Daniel 6 - Nivaclé Bible

Pa Daniel yich'e' lhpa lhôvjoque' pava jump'uvalhjetas

¹ Ja lhcaanvacle Darío yaychavalhey ti yetônjop japi ciento veinte ti lhcaanvaclesesh java lhavtsates jaspa vacôtsônesh ti yiclôvalh ja lhanvacleyash.

² Pa yan'e' t'ajuyish japi lhech japi pu'jana yashjatchisham pa jaspa niclôvalhesh ja t'acum'een japi lhcaanvaclesesh, pa jaspa tanca pitôjeesh'in pa'na ja lhcaanvacle. Ve'lha ja chiyashjatchishamc'oya lhech ja Daniel,

³ jô lhech chivenchatc'oya jap'elh chiyashjatchisham shi' ti lhanvaclesesh ti tôlh'ejop pa uj lhcajôysha; pa lhe'naa ja lhcaanvacle ti yaychavalhajop ti yan'e' t'ajuyish ti lhanvacleeshc'oya japi lhchifas.

⁴ Pa lhechesh japi chiyashjatchisham shi' japi lhcaanvaclesesh vo'tajeysha'ne pa ca nitôlh'ejop ca niyôytanesh ca nisaa ti t'acuumjiin ja lhanvacleyash, taj ti nan lhjunash ja Daniel jô lhech nivacle ch'anjamatsej pa ninvanesh ts'ivee pa ca saseesha'ne; pa lhe'naa ti sasemjop ti ampa ca nicaclecleyanesh jô lhech.

⁵ Taj ti pa lhetipaesh ts'ivee ti yaychavalhey pa ca lhfanisheesh, pa yit'esh ts'ivee: “Nishtavanshelh pa ca ve'lhaa ca nitôlh'ejop ca sht'iyôytanesh ja Daniel, ey ca lhecha ca nicaaj pa lhjunash ti yôclôj pa lh'Dios.”

⁶ Nôque lhjunash japi chiyashjatchisham shi' japi lhcaanvaclesesh pa yivo'yeshvatjulh pa t'ônash ti yichey ti tasinôyshelh ja lhcaanvacle Darío, pa meelh ti yieyshi ts'ivee pa yit'esh: —¡Na Yinvacle yajatesh ti mônlha!

⁷ Lhacôm'a japi lhcaanvaclesesh japi vatachifas apis ti yasinôqui ti yivo'yeshvatjulh ti chiypeya'eshvatam, ti yivaclhiteshjop na lhcaanvacle ti tayôjijanesh ca nôqueshch'e pava treinta nalhus ti ya aj na papu ca nit'a'lha pav'elh chiydiosiyan nilhecha pa nivacle ca ve'lhaa na Yinvacle. Papu ca ninanc'ashamtajeesh pa tajulhey jayu ca chinuqu'e lhja lhôvjoque' java jump'uvalhjetas.

⁸ Pa lhe'naa, istaa ca ananshi na Yinvacle na chiyvaclhiteshjop pa ani'sesh'e, jaspa saseemjop papu ca vena lhfanisheesh, nan t'ônash na lhayôjijat napi Meda shi' napi Persia lhavos pa sasjop ca chinvômjatshi.*xn*

⁹ Côque ti yi'van ja lhcaanvacle Darío pa vani'sesh'e ja chiyvaclhiteshjop.

¹⁰ Pa meelh ja Daniel ti yitô'ya ja chiyvaclhiteshjop ti chivani'sesh'e, pa yichey ja lhajpôyich, pa nic'at'ey java lhovalhjates ja yijo'ôcjiin javan tavaysham ja Jerusalên,*xñ* pa yujane t'acjatsuy ti t'aalh shi' ti yôclôj pa lh'Dios. Côque lhfanishesh ti pu'janaesh ti t'aalh ve'lha nalhu,*xo* yiey jan yajatesh ti lhfanishesh'in.

¹¹ Pa lhechesh japi lhech nivacle pa yich'ôcjivatjuulh ja lhajpôyich ja Daniel, pa yi'van ts'ivee ti t'aalh shi' ti yôclôj pa lh'Dios.

¹² Pa yichesheyshi tatsha ja lhcaanvacle ti yasinôqui ja yivaclhiteshjop, pa yit'esh ts'ivee: —Na Yinvacle, apis ti chinape'yeeshvatam na chiyvaclhiteshjop na lhech chiyit'esh ca nôqueshch'e pava treinta nalhus ca nit'aalhtaja papu pa lh'dios ja't'ajesha pa nivacle pa nilhecha na Yinvacle, pa chinuqu'e jayu lhja lhôvjoque' java jump'uvalhjetas, ¿ni lhech lhjunasha? —Lhech lhjunash —yit'esh ti yicuulh ja lhcaanvacle—. Na chiyvaclhitesh isjop ca chinôfisjatch'e nan t'ônashesh na lhayôjijat napi Meda shi' napi Persia lhavos, pa sasjop ca chinvômjatey.

