Hebreos 1 - Nivaclé Bible

P'alha ti yasinôqui pa Dios pa tôlh'ejop pa Lhaôs

¹ Lhapesh aclôjesh ti yasinôquiem pa Dios papi jatô'lhelhsham. Nalhjunash'in pava ti yasinôqui'eshem shta papi chiytôyjata pava ti vaclan.

² Pa vooy nôqueesh nava yôjesh'esha'ne nalhus pa yasinôquijoom tôlh'ejop ja Lhaôs. Yivclanjat pa Dios pava lhnalhusesh na cotsjaat tôlh'ejop jô lhech Lhaôs. Pa yijutem jô lhech pava vataasclanjas.

³ Jô lhech yinôôclhanita pa lhôclôjqueyash pa Dios. Pa nôclit shta pa lhjunash pa Dios. Yiyitsjayanesh lhacôm'a java matas tôlh'ejop pa t'unaj pava lhclishay. Ti yivaclhiteshjoom ti yivômjach'e pava cassasch'e, pa chiyisclan'esha'ne pa lhc'ovat pa Dios yiey lhfayish yi'shi' pa vôôs.

Pa Dios Lhaôs yaashchishamc'oya papi ángeles

⁴ P'alha ti yamey ja Dios Lhaôs ti yaashchishamc'oya papi ángeles. Vooy ja lhey, jan yijutem pa Dios, yash'apee shta pava lheyis papi ángeles.

⁵ Lhayaash pa Dios nive'lhaaesh ca niteetsha pa ángel: “Alhech avaatsha na Yaôs; ti tsicavat'aj'ash nôqueesh.” Ninteetshem shta pa ángel: “Yivaatsha tataesh jayu pa lhech, pa lhech lhô'sayish jayu.”*xb* *xc*

⁶ Meelh ca nachajtaja na cotsjaat ja yilhavaycun Lhaôs, pa niteetsha: “Lhacôm'a papi lh'ángeles pa Dios ca nôclôj.”*xd*

⁷ Chayema pa Dios papi ángeles pa yit'esh: “Yijôney papi lh'ángeles jan lhjunash java lhavimis. Vooy papi lhcavos yijôney pava itôs t'ach'acjes.”*xe*

⁸ Taj ti chayema ja Lhaôs, pa yit'esh: “Dios, na ac'ovat tanca nitay, tanvacliyashesh pa yivo'yeshch'e. ,,,

⁹ P'alha ti lhen pa yivo'yeshch'e pa lhcônitshi pa niysa'. Pa lhe'naa pa Dios, ti vo'ayshi avaatsha ti natsôt'ajesh Dios. Pa yash'am na ashamitjayashc'oya napi a'yavot.”*xf*

¹⁰ Yit'esh shita: “Avaatsha, Lhcaanvacle, ti nich'a ti lhiyitsjat na cotsjaat; avaatsha lhasnatesh pa vôôs.

¹¹ Taj ti nava lhech ti vôôm jayu, vooy avaatsha pa yinjôt jayu ti amônlha. Nava lhech lhacôm'a ti yic'utsjan jayu jan lhjunash pava vatcôqueclitôy ti yic'utsjan.

¹² ¡Pa lhnachajvatsham jayu jan lhjunash lhpa vat'uyjatshi, lhancayôjatey jayu jan lhjunash papu ti nicôyôjatlhatay pa t'uyjatshiy! Taj ti a'lhech avaatsha pa amônlhajayash tan jayu ca ninôj.*xg*

¹³ Nive'lhaaesh ca niteetsha pa Dios papi ángeles: “Vee'sha'ne na yifayishey, pa amja ca jantajey afoc napi niac'utsfasa.”*xh*

¹⁴ Lhacôm'a papi ángeles ti vatsôc'ôclit lhshayc'uesh ti t'acumem'in pa Dios. Pa chincheney ca nefen papi ca chinalhjentajsha'ne. ,