Ester 2 - Nivaclé Bible

Lhpa Ester chit'acu'meyshijop ti lhcaanvaccheesh

¹ T'ajôjqu'e pava nalhus ti t'ônshi', pa lhcaanvacle Asuero pa vômemch'e pa lhavôôc, pa yaychavalhey lhpa Vasti pava lhfanishlhavach shi' pa vatyôjijat ti chiypeya'eshvatam ti t'ajuyeshjulh lhpa lhech.

² Pa lhechesh papi lhcumjafaseshjop pa lhanvacleyash pa yit'esh ts'ivee: —Ti suyeshi ca chinvoo'mey ja lhcaanvacle papi lhutsjayech lhasnôychey.

³ Ti yetôn na lhcaanvacle papi ca nivatclôvalhshelh ja lhanvacleyash lhacôm'a java chiyie' ts'ivee ca chinanchajey'in lhacôm'a papi ôcjeclôy lhasnôychey na lhajpôyich na lhcaanvacle yiey na yijôt'aj yitsaat Susa, ca chinanjop ts'ivee ca niclôvalh ja Hegai, ja nivacle yicaftsenesh na lhcaanvacle shi' ti vanujumatseneshem papi ôcjeclôy. Vooy ja Hegai pa t'acu'mem'een java lhfanishesh ti yiisiyanesha'ne,

⁴ vooy lhpa lhutsja pan ya'shesh ti yenesh pa lhcaanvacle pa yetônesh ti lhcaanvaccheesh ca nancayôjatey pa lhc'o'vat lhpa Vasti. Pa lhechem'e ti yajulhjatey pa Lhcaanvacle pa lhech lhfanishesh.

⁵ Yiey pa yitsaat Susa caaj pa ve'lha judío lhey Mardoqueo, lhaôs pa Jair, lhô'sesh pa Simei shi' pa Cis, tô'lha pa tc'a'sham pa Benjamín.

⁶ Pa lhech ve'lha tô'lha papi acloj ti yisaas lhapesh pa lhcaanvacle Nabucodonosor yiey pa Babilonia tô'lhey pa Jerusalên, nôquee pa Jeconías, lhanvacle pa Judá.*xc*

⁷ Pa Mardoqueo caajem lhpa lhcavecjôclô ôftecleesh, vooy pa lhech pa vanictsôyanesh ti vafsha'ne papi lhnavot. Lhpa lhech lheyesh Hadasa, ja't'ajesha Ester, lhpa lhech lhasnôychesha'ne is'e' pa lhjunash.

⁸ Meelh pa lhayôjijat'esh pa lhcaanvacle ti chiypeya'esh pa acloj papi lhutsjayech nachey ti tay'evane pa lhajpôyich pa lhcaanvacle yiey pa yitsaat Susa ti yiclôvalh pa Hegai, pan vanujumatsenesh papi lhutsjayech, ti yi'shi' ts'ivee lhpa Ester.

⁹ Lhpa lhech lhutsja ya'shesh ti nishamsha pa Hegai ti ya'shesh ti vanujumatsenesh, pa lhech lhjunash pa Hegai pa tatsha ti yinesh ts'ivee pava yilhasnôychiyanesh shi' ti yijutem pava isis lhacôs; pa yanshi' pa lhcumjayash papi napu'yama ya'shesh ti vatcavoqueyesh yiey pa lhajpôyich pa lhcaanvacle, papi lhech pa yic'uyjata pava ya'shesh ti isis'ôcji lhtôvjas pa lhajpôyich papi lhech ôcjeclôy.

¹⁰ Lhpa Ester ampa ca niteetsha papi tô'lha shi' pat'ajôôjam, lhayaash pa Mardoqueo tayôjijanesh ti ya aj ca chinasnatesh.

¹¹ Pa Mardoqueo ti yijôchiey'in lhacôm'a pava nalhus yiey pa t'ajuyish pa clayôych'e pa lhajpôyich'esh papi ôcjeclôy, ca jaspa nitô'ya pa lhjunashch'e lhpa Ester, shi' pa lhfanishlhavach.

¹² Lhacôm'a papi lhech lhutsjayech ti chiyisclansha'neen pa lhjunash ti lhasnôycheyesh ti yicheshch'e pava doce jive'clas. Pava vatjutsa' ve'lhayama jive'clas chip'aclaneshch'e pava lhavuuvtes pa vatshachivo lhey mirra, vooy pava ve'lhayama shta jive'clas ti mônlhee vooy pa vatshachivo shi' pa ts'anatshi ti t'ajuyaan papi ôcjeclôy. Ti yivaclhitesh'in pa ve'lha ts'ivee papi lhutsjayech ti yichesheyshi pa lhcaanvacle Asuero ti yuyeyvanôcji ts'ivee,

¹³ pa chiyvashanem ti yichaaj ti tôlheyjop pa lhajpôyich papi ôcjeclôy ti yameyshi pa lhajpôyich pa lhcaanvacle lhacôm'a pa ti t'aalhsha.

