Daniel 8 - Nivaclé Bible

Yi'shi' lhtô'vat pa tashinshtaj shi' pa fusuc

¹ “Ti yicheshch'e ti pu'jana'esh ja nincôôp ti lhcaanvacleesh ja Belsasar, yivaatsha, ya Daniel, caajyam jeelh yi'shi' yitô'vat, ti nôjeshch'e ja apis.

² T'aplhuqu'ejulh ja yi'shi' yitô'vat ti lha'yasha ca yie' ja yitsaat Susa, jan yie' ja cotsjaat Elam, lhavôj'e ja tovôc lhey Ulai.

³ Pa tojjulh lhôn ti javanjulh ja ve'lha tashinshtaj ti yiey ja lhavôj'e ja tovôc. Pa pitesch'e java napu' lhac'uc, taj ti ve'lha lhjô lhech nijooylhach'e ti nachfach'ee pa yash'apee lhap'elh.

⁴ Pa ja'van ja tashinshtaj ti yitôjôjeshey java lhac'uc na nuutch'ejulh, yiey na fchenajjulh shi' na fiyatjulh, pa nive'lhaa jeelh yaquiset ca natjuyeshjulh ca nivômjatesh java yitôjôj'e. Pa lhfanishesh java yit'esh ti yajulhjatey, pa yajatesh ti vanijôtjat.

⁵ Jôjjeclay jaychavalhch'een java ja'van, pa javanjulh ja ve'lha fusuc ti tôlhey na nuutch'e, ti pôtsejsha'ne ti vacumaj pa nint'ôs'e na cotsjaat. Jô lhech fusuc ve'lhee lhja uj lhac'u' yi'shi' lhcaavju java lhtôsjey,

⁶ pa meelh ti yamey ti shalheema ja tashinshtaj napu'e java lhac'uc jan vatjutsa' ti ja'van yie' lhavôôj ja tovôc, pa vanijôtjat ti yitôjôj'in

⁷ pa yipôcjeteyc'oya java napu' lhac'uc, pa ampa t'unajjop ja tashinshtaj ca natjuyeelhvatjulh jô lhech. Pa nijooylha ja fusuc ti yamjata cotsjaat ja tashinshtaj pa t'ôssham'in, pa ampapu ca isa'jop ca nalhjeneshey.

⁸ Ja fusuc yajatesh'in ti t'un'in, taj ti nivinshaa jan caajtaj pa t'unaj, ti yipôctejey lhja pitej lhac'u', vooy jan tôlh'e' lhech vacha'e java yichatjulh lhac'uc ti t'ajuyey ts'ivee nava yichatjulh lhavimis.

⁹ Lhja ve'lha java lhech tôlh'e' lhja ve'lha lhac'u' tiqu'in, lhjô lhech ujesh ti tôlhshi' t'ajuyey na fiyatjulh, pa t'ajuyey na lhum'ôcjinuc shi' ti tanjuyey na Is'e' Cotsjaat.

¹⁰ Pa yaash pa lhavôôj yamey na yie' nava catiis pa nicôtjatch'esha'ne jav'elh catiis*xh* pa t'ôsch'een,

¹¹ pa vanashjatjulh ja lhanvacle lhavaatsha jan yie' java catiis; ti yivômjatesh pava lhcufayjates t'ajuya pa nalhu pa yisasiyan'e pa lhc'o'vat pa vatôclôjqueyash.

¹² Pa niysa' pa lhfanishesh pa t'ichavatjop pan yiesh'e pava vatcufayjates lhapesh, pa yivômjatsha'ne pava yijô'. Pa yisnatesh lhacôm'a pava ti yen, shi' lhacôm'a ti vatshamitjatesh.

¹³ “Pa nijooylha ti jape'ya pa ve'lha ángel ti niy'ôs peelh ángel: ‘¿Ta ca t'elheesh jayu ca ninôjeshch'e côque ti lha'van yiey na itôvatjop nava vatcufayjates t'ajuya nava nalhus? ¿Ta t'aplhuaeshch'e na uj sasch'e ti chiyan'ôcji na lhajpôyich na Lhcaanvacle shi' napi nincacu'esh na lhech ti chit'ôsch'e'in?’

