Ester 5 - Nivaclé Bible

Lhpa Ester yicheyshi pa lhcaanvacle

¹ T'ônshi' pava pu'jana nalhus, lhpa Ester pa yuych'e pava lhanvacchevoquey pa yich'ôcji pa clayôych'e yiey pa tasham pa lhajpôyich pa lhcaanvacle, pa vatsavat'e yiey t'ajuyish pa lhtôvash pa yie' pa lhcaanvacle ti yishi'sha'ne pa lhc'o'vat, pa lhech yiey t'ajuyish pa lhashi'esh.

² Pa vooy pa lhcaanvacle ti yi'van lhpa lhcaanvacche Ester yiey pa clayôych'e pa nôclitem pa lhencheyasha pa nôclitjulh lhpa lhech pa lhac'u' pa clesanilh cojiyaj ti yichaj'in. Pa tac'uya lhpa Ester ti t'ajaya pa lhsipisey pa lhac'u',

³ pa vooy pa lhcaanvacle pa niy'ôs: —¿Ta jôque ajunash, lhcaanvacche Ester? ¿She pa lhentaj? ¡Lha'ma ca a'lheshyi lhôn pa pacham na yinvacleyash, pa jajut'am jayu! Lhpa Ester pa yicuulh:

⁴ —Ca nitajulhtaje'mey na Yinvacle ti jatants'aclana ca ninachey nôqueesh ja vatôc ti apis ti javaclhitesh ti jasclaneshi'am, shi' ca anôôychi ja Amán. Pa lhechesh pa lhcaanvacle pa tayôjijaneshem:

⁵ —Avoolheysha'ne tatsha ja Amán ca chinôfisjatemch'e java yen lha lhcaanvacche Ester. Pa nôque lhjunash pa lhcaanvacle shi' pa Amán pa yiche'lhey pa vatôc ti yisnatshem lhpa lhcaanvacche.

⁶ Ti tsaccunch'e ts'ivee, vooy pa lhcaanvacle pa yit'esha lhpa Ester: —¡A'lheshyi pa lhen, pa jajut'ay jayu, lha'ma ca a'lheshyi lhôn pa pacham na yinvacleyash!

⁷ Lhpa Ester pa yicuulh: —Na ve'lha ti jen na lhech jaya'lhesh'a:

⁸ Ca nicaajtajem na Yinvacle pa lhencheyashyish shi' ca natcuumtajeshyijulh nava jen shi' ca nivashantajyam na jayaalhsha, pa ninacheshyiy lhum'ashi ca nitanôycheelhey na Amán peelh vatôc ca javaclhitajesh ti jasclaneshemshi. Pa lhecheesh pa jasnatshem jayu na Yinvacle pa ca nit'aalhtajeshyi.

Pa Amán yitsemaj lhpa taycheshiy yeclô' t'ajuytaja pa Mardoqueo

⁹ Pa Amán pa ti tôlhey pa vatôc pa uj ti nisham'in shi' ti yape'; taj ti pa yamqu'een pa lhavôôc ti yi'van pa Mardoqueo, ti yie' pa lhashi'esh pa lhcaanvacle lhajpôyich, ti nineetsham shi' ti ampa ca lhfanishalhavach ti naashtajop pa lhech.

¹⁰ Taj ti pa lhech t'aplhuqu'e pa ninôclitem pa lhcôntayasha; taj ti meelh ti yamey pa lhajpôyich pa tôney papi lhc'utsfasesh shi' lhpa lhch'acfa Zeres,

¹¹ pa vanasinôquieshelh ts'ivee pava lhasnôyjes lhavanjas shi' papi acloj lhcles, shi' pa lhjunashesh pa lhcaanvacle ti vatvajuychatc'oya papi lhcumjafasesh shi' papi tanefenelh, pa vanashjatchishamc'oya lhacôm'a pap'elhcha.

¹² Pa napshinesh'e ti yit'esh: —Jô'tajesh, ti ya ve'lha ti t'alhayijop lhja lhcaanvacche Ester ja vatôc ti yijutey nôqueesh ja lhcaanvacle; shi' ti t'alhayijop shta pa vatôc ti tcufayesh jayu lhum'ashi.

¹³ Taj ti lhan'e ti ja'van jôque judío Mardoqueo ti yishi'sha'ne ja lhashi ja lhcaanvacle lhajpôyich, jôque cha'lheeshyam jayu ti ampa ca nitô'lhayam.

¹⁴ Pa lhechesh lhpa lhch'acfa shi' lhacôm'a papi lhc'utsfas ti yit'eshelh'in: —Ayôjijanesh ca chinasnatesh lhpa taycheshi yeclô', pa veintidos metros pa t'aplhu'achisham, lhum'ashi ca nich'a nalhutaja pa aalhsha ja lhcaanvacle ca chinôcfeesh'e chisham ja Mardoqueo. Pa lhecheesh pa isa'jop ca meey pa vatôc t'ajuya ja lhcaanvacle pa ama pa ca aychavalhaan. Côque yench'e pa Amán, pa tayôjijanesh ti chiyisnatesh lhpa taycheshi yeclô'.