Daniel 7 - Nivaclé Bible

Yi'shi' lhtô'vat pava yichatjulh yaquisetesesh

¹ Ve'lha ja tulh, jan t'aplhuqu'e ja vatjutsa' nincôôp ti lhcaanvacleesh ja Belsasar yiey ja Babilonia, vooy ja Daniel caaj pa lhtsamaat shi' java yi'shi' lhtô'vat. Vooy ti nijat'o, pa yi'sesh'e java yaash pa lhjunash ti nijujôm. Cavôque yi'sesh'e:

² “Ja yitsamaat ja'van lhôn java yichatjulh lhavimis ti tanu' pa nivaych'aclajshi ja yinôôt yiey ja uj tovôc.

³ Pa yalhatajesh java yichatjulh us yaquisetes, nalhjunashvatc'oya, ti tôlhshaam ja tovôc.*xq*

⁴ Ja vatjutsa' ti nôôc lha'yasha ja jump'uvalhjetaj, taj ti lhafanyashjulh ja sheyônôj. Meelh yivaatsha ti jovalhey lhôn pa chinclan'ec'oya java lhafas, pa netsham'e cotsjaat pa clajaych'e java lhafoc yiey t'ôyiish, pa yipôyjatchisham nan lhjunash ja nivacle, vooy pa lhashilhôj lha'yasha jan lhjunash pa nivacle.

⁵ Vooy ja napu'eyshi lha'yasha ja oso, yinenjatchisham pa pacham, jô lhech pu'janach'e java lhavlhisesh java lhtsevtey; pa jape'ya ti chiyit'eshem: ‘¡Alhuney, ca atuj lhacôm'a na vat'asjan ti isjop'am!’

⁶ Vooy ja pu'jana'eyshi lha'yasha ja yiyôôj, taj ti jô lhech yichatjulh'e java lhafas yie' t'aclô'; pa ja'van shta ti caaj java yichatjulh lhshatjes java lhech pa yunitjat.*xr*

⁷ Ja yichatjulheyshi yaquiset ti ja'van ti yi'shi' yitô'vat, ti suy pa lhjunash, ti tanjovayiy shi' ti ve'lheeshey pa t'unaj. Pa usch'e java lhavô'ficlesh pa clesanilh yacutch'e; pa lhacôm'a ti tajunesh shi' ti vancavômjatesha'ne, shi' ti t'ôsch'een java lhcat'iyas. Jô lhech yaquiset venalhjunashc'oya lhacôm'a java apis ti yi'shi' yitô'vat, pa napu'nôjesh java lhac'uc yiesh ja lhshatech.*xs*

⁸ Meelh ti jovalhey java lhac'uc, pa ja'vaneyshi java lhech ti tôlhshaam lhja lhac'u' tiqu'in, pa lhechesh pa niclan'e java pu'jana lhac'uc ti nôy'e pa yôj'esha'ne yiey pa tôlh'e'. Lhjô lhech caaj java lhtôsjey jan lhjunash java lhtôsjey pa nivacle, vooy ja lhashi pa yasinôqui java acloj ya'sheshchisham.*xt*

Pa lhclôyitsjayash pa Dios

⁹ Pa lhetipa ti jovalhey yamjey ti ja'van java vatc'oovtes ti chiyan'e'*xu* ti yie'sha'ne ja nitaôvclaja. Lhja t'uyjatshiy clim jan lhjunash pa yecleshe, vooy java lhayees lha'yasha pa isshi' tashinshtaj lhsaash.*xv* Vooy ja lhc'o'vat shi' java lhafoclesh itôj tach'acjesesh,

¹⁰ vooy ja tovôc itôjesh ti nash'e t'ajuyish jô lhech.*xw* Pa yaash ti mil japi t'acu'mem'in, pa yaash ti miliones jat'ajôôj japi vatsavat'e t'ajuyish. Pa tcaasclanchaych'e pa yi'sha'ne, vooy java vatqu'isjayanjas pa chinc'aatshamsha'ne.*xx*

¹¹ Pa jovalhsha'ne chin, tôlh'ejop java yaash lhclishay lhja lhac'u' tiqu'in ti yit'esh'in; jôjjeclay jovalhsha'ne pa chiyiclôn ja yaquiset pa chiyvômjatshisha'ne pa chiyu'jam ja itôj ti chinapjunesham.

¹² Shi' shta jav'elh yaquisetes ti chinjôcleshch'e pa t'unaj, taj ti lhetipa mônlhasha'ne vooy ti yameyjop pa t'aplhu'a.

¹³ Pa lhetipa ti yi'shi' yitô'vat ti ja'van jô lhech tulh. Pa tatsha: Ti javanjulh ti nachesh ti yi'shi' java vôsey pa lha'yasha ja lhaôs ja nivacle,*xy* jô lhech yichey pan yie' ja Nitaôvclaja; pa tanc'uyey jô lhech.

