyclôyit'e.”

²⁶ Lhechesh pa vatvoyjatesh'ôcji ts'ivee, ti lhech ja Matías, jan yijutlhatsham tatsha ts'ivee japi once vat'eyjatsjanjas.