Ester 9 - Nivaclé Bible

Yaash papi judíos

¹ Pa nalhu trece, pa jive'cla doce, lhey Adar, lhech'e ti yinôôclhanitajop ca nôfisjatemch'e pa lhayôjijat pa lhcaanvacle, shi' shta pa nalhu ti vatjumtaa papi nilhc'utsfasa papi judíos ca nash'apee; taj ti pa vena lhjunashch'e ti vaclan, lhayaash papi judíos pa lhech ti yash'apee ts'ivee.

² Pan t'ajô'jesh pava chiyie' ts'ivee yi'shi' pa lhcaanvacle Asuero, papi judíos pa tayvane ts'ivee yiey pava yi'shi' ts'ivee yitsates, ca jaspa nit'eclet'a papi yentaj ca lhcamclôshitaseesh. Ampapu ca natjuyeelhvatjulh ts'ivee, lhayaash ti nijovayjulh ca nash'apee lhacôm'a papi lhtachifas.

³ Lhacôm'a papi lhcaanvacleseshjop pava chiyie' ts'ivee, papi lhanvaclesesh pava lhcootsjativshay shi' pava chiyie' ts'ivee, shi' papi chiyashjatjop pa vatvacleyash, ti yefenesha papi judíos ti nijovayeshjulh ts'ivee pa Mardoqueo,

⁴ lhayaash pa lhech ti chiyashjatesh ti chinvacleyanesh pa lhcaanvacle lhajpôyich, ti yaash pa lhnôclôjqueyash ti nash'e pava chiyie' ts'ivee, pa yinjôt pa nalhu ti yaash pa t'unaj.

⁵ Vooy pava lhclesatas papi judíos pa yiclônesha'ne papi nilhc'utsfasa pa tifeyshi lhacôm'a pa yisnatesh ts'ivee pa lhfanishlhavach ti yen.

⁶ Pa ve'lheey pa yitsaat Susa ti chiyclônsha'ne papi quinientos nivacle;

⁷ pa yiclôn ts'ivee shta pa Parsandata, pa Dalfón, pa Aspata,

⁸ pa Porata, pa Adalía, pa Aridata,

⁹ pa Parmasta, pa Arisai, pa Aridai shi' pa Vaizata,

¹⁰ papi lhech napu'nôjesh lhcles pa Amán, nilhc'utsfaa papi judíos; taj ti pa ninchajc'oya pava yi'van.

¹¹ Pa lhech nalhu, ti yaya'esh pa lhcaanvacle pa t'ajôôj papi vafsha'ne ti yi'taj'e pa yitsaat Susa,

¹² pa yit'esha lhpa lhcaanvacche Ester: —Japi judíos apis ti yiclônsha'ne papi quinientos nivacle shi' papi napu'nôjesh lhcles ca Amán yiey na yitsaat Susa. ¿She peelh lhanfanash jayu jav'elh chiyie' ts'ivee na yinvacleyash? ¡Anfacyam peelh ti lhen pa jajut'ay jayu!

¹³ Lhpa Ester pa yicuulh: —Ca nitajulhtajemey na Yinvacle, ca nivashanem japi judíos yiey na Susa lhum'ashi ca lhech lhfanisheeshjop jan t'ônash na vatyôjijat, ca chinôcfeesh'echisham lhja taychishi yeclô' java lhavuuvtes capi napu'nôjesh lhcles ca Amán.

¹⁴ Pa lhcaanvacle pa tayôjijanesh ti lhech lhanfanash. Pa vatyôjijat pa chiypeya' yiey pa Susa, shi' pava lhavuuvtes papi napu'nôjesh lhcles pa Amán ti chiyôcfeeshchishamch'e.

¹⁵ Papi judíos papin yie' pa Susa pa yachajeyjop ti tayvane pa nalhu catorce pa jive'cla Adar, pa lhech yiclôn'esha'ne shta pap'elh trescientos nivacle; taj ti pa ninchajc'oya pava yi'van.

^16-17 Papi judíos papin yie' ts'ivee pav'elh yitsates pa tayvane ts'ivee pa nalhu trece pa lhech jive'cla, ti vanijôtjatesh pa lhamônlhajayash shi' ti tifch'een papi nilhc'utsfasa; pa yiclônsha'ne papi setenta y cinco mil taj ti pa ninchajc'oya pava yi'van. Pa nalhu catorce pa t'ichayeshjop ts'ivee pa yivclanjat pa lhôc ts'ivee shi' pa lhshamitjayash.

¹⁸ Pan lhjunash papi judíos yiey pa Susa pa vatvelhanesham pava nalhus trece shi' pa catorce, pa t'ichaych'e ts'ivee pa nalhu quince, pa yivclanjat shta pa lhôc ts'ivee shi' pa lhshamitjayash.

