Génesis 50 - Nivaclé Bible

¹ Lhechesh pa yechepjalh pa Josê pa lhavu'vat pa lhtata pa yifin, pa yip'in shta.

² Lhechesh pa yiyôjiesha papi vatcafetatsiy lhavos ca nip'aclanshi pa lhavu'vat ca lhtata pa vatfetaas ninclatem pa, lhey balsamo. Pa lhech lhfanishesh papi lhech.

³ Yicheshch'e pava cuarenta nalhus ti yip'aclanshi pa balsamo, lhayaash ti lhech t'ajôôj pava nalhus ti suyeshi. Papi Egipto lhavos yicheshch'e pava setenta nalhus ti yitacshin'in.

⁴ Ti nôjeshch'e pava nalhus ti yitacshin'in lhechesh pa tasinôy'e pa Josê yiey pa lhajpôyich pa faraón, pa yit'esha: —Ca atsentajelh avaatsheelh pa istaa ca anfacle'lhemyam ja faraón

⁵ ti jôjjeclay mônlha ca tata, ti yit'eshyam ca yijôayam ca jatish'ec'oya yiey pa nivlhech pan apis ti yôyinlhatam yiey ja cotsjaat Canaán.*xt* Jayaalhsha ca nivashanyam ca jôqueelh ca jatishc'oya ca tata. Ca javaclhitajesh pa jatpec jayu.

⁶ Pa yicuulh pa faraón: —Môôj ca atishc'oya ca atata yiey pan t'ônash'am ti t'a'lhesh'a.

⁷ Pa Josê yichesh pa tishc'oya pa lhtata. Pa tanaôycheelh lhacôm'a papi tanefenelh lhcaanvaclesesh yiey pa lhajpôyich pa faraón shi' papi yiey pa Egipto.

⁸ Pa t'ajôôjam pa Jacob shi' pa Josê shi' papi lhcheclavot. Yiey pa cotsjaat Gosên tsi'sha papi taôvclas mônlhee shi' pava lhclôy.

⁹ Shi' papi nivacle yi'shi' pava caletas shi' papi cuvôyuyjas tanôôycheelh pa Josê. Nôque lhjunash acloj papi nivacle.

¹⁰ C'oya ti yamey pa Goren-ha-atad, yiey lhum'ôcjinucjulh pa Jordán, pa tc'aeshvane pa uj lhtacshinjayash, pa uj ti yisclaneshi. Lhech'e ti yicheshch'e pava napu'yama nalhus ti yitacshinch'e pa Josê ca lhtata.

¹¹ C'oya ti yi'van papi tsitenas'e cananeos ti yisclaneshi pa lhtacshinjayash, pa yit'esh: “Napi Egipto lhavos uj ti yisclaneshi ca tishc'oya.” Lhe'naa ti lhqueyesh pa lhech'e Lhtacshinjavat napi Egipto lhavos, pa lhech lhumôcjinucjulh pa Jordán.

¹² Papi lhcles pa Jacob yisnatshem lhacôm'a pava t'aalhsha pa lhtata.

¹³ Pa yicha'jey pa cotsjaat Canaán pa tish'ec'oya pa nivalhech yiey pa lhcac'ovat Macpela, pan apis ti tcashayesha pa Abraham pa Efrón hetita ca lhnivalhchechat'esh pa t'ajôôjam. Pa lhech vatcac'ovat yi'shi' pa nivalhech yijuulh lhum'ôcjinucjulh pa Mamre.*xu*

¹⁴ Ti yivaclhitesh ti tishc'oya pa lhtata pa vapecley pa Egipto pa Josê shi' papi lhcheclavot shi' lhacôm'a papi tanôôycheelh.

Pava yôjesh'esha'ne lhnalhus pa Josê

¹⁵ Ti vaf pa Jacob pa yaychavalhey papi lhcheclavot pa Josê: “Nôqueesh vanutjoom jayu ja Josê, pa yôfisjach'ejoom jayu lhacôm'a cava niysisa ti shtasnatshem.”

¹⁶ Lhechesh pa tayôjijanesh ca chinanfacleem: “Ti jôjjeclay ninvaf ca atata niyôjieshelhyi

¹⁷ ca jayeetshelh'a: ‘Istaa ca avômjatemch'e pa lhsasch'e napi acheclavot, lhayaash ti niysa' ca lhfanish'ash.’ Lhe'naa ti jatants'aclanelh'a ca avômjatelhch'eyam pava niysisa, lhayaash ti lhcavosjooj pa lh'Dios ca atata.” Jôjjeclay ninameshch'e papi chiyôjisha pava nifac, ti yip'in pa Josê.

¹⁸ Lhechesh pa namey shta papi lhcheclavot; pa tanjuyshichamch'e yamja cotsjaat, pa yit'esha: —Nôqueesh lhantsôt'ajelhyish. Pa acavoselhyish.

¹⁹ Taj ti yit'esha pa Josê: —Ya aja ca anjova'yelh'in. Niyit'esh ca tatvayjatjulh pa Dios.

²⁰ Avaatsheelh lhaychavalhelheyam ti lhasnatshelhyam pa niysa'. Taj pa Dios nôque niysa' nivaych'aclajey pa is nan shtavan nôqueesh, ca chinalhjenesh pa lhamônlhajayash papi acloj nivacle.

²¹ Pa nôque lhjunash ya aj ca anjova'yelh'in. Jajutelh'ay jayu pa ôclelh avaatsheelh shi' napi acleselh. Nôque lhjunash yicanoyan pa Josê, pa nits'opeesh ti tasinôyc'oya.

Ti vaf pa Josê

²² Pa Josê shi' papi t'ajôj'esha'ne pa lhtata mônlhee pa Egipto. Pa Josê ciento diez pava lhnincôpes ti mônlha,

²³ pa yi'van papi lhantôclishjes pa Maquir, lhavaatsha lhaôs pa Manasês.

²⁴ Ve'lha pa nalhu ti yit'esha pa Josê papi lhcheclavot: —“Tiqu'in pa amc'oya pa javaf, taj pa Dios namelh'ay jayu ca nefenelh pa nayjatelh'e jayu nôque cotsjaat. Pa nacha'jelhey jayu ja cotsjaat ja nifaclem ca Abraham, ca Isaac shi' ca Jacob.”

²⁵ Pa Josê yiyôjiesha jô papi lhcles pa Israel ca yijôa, pa yit'esha: “Yijô' ti namelh'ay jayu pa Dios ca nefenelh. Ca navclantaj côque, avaatsheelh tajulhey ca acha'jelh na yivu'vat yiey na nôque.”*xv*

²⁶ Pa Josê vaf ti ciento diez pava lhnincôpes yiey pa Egipto. Pa chiyp'aclanshi shta pa vatfetaas ninclatem pa lhey balsamo pa yanch'e lhpa lhashiy papu ti vaf.