¹⁴ Pa chiyjuteem ja vat'unaj, ja lhnôclôjqueyash shi' ja lhanvacleyash, pa lhacôm'a japi lhchifas shi' japi tavujuya lhcliish pa t'acu'mem'in.*xz* Ja t'unaj lhetlhataj'in yajatesh, ja lhanvacleyash tan jayu ca nivôômjane.

¹⁵ “Yivaatsha, ya Daniel, pa tsijovaychat'in ti yaashyitapee; pa tsaychavalhjat'in lhacôm'a java ja'van,

¹⁶ pa jayc'uyey lhôn ja ve'lha japi lhech vatsavat'e, pa jayaalhsha ca ninôclitch'eyam lhacôm'a java lhech. Jô lhech t'acumeshyijulh ti nôclitch'eyam, pa yit'eshyam shta:

¹⁷ Navôque yichatjulh yaquisetes lhech japi yichatjulh lhcaanvacles ti yash'apee jayu na cotsjaat.

¹⁸ Taj ti pa nanjooylhach'e ca chinjuteem napi lhchifas pa Dios yaashchisham, ti yitsôt'ajesh lhacôm'a ti ôyjôlhôyech'esh,’*xa*

¹⁹ Pa jen lhôn yivaatsha ca na'shesh ca nastôya ja yichatjulheyshi yaquiset, ti vena lhjunashc'oya jav'elh, lhayaash ja lhjunash ti suy'e: ja lhavô'ficlesh pa clesanilh yacutch'e shi' ti lhpônôqueyesh pa clesanilh yucch'e; pa lhacôm'a ti tajunesh shi' ti vancavômjatesha'ne, pa t'ôsch'een java lhqu'i'yas.

²⁰ Shi' shta ti jen lhôn ca na'shesh ca nastôya java napu'nôjesh lhac'uc, shi' lhja tiqu'in lhac'u' ti caaj java lhtôsjey shi' ja lhashi ti yaash java yasinôqui, pa yamjey ti yash'apee jav'elh lhac'uc, vooy java pu'jana lhac'uc pa nicôtch'esha'ne pa camamc'oya lhjô lhech.

²¹ Pa ja'van lhjô lhech lhac'u' ti yishanelh japi lhchifas pa Dios pa yash'apee,*xb*

²² yamjey ja Nitaôvclaja ti yivoyjateshemch'e japi lhchifas pa Dios yaashchisham,*xc* lhayaash ti yôfisch'e pa t'aplhu'a japi lhchifas pa Dios ti yijutlhavne jayu ja lhanvacleyash.

²³ Pa yit'esh: ‘Ja yichatjulheyshi yaquiset lhech ja yichatjulheyshi vatvacleyash ti caaj'e jayu na cotsjaat, ti vena lhjunashc'oya lhacôm'a jav'elh. ti tif'e' jayu lhacôm'a na cotsjaat, pa t'ôsch'een jayu shi' ti yivômjatshisha'ne jayu.

²⁴ Java napu'nôjesh lhac'uc lhechjpapi napu'nôjesh lhcaanvacles ti chinvacleyanshi jayu nôque vatvacleyash.*xd* Pa nanjooylhach'e japuque ti yash'apee jayu jeelh pa t'unaj, pa vena lhjunashc'oya jayu japi vatjutsa' pa yivômjatsha'ne jayu japi pu'jana japi lhech lhcaanvacles.

²⁵ Pa yiv'ojiyan jayu pa Dios yaashchisham pa yen ca nitif'e japi lhchifas; pa yajulhjatey jayu ca nanvaych'aclaj na lhayôjijat pa Dios shi' java lhfanish lhavach ti vatc'usinatesh'in, pa vooy japi lhchifas pa Dios pa vanashjatesh'apee jayu pa t'unaj pa nôqueshch'e java pu'jana nincôpes nôquee pa lhcachivat'eshi.*xe*

²⁶ Taj ti jan tcaasclanchay'ech'e yiesh'e jayu ca nasclanvatich'e, pa nijôclesh jayu pa t'unaj pa nivancalhifch'een lhacôm'a.

²⁷ Vooy ja vatvacleyash, ja vat'unaj shi' ja vatôclôjqueyash lhacôm'a java vatvaclevshay nash'apee na cotsjaat, pa chiyjuteem jayu japi lhchifas pa Dios yaashchisham.*xf* Ja lhanvacleyash yajatesh jayu ti caaj,*xg* pa lhacôm'a japi lhtachifas'e na cotsjaat ti t'acumesh'in jayu shi' ti nequ'ishamesh.’

²⁸ “Nôque yôjesh'e ti chiychaych'e. Yivaatsha, ya Daniel, uj ti tsaychavalhjamatan'in pa tsiclimiyanchisham; taj ti niyit'eshe'ma pa'na papu ja lhjunashch'e côque.’