Ester 7 - Nivaclé Bible

Pa Amán tanivalhchayesh pa lhavafi

¹ Pa lhcaanvacle shi' pa Amán pa yiche'lhey pa vatôc,

² Shi' shta ti napu'eyshi pa nalhu ti yit'eshem pa lhcaanvacle lhpa Ester ti caaj pa vatôc: —¡A'lheshyi pa lhen, pa jajut'am jayu, lha'ma ca aalhtajeshyi pa pacham na yinvacleyash!

³ Lhpa Ester pa yicuulh: —Ca nicaajtajem na Yinvacle pa lhencheyashyish, shi' ca najulhjatajey na ve'lha ti jen ti jayaalhsha na Yinvacle ca nasmônlhanitaj shi' japi yichifas;

⁴ lhayaash japi yichifas nan yijunash shta ti chiycashaayishelh ca jaspa chinastifelhch'een lhacôm'a. Nanlhjunash ca chincashaaytajelhyish ti yalhancumteseshelh, pa tan pa ca yônasheesh, lhayaash japi niyc'utsfasa tanca nitô'lhemsham ca natmenesha pava ca lhfanisheesh na Yinvacle.

⁵ Pa lhechesh pa Asuero pa niy'ôsesh: —¿She papi lhech pa ta yie' papi yaychavalhey ti yisnatesh pava nôque lhjunash?

⁶ —¡Na niyc'utsfaa ti vatjuyjatjulh lhech nôque ojey Amán! —yit'esh ti yachajeshjulh lhpa Ester. C'oya ti yipe'yeesh côque, pa Amán pa ninconitjat pa t'ajovayi ti yie' t'ajuyish pa lhcaanvacle shi' lhpa lhcaanvacche.

⁷ Pa Asuero ti nitshaam pa yamqu'een pa lhavôôc, pa tay'ôcji pa lhtôvash pan yi'taj'ejop pa chiyivclanjatem vatôc, pa yichey pa lhcôjiyanjavat yiey pa lhajpôyich. Taj ti pa Amán, ti yitô'ya pa lhcaanvacle ti yaychavalha ti tanivalhchayesh pa lhavafi, pa mônlha'ôcji pa lhtôvash ti vatants'aclantaja lhpa lhcaanvacche Ester ca nalhjenesh pa lhamônlhajayash.

^8-9 Meelh pa lhcaanvacle ti tôlhey pa lhcôvjiyanjavat pa yich'ôcji shta pa lhtôvash pan yie' pa vatôc, pa yi'van pa Amán ti yujane t'acjatsuy lhavôj'e pa vatc'ovaat vayuyshi yiey pan yijo'een lhpa Ester, pa tônesh'in ti yit'esh: —¿Tam'ey ti lhentaj shta ti lhanvacchematan lha lhcaanvacche ti yiey yijuyish shi' ti yi'ôcji na yijpôyich? Pa nivinshaa pa lhcaanvacle ti nifacch'e pava lhclishayesh, pa caaj papi lhcavosesh ti yiclôvalh'in pa yip'o'e lhtaco pa Amán. Pa ve'lha papi lhech pa lhey Harbona, pa yit'esh: —Yiey ja lhajpôyich na Amán ti yivaclhitesh lhja ve'lha taychishi yeclô', ti veintidos metros ja t'aplhuquisham, ti tayôjijanesh ti yisnateshjop ja Mardoqueo, jô lhech nivacle isis java lhfacjesem na Yinvacle. —¡Tajulhey ca ôcfeeshelh'e jô lhech! —yit'esh ti yiyôjiesha pa lhcaanvacle.

¹⁰ Pa nôque lhjunash pa Amán ti chiyôcfeesh'echisham lhavaatsha lhpa taychishi yeclô' ti yisnatajeshjop pa Mardoqueo. Côque pa chiyvômjateshemch'e pa lhavôôc pa lhcaanvacle.