¹⁹ Taj ti papi judíos ninijôt'as pava lhavtsates shi' ti niuseey amjop pa vatashclôfech, pa yivclanjatshi pa nalhu catorce pa jive'cla Adar pa lhshamitjayash shi' pa lhc'usiyash, pa caaj pap'elh ti vatlhiseelhsha'ne.

Pa vatc'usiyash lhey Purim

²⁰ Pa Mardoqueo pa yi'sesh'e cavôque vaclan, pa yichench'e pava lhqu'isjayanjas papi judíos papin tsitenas yiey pa lhanvacleyash pa Asuero, papi shalhee'ma shi' papi tosey,

²¹ pa tayôjijanesh ca yinjôt'a pa nincôôp ca chinavclanjatshiin pa nalhu catorce shi' pa quince pa jive'cla Adar

²² pan lhjunash pava lhnalhusesh papi judíos ti tif'e' ts'ivee papi nilhc'utsfasa, pa lhjunashesh pa lhech jive'cla pa lhtacshinjayash shi' ti yônjayanvatsham'in ti aôytejem, pa nicôyôjatey ts'ivee pa lhshamitjayash shi' pa lhc'usiyash. Pava lhech nalhus iseemjop ti yivclanjat pa vatôc shi' pa vatshamitjayash pa vatlhiseelhsha'ne pap'elh shi' ti tis ts'ivee papi ts'aclaaysha'ne.

²³ Papi judíos pa ninvô'meshch'een ti yifayjanesh côque ti chiyivclanjat shi' ti yi'sesh'e pa Mardoqueo.

²⁴ Lhayaash pa Amán, nilhc'utsfaa papi judíos, yaychavalhtajey ca nitifch'een ti yu'tajeshjop*xf* ca niclônsha'ne shi' ca nitif'e;

²⁵ taj ti meelh lhpa Ester ti yicheyshijop pa lhcaanvacle, pa lhech ti tayôjijanesh ti chiyi'sesh'e pa lhav'ojiyash pa Amán ti yaychavalhtajeyjop papi judíos pa lhech lhavaatsha ti vapecla. Nôque lhjunash pa Amán shi' papi lhcles ti chiyôcfeeshchishamch'e yiey lhpa taychishi yeclô'.

²⁶ Pa lhe'naa pava lhech nalhus ti lhanqueyesh Purim (lhech taj'e ca pur, nôque yich'e' chiyu'eshjop). Nôque lhjunash, pa t'ônashesh pa lhqu'isjayanach pa Mardoqueo shi' pavan yi'van shi' pava lhjunasheshch'e ts'ivee,

²⁷ papi judíos vanijôtjatesh pava yifayjanesh ts'ivee t'ajuya shta papi lhcles, t'ajuya shta lhacôm'a papi tanu'jam ti judíosesh: pa yivclanjat'in pant'ajô'jesh pava lhnincôpes pa nin'amiyan ts'ivee pava lhech nalhus ti yinôôclhaniteyjop, pan lhjunash ti tanyôjijayesh ti chiyjuteem;

²⁸ pava lhech nalhus yaychavalheshch'een shi' ti yivclanjatem'in papi lhcles shi' papi nijôôylhach'e yiey pa lhpôc'ôcsham pava yiey ts'ivee shi' pava yitsates, ca jaspa tanca nivômjatshi ti yaychavalheshch'e papi judíos shi' papi lhcles.

²⁹ Lhpa lhcaanvacche Ester, lhôse pa Abihail, shi' pa Mardoqueo pa lhech judío, pa yiisshem'e pa nijooylhach'e lhqu'isjayanach ti yinôôclhanitsha pa vatc'usiyashesh pa Purim ti yijôney pa vatjutsa'.

³⁰ Pa yicheney ts'ivee lhacôm'a papi judíos yiey ts'ivee pava ciento veintisiete yi'shi' pa lhanvacleyash pa Asuero, pava lhech ya'clishay c'usch'esha'ne shi' ti yijôqu'esha'ne.

³¹ Pa yiyôjiesha ca navclanjatjop pa vatc'usiyashesh pa Purim pan yie' ti yinôôclhanitey, pan t'ônashesh ti tayôjijanesh pa Mardoqueo shi' lhpa lhcaanvacche Ester ti t'ajuya ts'ivee shi' papi lhcles. Pava lhech nalhus pa napshinesh'e ts'ivee pava lhayôjijatesjop t'ajuya ti vat'ayipcuyan shi' pa t'ôpjayaash ts'ivee,

³² pa lhech tayôjijanesh shta lhpa Ester pava tayôjijaneshjop ca chinasnatesh ca nijôneshch'e ti yivclanjat'in pa Purim. Lhacôm'a cavôque ti chiyi'sesh'e pa vatqu'isjayanach.