Ester 4 - Nivaclé Bible

Yitacshinjayan'in papi judíos pa vatyôjijat

¹ Meelh pa Mardoqueo ti yitô'ya pava vaclan, pa yic'asteshlhtapee lhpa yuych'e ti nôclitesh ti aôytejem, pa yuych'ejop pava p'ajavsha'ne, pa yifossham lhshatech pa shnomaj pa lhech tôlhesh'e ti t'ôta'yeshch'e pa yitsaat ti tônesh'in ti yamqu'een pa lhtacshinjayash.

² Pa nôque lhjunash ti yamey yiey pa chiyuy'een pa lhajpôyich pa lhcaanvacle, pa ninvashanem papu ca nôc'ôcji ca lhech lhjunasha pava ca nuych'e.

³ Shi' shta pavan yie' ts'ivee pavan yamey pa vatyôjijat'esh ti tô'lha pa lhcaanvacle, pa uj pa vatacshinjayash ti yi'shi' papi judíos. Papi lhech tanôclitesh pa lhtacshinjayash ti vat'ayipcuyanesh, pava lht'ec shi' ti tafshiyvatsham'in, pa acloj shta papi lhech ti yijo'jisha'ne pa shnomaj shi' ti yuych'e ts'ivee pava p'ajavsha'ne.

Vatvayjatjulh lhpa Ester

⁴ Papi lhcavoquey ti yieyshi pa lhcumjayashesh lhpa lhcaanvacche Ester shi' papi nivacle ti vanujumatsenesh, pa nifaclem lhpa lhech pava vaclan. Pa lhechesh lhpa lhcaanvacche pa yamqu'een ti nilhaajulh pa yichentajey pava ca nuych'e pa Mardoqueo ca jaspa nancayôjatey ti yuych'e pava p'ajavsha'ne, taj ti ninteesh ca nicu'lhesh.

⁵ Pa lhechesh lhpa Ester pa tôney pa Hatac, pa lhech lhanvacleesh papi lhc'afoquelhay pa lhcaanvacle, pa yicheney ca nijôchiey pa Mardoqueo shi' ca niniy'ôsesh pa vaclanem pan lhayaash ti lhech lhfanishlhavach.

⁶ Pa Hatac pa yichey ti tasinôyelh pa Mardoqueo yiey pa clayôych'e yi'shi' pa yitsaat, yie' t'ajuyish pa lhashi'esh pa lhajpôyich pa lhcaanvacle.

⁷ Vooy pa Mardoqueo yamje'mey lhac'o' pava vaclanem shi' pava acloj pa clesanilh clim ti nifac pa Amán ti yijuteyjop pa lhcaanvacle ti yishayaneshjop papi judíos ca chintifch'een.

⁸ Pa yijutem shta pa chiyi'sesh'e vatyôjijat ti chinfac ca chintifch'een yiey pa Susa ca jaspa nijutey lhpa Ester, pa lhecheesh lhpa lhech pa nitô'ya lhacôm'a. Shi' shta ti yiyôjiesha lhpa Ester ca nitasinôyshey lhavaatsha pa lhcaanvacle shi' ca nitants'aclansha ti tavayemjulh papi lhchifas.

⁹ Pa Hatac pa vapec ti nifaclemch'e lhpa Ester pa Mardoqueo pava yit'esh'in.

¹⁰ Pa lhechesh lhpa Ester pa ve'lheesh yachajey pa Hatac peelh ti yachajeshjulh pa Mardoqueo:

¹¹ “Lhacôm'a japi t'acu'mem'in ja lhcaanvacle, shi' japi tsitenas'e java chiyie' ts'ivee ti yi'shi' na lhanvacleyash, yitô'ya ts'ivee ti caaj ja vatyôjijatjop ti tanivalhchayesh pa lhavafi lhacôm'a pa nivacle ja't'ajesha ôcjiclô ti yi'tajeyshi ja clayôych'e ja tasham ja lhajpôyich ti yijôchitajeyshi ja lhcaanvacle ti nintôney jô lhech, ti ninôclitem ja lhcaanvacle ja lhac'u'esh clesanilh cojiyaj, papu ti yinôôclhanitshaan pa lhcavts'aclayjayashesh shi' ti nichinayjat pa lhamônlhajayash. Vooy yivaatsha palha treinta java nalhus ti nintônyiy ja lhcaanvacle.”

¹² Meelh pa Mardoqueo ti t'acuumjulh pa yachajeshjulh lhpa Ester,

¹³ pa yachajey pa lhcliish ti yit'esh: “Ya aj ca alheclôjesh avaatsha, ti lhôv'e' ja lhajpôyich ja lhcaanvacle, ca ave'lhaa ti ajudioche ca chinamônlhanit.

¹⁴ Ca acano'tajeesh ts'ee nôqueesh ca amtaja pa ca at'esh, pa camama jayu shta ve'lheeshcum japi judíos, pa vooy avaatsha shi' ja tajôôjam ca atata chiyclônsha'ne jayu. ¡Pa yaash ti tajulhey avaatsha ti lhamey ti alhcaanvaccheesh pa yivooyjulh ca ats'efeneshelh pa ca yijunasheelh!”

¹⁵ Pa lhechesh lhpa Ester pa yicheney pa yachajeshjulh pa Mardoqueo ti yit'esh:

¹⁶ “Meey ca ayelhvane lhacôm'a japi judíos yiey na Susa, secl'esh ca at'ayipcuyanelhyijop. Pa ya aj pa ca atujelh pa ya aj ca ayô'elh môôjelhch'e pava pu'jana nalhus shi' pava pu'jana tulhis. Napi yicavoquey pa yachi' ca lhech yifanisheeshelh vitsha, pa nanjooylhach'e pa jajôchiey jayu ja lhcaanvacle, lha'mataj nôque ti chit'ajuyeshjulh na vatyôjijat. Ca chinvôncaclônjatsutajyish pa chinasclôn.”

¹⁷ Pa lhechesh pa Mardoqueo pa yichey pa yôfisjatch'e pava t'ônasheshem lhpa Ester.