Daniel 9 - Nivaclé Bible

Pa Daniel t'a'lhem papi lhchifas

¹ Ja Darío, lhaôs ja Asuero, tô'lha japi medos, pa chinvacleyanc'oya japi caldeos.

² Ja vatjutsa' nincôôp ti chinvacleyan, vooy yivaatsha, ya Daniel, javôntôyitesh ja lhqu'isjayanach ja chiytôyjata pava vaclan Jeremías jan lhjunashch'e java setenta nincôpes*xj* pava vaclanem ti yôfisch'e ti nôjjicham ja Jerusalên, yiey jan t'ônasheshem pa Lhcaanvacle ti yit'eshe'ma ja chiytôyjata pava vaclan.

³ Pa jacheney na yalhjayash shi' ti jatants'aclana pa Dios Lhcaanvacle, pa jat'ayipcuyan shi' ti c'uych'e java p'ajavsha'ne, pa jôvji'sha'ne ja shnomaj.

⁴ Pa jaya'lhey pa Lhcaanvacle yi'Dios, shi' ti jatatfaclem:*xk* ‘Lhcaanvacle, Dios ti yaash shi' pa t'unaj, yajatesh ti t'ôfisjatch'e nava afacjes pa lhtônitjatesh pa encheyash japi nen shi' ti yôfisjatch'e'am nava ayôjijates:

⁵ yivaatsheelh jasnatshelh pa sasch'e shi' pava niysisa; ti lhech yifanisheshelh pa niysa'; pa tanca yaychavalhelh'ay; pa javô'melh java lhtôyôjijanesh shi' java ayôjijates.

⁶ Ninasch'anjayuelha japi acavos chiytôyjata pava vaclan, japin tasinôytajeshem pa ey japi yinvacleselh, japi chinvacleyan, japi yicchevot'elh shi' lhacôm'a japi lhtachifas Israel lhavos.

⁷ Avaatsha, Lhcaanvacle, navo'yeshch'e, taj ti yivaatsheelh ya judíoselh tsichavayelhey nôqueesh na yivapenajelh; jan lhjunash japi yiey ja Jerusalên nan lhjunash nap'elh Israel lhavos, napi shalhaa shi' japi tosey, japin yiey java vatavtsatevshay ti lhech lhavôômji tôlh'ejop ti vatjuyjat'ajulh.

⁸ Yivaatsheelh, Lhcaanvacle, yijunashelhjulh japi yinvacleselh, japi chinvacleyan shi' japi yicchevot'elh, tsichavayelhey na yivapenajelh, lhayaash ti jasnatshelh pa sasch'e ti jayjuyelh'ajulh.

⁹ Taj ti avaatsha, Dios tsitsôt'ajelh'ash, natsôt'ajesh ti lhatcavts'aclay shi' ti lhavômjatch'e. Yivaatsheelh ti jayjuyelh'ajulh'in

¹⁰ shi' ti nic'ach'anelh'a Lhcaanvacle, Dios tsitsôt'ajelh'ash, ti ninasc'ashamshelh'am nava lhavanqu'eyjatsjanesh ti lhniyôjitajeshelhyi ti lhtôlhjata japi acavos chiytôyjata pava vaclan.

¹¹ Lhacôm'a japi Israel lhavos ti ninanc'ashamesh nava lhavanqu'eyjatsjanesh shi' ti vantanjulh ca nanc'ashamesh nava ayôjijates; pa lhe'naa ti natelhyitsham java niysisa shi' ja chiyetônjop java chiyi'sesh'e ja lhayôjijat ja Moisês,*xl* ja acavo, lhayaash ti jasnatshelh pa sasch'e ti jayjuyelh'ajulh.

¹² Avaatsha lhancheneelhyi pa yaash ti tavijatay, pa t'ôfisjatch'e pa afjunchayash ti lhasnatshelhyam shi' japin yinvacleseshelh; ti ampa ca lhjunashajulh yiey na cotsjaat ca chinjôney na lhanclôyitsjayash ti namey ja Jerusalên.

¹³ Lhacôm'a côque niysa' ti namelhyi yivaatsheelh nan lhjunash ti vani'sesh'e ja lhayôjijat ja Moisês; taj ti yivaatsheelh pa nivoolh'aysha'ne, Lhcaanvacle Dios tsitsôt'ajesh, pa nivôme'shelhjop nava yisasch'eclelh, pa niyieelhshi ti ayijô'.

¹⁴ Pa lhe'naa, Lhcaanvacle, ti lhasclaneelhsha'neyijop nôque niysa' ti lhancheneelhyi; lhayaash ti avaatsha Lhcaanvacle Dios tsitsôt'ajesh, ti navo'yeshch'e lhacôm'a pa ti lhasnatesh; taj ti yivaatsheelh niyenelh ca yich'anelh'a.

¹⁵ “Lhcaanvacle Dios tsitsôt'ajelh'ash, avaatsha lhnôcliteshem pa uj t'unaj ti lhayjat'een ja Egipto japi achifas,*xm* pa lh'isiyanesh na ey java lhech nalhus pa yamjey navôque nalhus; taj ti yivaatsheelh jasnatshelh pa sasch'e shi' pa niysa' ti jasnatshelh.

