Ester 3 - Nivaclé Bible

Pa Mardoqueo shi' pa Amán

¹ T'ônshi' pava t'ajôôj jô nalhus pa lhcaanvacle Asuero pa yashjatesh pa Amán, lhaôs pa Hamedata, lhô'sesh pa Agag, ti yinvacleyanesh pant'ajôôjam papi lhchifas.

² Lhacôm'a papi lhcavoseshjop pa lhcaanvacle pa lhajpôyich, pa t'acjatsuyshichamch'een ti t'avuyshicham'in ti naashjop'in pa Amán ja't'ajesha ti yie'in t'ajuyish, lhayaash ti lhech t'ônashesha pa lhcaanvacle; taj ti pa Mardoqueo pa ninteesh ca nanc'ashamesh pa lhayôjijat.

³ Pa lhechesh papi t'acu'melh'in pa lhcaanvacle pa niy'ôsesh'in pa Mardoqueo pan lhayaash ti ninanc'ashamshem pa lhayôjijat pa lhcaanvacle.

⁴ Pa lhacôm'a pava nalhus ti niy'ôsesh'in ts'ivee pa lhech, taj ti pa ninach'aneshey. Pa lhechesh pa yicheyjop ts'ivee pa nifaclem pa Amán ca nijôchiey pa Mardoqueo ti vaniyitesh pava lhclishay, lhayaash ti yit'eshlhavne ti judío.

⁵ Pa meelh pa Amán ti yic'alhtaney pa Mardoqueo ti nint'acjatsuyshicham pa nina'vuyjatshicham pa lhshatech ti lhech naashtaj'ejop, pa yamqu'een pa lhavôôc;

⁶ taj ti pan t'ônashlhavne ti yit'eshlhavne pa lhech Mardoqueo, pa yajulhjatey ca ya aj ca ve'lhaa pa lhech ca chinclôyit, pa lhech tôlh'e' ti yaychavalhey ca nitifch'een lhacôm'a papi judíos papin yi'shi' pa lhanvacleyash pa Asuero.

Pa vatyôjijatjop t'ajuytaja ca chintif'e papi judíos

⁷ Pa vatjutsa' jive'cla pa nincôôp, ja't'ajesha lhech pa jive'cla Nisán, pa nincôôp decimosegundo ti lhcaanvacleesh pa Asuero, pa yu'eshjop ts'ivee?*xd* yiey t'ajuyish pa Amán ti yinôôclhanitey pa nalhu shi' pa jive'cla ti vatpeya'esh ca nivaclhitesh pa yôyinch'e, pa yivaclhitesh pa nalhu trece pa jive'cla doce, ja't'ajesha pa lhech jive'cla Adar.

⁸ Pa lhechesh pa Amán pa yit'esha pa lhcaanvacle Asuero: —Jant'ajôôj japi lhtachifas yameshvatsham java yie' ts'ivee ti yi'shi' na lhanvacleyash na Yinvacle, caaj japi ve'lheesh ti tanuc'oya jap'elh; tavujuyesha java lhayôjijatesc'oya jap'elh lhtachifas, pa ninôfisjatch'e nava lhayôjijates na Yinvacle. Pa nintajulhe'mey na Yinvacle japuque lhtachifas ti yi'tajshi na lhanvacleyash.

⁹ Pa lhe'naa na Yinvacle ca nitajulhtaje'mey pa chinpeya'esh vatam pa lhayôjijat t'ajuya ca chintif'e, vooy yivaatsha jajuteyjop jayu japi lhcumjafas java vatvanjas trescientos treinta mil kilos pa clesanilh clim ca lhcaqueclitô'esh na lhcaanvacle.

¹⁰ Pa lhechesh pa lhcaanvacle pa niclanshi lhpa lhpascheshi pa yijutem pa Amán ti nilhc'utsfasesh papi judíos,

¹¹ pa yit'esha: —Isjop ca amônlhaaesh na clesanilh clim. Pa vooy japuque lhtachifas pa asnatshem pa ca ajulhjataje'mey.

¹² Pa nalhu trece pa vatjutsa' jive'cla pa nincôôp pa tôneyjop papi vanqu'iseem pa lhcaanvacle, papi lhech pa yi'sesh'e ts'ivee pava tayôjijaneshjop pa Amán papi lhanvaclesesh pava vatcootsjativshay shi' ti chiyie' ts'ivee shi' papi lhcaanvacleseshjop papi vatachifas. Cavôque ti tayôjijanesh pa chiyi'sesh'e pa vatqu'isjayanach'esh shi' pa yitsôt'ajesh lhcliish yiey pan yie' ts'ivee shi' papi lhchifas, pa yi'sesh'e pa lhey pa lhcaanvacle Asuero, pa yi'sesh'apee ts'ivee pa lhca'niscôtey pa lhcaanvacle.

¹³ Pa nijooylhach'e ti chiycheney ts'ivee pava vatqu'isjayanjasesh lhacôm'a pava yie' ts'ivee. Pava lhech tayôjijanesh ca chintifch'een lhaôm'a pa ve'lha nalhu papi judíos, papi nich'acsha'ne ja't'ajesha papi c'utsjas, papi taôvclas ja't'ajesha papi ôcjeclôy, shi' ca nanjôclesh lhacôm'a pava yi'van. Pa nalhu ti yinôôclhanitey lhech pa trece pa jive'cla doce, ja't'ajesha lhech pa juve'cla Adar.

¹⁴ Pa chiyi'sesh'e ts'ivee ti chitayôjijanesh pa chiypeya' lhacôm'a nan lhjunash pa vatyôjijat ti chiytôyjata lhacôm'a pava chiyie' ts'ivee shi' papi lhchifasesh, jô'taney ti vataasclanesha'nejop pa lhech nalhu.

¹⁵ Papi yichajch'e pa yichesh ts'ivee tatsha pa lhayôjijat pa lhcaanvacle. Pa lhech chitayôjijanesh pa chinpeya' yiey pa yitsaat Susa. Pa lhan'e pa lhcaanvacle shi' pa Amán pa yielhch'esha'ne ti yiyô'jane, ti yiey pa Susa pa uj pa vatacshiyash.