Ester 8 - Nivaclé Bible

Pa vatyôjijat ti chiyefenesha papi judíos

¹ Pa lhech nalhu, pa lhcaanvacle Asuero pa tisesh lhpa lhcaanvacche Ester pa lhajpôyich pa Amán, nilhc'utsfaa papi judíos, vooy pa Mardoqueo pa yichey t'ajuyish pa lhcaanvacle, lhayaash lhpa Ester ti yit'eshema ti lhcavtsujesh pa Mardoqueo.

² Pa lhechesh pa lhcaanvacle pa niclanshi lhpa lhpascheshiy ti yachajc'oya pa Amán pa yijutem pa Mardoqueo. Vooy lhpa Ester, pa tô'lha ti yetônesh ti yiclôvalhchiyinesh lhacôm'a pava lhavanjas pa Amán.

³ Pa nijooylhach'e lhpa Ester ti tasinôyelh shta pa lhcaanvacle, pa vanu'jane pa nachfach'ee pava lht'ec, pa vatants'aclansha ca nivômjatey pa ojey lhayôjijat pa Amán shi' ca ya aj ca chinvaclhitesh pa ca chinôyinch'ejop ca chinatjuyeshjulh papi judíos.

⁴ Pa lhcaanvacle pa yôclôjjulh lhpa Ester pa lhavcôjat clesanilh cojiyaj. Lhpa lhech pa nitshaam pa vatsavat'e t'ajuyish pa lhech

⁵ pa yit'esha: —Ca najulhjatajey na Yinvacle, shi' ca nit'ujantajesh nava jayaalhsha ti yivo'yeshch'e, shi' ca yijô'tajeem na Yinvacle ti tsen shi' ca nanchavaaytajey pa lhencheyashyish, pa chini'sesh'ejop pa vatyôjijat ca chinvômjatey pava lhqu'isjayanjasesh ca Amán ti yichench'e pa lhayôjijat'esh ca chintifch'een japi judíos lhacôm'a java chiyie' ts'ivee.

⁶ ¿She pa is'ejopyam ca nasclôyeshyivach na tavijatay ti yi'shi' japi yichifas shi' ca chintifch'een japi tsitsôt'ajesh yajôôjam?

⁷ Pa lhechesh pa lhcaanvacle Asuero pa yicu'lhesh lhpa lhcaanvacche Ester shi' pa Mardoqueo, pa lhech judío, pa yit'esh: —Yivaatsha apis ti jajutem lha Ester ja lhajpôyich ca Amán, cô lhech chiyôcfeesh'echisham lhja taychishi yeclô' tôlh'ejop ti vatjuyjatjulh pa lhamônlhajayash japi judíos.

⁸ Nôqueesh jafaycuteshelha ti chiyi'sesh'e na yey nava ya'shesh ti chiyajulhjate'mey japi judíos. ¡Pa iisshelh'apee ts'ivee pava vatqu'isjayanjas lhja lhcaanvacle lhcaniscôte! (Pa ve'lha ti yi'sesh'e pa lhey pa lhcaanvacle shi' ti yi'sesh'apee lhpa yitsôt'ajesh lhcaniscôte, pa sasjop ca chinvômjatey.)

⁹ Papi vanqu'iseem pa lhcaanvacle pa chitôneyjop tatsha. Pa lhech nalhu veintitres pa jive'cla pu'janaeyshi, ja't'ajesha lhech pa Siván, pa lhacôm'a pava tayôjijaneshjop pa Mardoqueo pa chiyisshem'e papi judíos, papi lhanvacleseshjop pava cotsjativshay shi' pava chiyie' ts'ivee nôquee shta papi lhcaanvaclesesh pava ciento veintisiete chiyie' ts'ivee ti tôlheshey pa India pa yamjey pa Etiopía, yi'shi' pava lhclishay shi' pava yitsôt'ajesh chiyi'sesh'ejop pava chiyie' ts'ivee. Shi' shta papi judíos pa chiyiisshem'e pa lhcliish shi' pava yitsôt'ajesh lhqu'isjayanjas.

¹⁰ Pava vatqu'isjayanjas chiyi'sesh'e pa lhey pa lhcaanvacle Asuero, ti nôjeshch'e ti chiyi'sesh'apee lhpa lhcaniscôte pa lhcaanvacle, pa yichajchiyineshch'e papi yi'apee pava cuvôyu pôtses, lhclôy pa lhcaanvacle.

¹¹ Pava lhech yicu'lhesh pa lhcaanvacle papi judíos, pan yie' pava yitsates, ti yie' ts'ivee pa tayeshvane ti yivayjatjulh pa lhamônlhajayash, shi' ti yiclônsha'ne ti tifeyshi shi' ti yichajc'oya ts'ivee pava yi'van papi nivacle tclucheych'e pan yie' papi lhtachifas ca nit'ecletaja, ti tanca niyôytanesh papi ôcjeclôy pa nilhecha papi taôvclas.

¹² Lhacôm'a cavôque ca lhech lhfanisheesh pa nalhu pant'ajô'jesh pava chiyie' ts'ivee ti yi'shi' pa lhcaanvacle Asuero; pa nalhu ti chinôôclhanitejop pa trece pa jive'cla doce, ja't'ajesha lhech pa jive'cla Adar.

¹³ Pa chiyi'sesh'ejop pa vatyôjijat pa chiypeya' lhacôm'a ti vatyôjijat'esh ti chiytôyjata lhacôm'a papi vanichifan shi' pava yie' ts'ivee, secl'esh papi judíos ca nitaasclaneysha'ne pa lhech nalhu ca jaspa nit'aachayjulh papi nilhc'utsfasa.

¹⁴ Pa vatyôjijat'em pa lhcaanvacle pa chiychajch'e tacha ti chiyi'apeejop pava lhclôy cuvôyu, pa lhech vatyôjijat pa chiyipejeyinesh shta pa yitsaat Susa.

¹⁵ Pa Mardoqueo tôlh'ôcji pa lhajpôyich pa lhcaanvacle pa yuych'e lhpa vat'uyjatshiy lhanvaclevoque ti vanisch'e pa vanacshenelh pa yaca' pa clim, shi' pa c'atsajshi lhc'ôcleesh pa clesanilh cojiyaj shi' pa lhclô'vat clasim ti yacutinelhesh. Pa lhacôm'a pa yitsaat Susa pa tônesh'in ts'ivee pa lhshamitjayash,

¹⁶ vooy papi judíos pa vats'ô'e ti c'usemvatsham'in, pa nishamesh shi' ti tanôclôjesh ts'ivee.

¹⁷ Pa lhacôm'a pava yie' ts'ivee yiey pava yitsates yiey pan nash'e pa lhayôjijat pa lhcaanvacle, vooy papi judíos pa yic'usinatvatsham'in shi' ti nishamvatsham'in, pa yivclanjat pa lhôc ts'ivee shi' pa lhc'usiyash. Jô'tajesh papi yi'shi' nivacle pa lhavtsateyish pa acloj papi tanu'jam ti judíosesh, lhayaash ti nijovayjulh papi judíos ti yash'apee ts'ivee.