Ester 6 - Nivaclé Bible

Yaash pa Mardoqueo

¹ Pa lhech tulh, pa lhcaanvacle sasjop ca nimô', tôlh'ejop ti tayôjijanesh ti chinchajey pa vatqu'isjayanach ti chiyi'sesh'e lhacôm'a pava vaclanshi papi lhtachifas, pa jaspa chinetônch'esha'ne.

² Pa yivanshi ti chiyasinôqui pa Mardoqueo ti chitafjuna ti yisnatesh pa Bigtán shi' pa Teres, lhanvaclesesh papi lhc'afoquelhay pa lhcaanvacle, ca jaspa niclôn ts'ivee pa lhcaanvacle Asuero.*xe*

³ Pa lhechesh pa lhcaanvacle pa niy'ôsesh: —¿She pa chivancashayanesh shi' papi tach'anjayesh ti chitôlheshajop ja Mardoqueo côque lhanfanash? —Ampa ca nitôôlhshi —yit'esh ti yicuulh papi lhcumjafas.

⁴ Pa lhech t'aplhuqu'e ti yich'ôcji pa Amán yiey pa clayôych'e pava lhtôvjasesh pava yitsôt'ajesh ti lhajpôyjeyesh pa lhcaanvacle, ca jaspa nit'aalhsha pa Mardoqueo ca chinôcfa' lhcôyish yiey lhpa taycheshiy yeclô' ti apis ti tayôjijanesh. —¿She papi t'ôtaych'e na clayôych'e? —niyôsesh pa lhcaanvacle.

⁵ —Lhech na Amán —yit'esh ti yicuulh papi lhcumjafas. —¡Ayôjielha ca nôque ninach'e! —pa yit'esh ti yiyôjia.

⁶ Pa yich'ôcji pa Amán, vooy pa lhcaanvacle pa niy'ôs: —¿Ta ca lhanfanasha pa nivacle pan yen na lhcaanvacle ti yôclôj? Pa yit'eshlhavne lhavaatsha pa Amán: ¿She papuque yen jayu na lhcaanvacle ti yôclôj vooy yivaatsha?”

⁷ Pa lhech yit'esh ti yicuulh: —Pa lhech nivacle

⁸ isjop jayu ca nanchajey lhavaatsha lhpa t'uyjatshiy jan vôôtjôneshey na Yinvacle, shi' pa cuvôyu ti yi'apee na Yinvacle, ti yic'ôclechi pa lhanvaclevo.

⁹ Lhpa t'uyjatshiy shi' pa cuvôyu ca nijutajey jayu papi ve'lha napi chiyashjatjop na lhanvacleyash, pa jaspa nuyjatch'e pa lhech nivacle papin yenesh ti yôclôjesh na Yinvacle, pa nitojoneshch'e pa cuvôyu na clayôych'e yiey na yitsaat, ca nitôn'een t'ajuyish pa lhech: ¡Pa nôque lhfanisheesh pa lhech nivacle pan yen ti yôclôj na Lhcaanvacle!’

¹⁰ Pa lhechesh pa lhcaanvacle pa yit'esha pa Amán: —Ecletsha'ne clap, ca acum'e lhpa vat'uyjatshiy shi' pa cuvôyu, nan lhjunash ti lhteesh'in, pa lhech afanisheesh côque ja judío Mardoqueo, ti yi'shi'sha'ne na lhashi na lhcaanvacle lhajpôyich. Pa ya aj ca ninôfisach'e yiey jan ônash ti lhteesh'in.

¹¹ Pa Amán pa t'acum'e lhpa vat'uyjatshiy shi' pa cuvôyu, pa yuyjatch'e pa Mardoqueo pa yitojoneshch'e pa cuvôyu pa clayôych'e yiey pa yitsaat, pa tôn'een t'ajuyish pa lhech: “¡Nôque lhjunashesh pa nivacle pan yenesh ti yôclôj pa lhcaanvacle!”

¹² Ve'lheesh ti yivaclhitesh ti t'ôta'yeshch'e, pa Mardoqueo pa vapecley pa lhashi pa lhajpôyich pa lhcaanvacle, vooy pa Amán pa yifaclitey pa lhajpôyich, ti yitacshin'in pa yip'o'e lhtaco.

¹³ Pa lhech'e ti nifaclemch'e lhpa lhch'acfa shi' papi lhc'utsfasesh lhacôm'a pava lhjunasheshch'e, vooy papi lhech ti yit'esh ts'ivee: —Ca lhechtaja ja Mardoqueo, ti vatjutsa'esh ti nac'oyjatesh pa t'unaj, ti judío, pa sasjop jayu ca ash'apee, pa lhavôm'esha'ne jayu t'ajuyish.

¹⁴ Jôjjeclaytaj ca nameshch'e ti tasinôy, ti yameyshi papi lhtcavosjop pa lhcumjayash pa lhcaanvacle, ca jaspa nicha'jey tatsha pa Amán pa vatôc ti yisnatesh lhpa Ester.