¹⁴ Pa yichey'in pa lhajpôyich pa lhcaanvacle ti tulhey, vooy ti nich'a nalhu shta pa yam'ôcji peelh lhtôvash pa lhajpôyich papi ôcjeclôy, ti vanujumatsenesh pa Saasgaz, pa nivacle lhcafiyanach'eshjop pa lhcaanvacle ti yiclôvalh papi lhjayasesh'in atesha; ti tifesh'een pava lhech'e pa ninapecley'in t'ajuyish pa lhcaanvacle, pa yamjeyshi pa lhech pa lhencheyashesh, pa tayôjijanesh ti chitône'mey.

¹⁵ Meelh lhpa Ester, lhôse pa Abihail, lhatjooc pa Mardoqueo, ti yicheyshi pa lhcaanvacle, pa tsi'sha pa t'ônashem pa Hegai, pa nivacle lhcafiyanach'esh pa lhcaanvacle shi' ti yiclôvalh papi ôcjeclôy. Pa lhechesh lhpa Ester pa ya'sheshc'oya ti chiyôyesha lhacôm'a pap'elh pava lhanfanashesh.

¹⁶ Lhpa Ester pa chiychajey pa lhcaanvacle lhajpôyich ti chiychajey t'ajuyish pa lhcaanvacle Asuero, pa jive'cla napu'nôjesh lhanquey shta Tebet, pa nincôôp napu'yama ti lhcaanvacleesh.

¹⁷ Vooy pa Asuero yenesh lhpa Ester ti tanca lhjunasheeshjulh ca nenesh pap'elh ôcjeclôy, pa nôque lhjunash ti ya'shesh pa lhencheyashesh pa Asuero, pa lhech pa ya'shesh ti yajulhjatshamc'oya pap'elh lhutsjayech ti yanlhavcop, pa yanshi' lhshatech pa lhc'ôclejop pa lhanvacleyash pa yetônesh ti lhcaanvaccheesh ti nicôyôjesh'e lhpa Vasti.

¹⁸ Pa nijooylhach'e ti yisnatesh pa uj lhc'usiyash ti yisclaneshemshi lhpa Ester, pa lhech pa t'a'lhajop lhacôm'a papi lhcumjafas shi' papi tanefeneshelh pa lhanvacleyash, pa yachajemshicham pava yiney pava chiyie' ts'ivee pa yijutey pava acloj ti tisesh, yiey pan lhjunash ti chicufaayshem pa lhcaanvacle.

Pa Mardoqueo nôclit pa vatafjuncheyasha? pa lhcaanvacle

¹⁹ Pava nalhus'in papi lhutsjayech ti chiychajey'in peelh lhtôvash pa lhajpôyich papi ôcjeclôy, pa Mardoqueo yie' lhavôôj pa lhashi pa lhcaanvacle lhajpôyich.

²⁰ Pan lhjunash ti yicajôyshiyanesh pa Mardoqueo lhpa Ester ti ninteetsha pa'na papi lhchifas ti nilhecha pat'ajôôjam, vooy ti yijôneshch'e pava yeyjatsjanesh pa Mardoqueo ti nifaclem, pan lhjunash ti vanujumatsenesh'in.

²¹ Jôjjeclay yi'shi'sha'ne pa lhashi pa Mardoqueo pa lhajpôyich pa lhcaanvacle ti tach'ana ti tasinôy'in pa Bigtán shi' pa Teres, papi lhech napu' c'afoquelhay lhanvaclesesh ti yiclôvalh pa chiyuy'een pa lhcaanvacle lhajpôyich. Papi lhech ya'shesh ti yisuyiyan pa yôyinch'ejop ca niclôn ts'ivee pa lhcaanvacle Asuero.

²² Meelh pa Mardoqueo ti yitô'ya pa vatafjuncheyash pa nifaclem lhpa lhcaanvacche Ester, lhpan tô'lha ti nifaclem pa lhcaanvacle pava tôlhesha pa Mardoqueo.

²³ Pa lhech pa vooyshi ts'ivee pa yitô'ya ti yijô', papi napu' c'afoquelhay lhanvacles pa tanivalhchayesh ti chiyôcfa'ôcji lhcôyish. Côque ti lhfanishesh pa chiyi'sesh'e ti chiyiesh'e t'ajuyish pa lhcaanvacle yi'shi' pa vatqu'isjayanach'esh ti chiychayeshch'e pa lhjunash papi lhtachifas.