Esdras 1 - Nivaclé Bible

Pa lhayôjijat pa Ciro

¹ Pa vatjutsa' nincôôp ti lhcaanvacleesh pa Ciro, lhcaanvacleesh'e pa Persia, pa jaspa nôfisch'e pava lhclishaya pa Lhcaanvacle ti chayemjulh pa Jeremías.*xa* Pa Lhcaanvacle yifaycutesh pa Ciro lhacôm'a pa lhanvacleyash ti tifesh'apee pava lhclishay shi' ti chiyi'sesh'e pa vatyôjijat:

² “Na Ciro, lhanvacleesh na Persia, nôclitch'e ti yit'esh: Pa Lhcaanvacle, Dios ti yi'shi' pa vôôs, yanshi' nava yipôcôtôy lhacôm'a ja lhanvaclechat nash'apee na cotsjaat, pa niyôjiyijop ca jasnatshem pa lhishjanjavat yiey ja Jerusalên,*xb* yi'shi' ja lhcootsjat ja Judá.

³ Pan yie' avaatsheelh, ti natsôt'ajeshelh ti lhchifaselh'ash pa Lhcaanvacle, ca nefenelh'ash pa Dios, pa meelhey ja Jerusalên yi'shi' ja Judá, ca asnatshelhem pa lhishjanjavat pa Lhcaanvacle, pa lh'Dios japi Israel lhavos, pa lhech Dios tsitenaj'e ja Jerusalên.

⁴ Pan yie' japin mônlhasha'ne ti natneeen yiey jan yie' nôqueesh, ca nefenesh japi lhchifas pa clesanilh clim, shi' pa cojiyaj, pava lhcôquicletôy shi' pava lhclôy vôcôc, shi' shta pava tiseshey t'ajuya pa lhishjanjavat pa Dios yiey ja Jerusalên.”

Papi Israel lhavos ti vapecley'in pa Jerusalên

⁵ Papi chiyclôvalhchiyinesh pa t'ajôôjamsha'ne pa Judá shi' pa Benjamín shi' papi vatcasinôc shi' shta papi levitas, ja't'ajesha pant'ajôôj papi nifayujat'in pa Dios, pa vataasclansha'ne ts'ivee ti yichey'in pa Jerusalên pa yachajeyjop ti yisnatesh pa lhishjanjavat pa Lhcaanvacle.

⁶ Pa lhacôm'a papi lhchifas ti yefenesh pa clesanilh clim shi' pa cojiyaj, pava lhcôquicletôy, pava lhclôy vôcôc shi' pavan yisnatesh isis, jô'tajesh lhacôm'a pava yitôlhjatlhavne na lhjunashvatc'oya ti tcufayesh.

⁷ Vooy pa lhcaanvacle Ciro, tô'lha ti yachaj'in pava chiyjuyjata pa lhishjanjavat pa Lhcaanvacle, avan yayjat'een pa Nabucodonosor yiey pa Jerusalên ti yantaj'ôcji pa lhishjanjavatc'oya pava lh'diosec.*xc*

⁸ Vooy pa Ciro pa yachajchiyinesh pa Mitrídates, chivoyanesh pava pesoc, pa nijooylhach'e ti yitsjulhch'e pa yijutshey pa Sesbasar, lhanvacleesh pa Judá.

⁹ Pant'ajôôj pava chiyitsjulhch'e: treinta pava us tacfeyesesh pa clesanilh cojiyaj, mil pava us tacfeyesesh pa clesanilh clim, veintinueve pava clesac,

¹⁰ treinta pava tacfeyesesh tiqu'icsha'ne pa clesanilh cojiyaj, cuatrocientas diez pava tacfeyesesh tiqu'icsha'ne pa clesanilh clim, shi' shta pav'elh mil chiyisnatesha'ne.

¹¹ Pa yam'evatsham pava chiyisnatesha'ne pa clesanilh cojiyaj shi' pa clim pa cinco mil cuatrocientos. Lhacôm'a cavôque ti yachajey'in pa Sesbasar pa Jerusalên, ti tay'een pa Babilonia papin chiyayjataj'een lhapesh.