¹⁴ Pa chiculheshjulh: ‘Namjey pava dos mil trescientos nalhusesh ti nuutey shi' ti nich'a nalhu. Ca ninôjtajeshch'e côque, pa chin'isiyan'ôcji na is'ôcji lhtôvash.’

¹⁵ “Lhan'e yivaatsha, ya Daniel, ti jaychavalhaan ja yi'shi' yitô'vat ti tsitôyjatc'oya ja t'ônashch'e, pa yalhatajesh ti tanôclit'e yijuyish pa lha'yasha pa nivacle,

¹⁶ pa jape'ya pa vat'ôjôj t'ônashch'ejulh pa nivacle ti tôlhey ja tovôc lhey Ulai, pa lhech pa yit'esh: ‘Gabriel,*xi* anôclitemch'e nôque nivacle na yi'shi' lhtô'vat.’

¹⁷ “Pa lhechesh pa tanc'uyiy. Pa tsitôyiyjat, pa jayinjuyshichamc'oya ti jamjata cotsjaat na yitaco, taj ti pa lhech pa yit'eshyam: ‘Lhôs'ash pa nivacle, natôôysha na yi'shi' atô'vat ti yajulhjatey ti lhech yôjat'e nava nalhus.’

¹⁸ Meelh pa lhech ti tasinôyam, pa tsivômjat'e pa yamônlhee na cotsjaat; pa lhech pa tanajayyi, ti tsivatsavatjat,

¹⁹ pa yit'eshyam: ‘Janôclitch'eam jayu nava vaclan jayu ca ninôjtajeshch'e nava nalhus ti tavacôy pa Dios, lhayaash na yi'shi' na atô'vat ti lhech yôjat'e nava nalhus.

²⁰ Vooy pa tashinshtaj ti napu'e pava lhac'uc chiyjôney napi lhanvaclesesh na Media shi' na Persia.

²¹ Vooy pa fusuc lhech na lhanvacle na Grecia, lhpa pitej lhac'u' ti yiey lhcaavju pava lhtôsjey lhech na vatjutsa' lhcaanvacle.

²² Pava yichatjulh lhac'uc, pavan nicôyôjey ti yipôctejey lhpa vatjutsa' lhac'u', nôque yich'e' napuque vatachifas tôlhshaam jayu papi yichatjulh chinvacleyansha'ne, taj ti amjop pa t'unaj pa vatjutsa'.

²³ Meelh pa lhech t'unaj pava lhech vatvaclevshay ca namtajey pa yôj'e' vooy pava niysisa pa nam'apee ts'ivee, pa caaj jayu pa lhcaanvacle ti vanashjat shi' ti vancacôjôsjat pa vaniyitesh jayu pa t'unaj.

²⁴ Pa vanamjatey jayu ti vanunitjat, taj ti nilhecha pa t'unaj lhavaatsha; pa tavijatay jayu pa lhfanishesh pa nitifch'een ti vancatôyiyjatesh pa tcôvjoyesh jayu lhacôm'a pava yisnatesh. Pa yivômjatsha'ne jayu papi nivacle t'unis shi' shta papi acloj lhchifas pa Dios.

²⁵ Tôlh'ejop ti vancacôjôsjat pa vancatejeshiin jayu ti tcôvjôyesh. Pa yamqu'een jayu pa lhnunatsjayash pa acloj papi nivacle yi'shi' pa yicafiyan pa yayjatesha'ne pa lhamônlhajayash pa lhfacjanjayash. Pa vatjuyjatjulh pa Lhanvacle papi lhcaanvacles, taj ti pa yash'apee lhavaatsha pa lhech.

²⁶ “Pa yi'shi' atô'vat pava ti nuutey shi' ti nich'a nalhu'esh ti chinavanjiyinesh pava lhech yijô'; taj ti avaatsha pa aniistanjatesh, vooy ca nôfiistajch'e jayu ca cleetaja apee pava acloj lhnalhus.’

²⁷ Yivaatsha, ya Daniel, pa tsichavayeshyitay ti ampa yunaja, pa tsi'ôôyteyan'in java nalhus. Pa nijooylhach'e ti janeetsham pa lhetipa ti jayjuya java yicumjayashesh ti lhanvaleyish napi yichifas. Taj ti yivaatsha janiyitesh java yi'shi' yitô'vat ti caajyam, lhayaash ti ninastôyc'oya.