¹⁶ Lhcaanvacle, tsitô'yelh'a ti lhtaasclaneshi. Jatants'aclan'a ca ayjatjop ja Jerusalên pa avôôc shi' pa asuyi, lhayaash jô lhech ti avtsat'esh shi' ti is ti avutiyuqu'esh. Lhacôm'a japi lhtachifasesh ti tajulhshi ti yinvaclematan ja Jerusalên shi' napi achifas, tôlh'ejop nava yisasch'eclelh shi' pava lhsasch'e japi yicchevot'elh.

¹⁷ Dios tsitsôt'ajelh'ash, ach'anesha na t'alhjayash shi' nava vatants'aclana na acavo avaatsha; ti tô'lha na ey, Lhcaanvacle, ovalhesha pa encheyash ti yitacshin'in nan mônlhee na ishjanjavat.

¹⁸ Anjuyyi, pa yi'Dios, pa ach'anyi; ovalhsha'ne nava tsafalheshelhsha'ne shi' ja yitsaat jan chiyetônjop na ey. Niyisnatshelhyitam pava ca vatants'aclanshelh ca vatcafiyanshelh ca nivo'yeshch'e na yimônlhajayashelh, vooy pa uj acavts'aclayjayash.*xn*

¹⁹ ¡Lhcaanvacle, Lhcaanvacle! ¡Ach'anelhyi, ca avômjatelhch'eyam! ¡Anjuyeshelhyi, Lhcaanvacle, pa anachelhyi ca ats'efeneshelh! ¡Nitôlh'a avaatsha, pa yi'Dios, yiey shta na avtsaat shi' napi achifas, napin yetônjop na ey, ya aj ca clet'ac'oya!’

Chichayjulh pava setenta ti chiyamqu'e

²⁰ “Yivaatsha yalhetipa ti jayaalh shi' ti jatatfaclesh nava yisasch'e shi' napi yichifas Israel lhavos, ti jayeetshe'ma java jatants'aclansha pa Lhcaanvacle yi'Dios tôlh'ejop lhja is'e lhavutiyuc.

²¹ Jôjjeclay mônlheesh ti jayaalh, vooy pa Gabriel,*xñ* pan tanôclityam ti nich'a yi'shi' yitô'vat, pa yachajyitapeeen yiey jan jôv'e'. Ti yujeeyjop ti chitisesh pa Dios java vatcufayjatesesh ti nuutey.

²² Pa yit'esh'yam: ‘Daniel, janachesh'ay nôqueesh ca c'atôyjatc'oya navôque matas.

²³ Vooy ti lhtô'lhesh'e ti lht'aalh pa nacu'lheshjulh ja Dios. Yivaatsha janachesh'ay ti janfac'am ti nacuulhjulh, lhayaash ja Dios na'shesh ti nen. Pa nôqueesh pa avôntôyich'e jum na lhjunashch'e pa jaspa natôyc'oya nava yi'shi' atô'vat:

²⁴ ‘Setenta java chiyamqu'e nit'ôntajshi napi achifas shi' na is'e avtsaat ca jaspa lhech nôj'e' ti vatjuyjatjulh shi' pa sasch'e, jaspa chinvômjate'mey pava niysisa lhjunash pa chinanshi' pa vatvoyjayasheshch'e ôyjôlhôyech'esh, ca jaspa nôfisch'e nava yi'shi' atô'vat shi' nava chichayjulh pa chin'isiyan'e ja Is'ôcji lhtôvash.

²⁵ Tajulhey ca natô'yish shi' ca natôyc'oya navôque: Pan tô'lhesh'e tatsha ca chintôyôjijanesh ca chinachajeyjop ca chinasclanch'esha'ne na Jerusalên pa namjey ja lhcaanvacle ca chinvenchatajesh, ca nit'ôntajshi java napu'yama ti chiyamqu'e, vooy pava lhcaavjuc shi' pava vatashclôfjesjop ti chiyachajesh ti chiyisclanch'e pa Jerusalên pa nôqueshch'e jayu pava sesenta y dos ti chiyamqu'e, taj ti lhech t'ôplhaa jayu ti acloj pava tavijatay.

²⁶ Ca ninôjtajeshch'e pava sesenta y dos ti chiyamqu'e pa nijôclesh jayu pa lhamônlhajayash pa lhcaanvacle chiy'isiyan. Vooy ja Jerusalên shi' ja vatishjanjavat pa chiyvômjatsha'ne jayu tôlh'ejop pa ve'lha lhcaanvacle ti namey jayu. Pa yôjesh'esha'ne ti nam jayu tatsha, jan lhjunash ti chiyôlhp'ojane, pa namjey pa yôj'e' ti lhetipaesh jayu pa vatvatclônjayash shi' pa chinvancalhifch'een ti lhech chiyôjat'esha'ne.

²⁷ Pa nôqueshch'e pa ve'lha ti chiyamqu'e, pa yisnatesh jayu pa vatpeya'esh papi acloj nivacle, taj ti ca namtajshi lhcachi'vat ti chiyamqu'e pa lhech yôj'e' jayu pava vatcufayjatesesh ti chiycufa'yesh. Pa yisnatesh'ôcji pa suy pa lhjunash*xo* pa yan'e t'ajuyish pa itôvatjop pava vatcufayjates pa yamjey ti lhech yôjat'e ti chiyvômjat ti nicôtjatesha'ne pan yivclanjat navôque suych'e.’ ” s Pa yi'shi' lhtô'vat pa Daniel ti yie' lhavôôj pa tovôc Tigris