¹³ Pa lhechesh japi lhech ti yit'esh ts'ivee shta: —Jô lhech Daniel, ve'lha tô'lha japi judíos ti chiysaas lhapesh, pa ninôclesh ca nach'anjulh na Yinvacle nilhecha ja chiyvaclhitesh ti chipeya'eshvatam, javanshelh ti pu'janaesh ti t'aalh ja ve'lha nalhu.

¹⁴ C'oya ti yipe'ya côque ja lhcaanvacle, pa yitacshinjayan'in, pa vooy pa ca lhfanisheesh ca chinalhjen ja Daniel. Yamjey ti yuy na jumcuclaay ti voo'mey lhacôm'a pa isem'ejop ca chinalhjen ja Daniel,

¹⁵ taj ti japi lhech nivacle pa yichesheyshi shta ja lhcaanvacle, pa yit'esha ts'ivee: —Na Yinvacle natô'ya jô ja nash'e ja lhayôjijat napi Meda lhavos shi' napi Persia lhavos ti nive'lhaa papu na chiyvaclhiteshjop ti lhni'sesh'e na Yinvacle, ti sasjop ca chinvômjatey.

¹⁶ Pa lhechesh ja lhcaanvacle tayôjijanesh ti chinchajey ja Daniel shi' ti chiyuqu'e lhja lhôvjoque' java jump'uvalhjetas. Taj ti vooy ti yujeey ca nôfisch'e pa lhnutsjayash vooy ja lhcaanvacle yit'esha ja Daniel: —¡Pa a'Dios, pan lhatcumeshem'in pa yivo'yeshch'e, pa nalhjen jayu!

¹⁷ Vooy ti yich'e' tasham ja Daniel lhja lhôvjoque' java jump'uvalhjetas, pa chinchajey lhja utej pa chiyp'oojey ja lhashi'esh lhja lhôvjoque', vooy ja lhcaanvacle pa yi'sesh lhja lhcaniscôte'esh ja lhanvacleyash shi' ja lhcaniscôte japi chiyashjatchisham ti lhcaanvaclesesh, ca jaspa chinôfisjatemch'e shta ja Daniel ja chiyijôtjatch'e ti yi'shi' ja vatyôjijat.

¹⁸ Pa nijooylhach'e ja lhcaanvacle ti vapecley ja lhajpôyich pa yijo'jane pa ninattsaccun pa ninacheyshi papu ca nitasinôyelhsha'ne; jô'tajesh ti ninmô' jô lhech tulh.

¹⁹ Ti nôcjuulh ja nalhu pa nitshaam tatsha ti yifaclitey lhja lhôvjoque' java jump'uvalhjetas.

²⁰ Meelh ja lhcaanvacle ti sha'lheema, ti tôneyshi ja Daniel ti ts'aclaych'e ja t'ôjôj, ti yit'esh: —Daniel, lhcavo pa Dios pan mônlha, ¿iseemjop pa a'Dios, pan lhatcuumjem'in ja yivo'yeshch'e ti nalhjenesh nava jump'uvalhjetas?

²¹ Ja Daniel yit'esh ti yicuulh: —¡Yajatesh ti mônlha na Yinvacle!

²² Pa yi'Dios nichenyiy na lh'ángel, na lhech yip'o'jam nava lhashic nava jump'uvalhjetas,*xp* pa jaspa ampa ca nasvo'matan'e, lhayaash ti yitôy'yi pa Dios ti ampa ca nitôlh'ejop shi' ti ampa ca yifanisheesh pa niysa' ca yijuyishjulh na Yinvacle.

²³ Pa lhechesh ja lhcaanvacle ujesh ti nishamesh pa tayôjijanesh ca chinayjatch'e ja Daniel lhja lhôvjoque' java jump'uvalhjetas. Meelh ti chiyayjach'e pa nichinvanesh pa ca lhavo'mat'a, lhayaash ti yicafiyan pa lh'Dios.

²⁴ Pa nijooylhach'e ti tayôjijanesh ja lhcaanvacle ca chinanchajey japi nivacle japin yiyôytana ja Daniel, pa shi' japi lhjayas shi' japi lhcles ti chiyuqu'een lhja lhôvjoque' java jump'uvalhjetas; jôjjeclay ninamqu'e tasham ti p'alha ti t'ecletjulh java jump'uvalhjetas japi lhech ti yijuujane.

²⁵ Pa lhechesh ja lhcaanvacle Darío pa yiisshem'e lhacôm'a japi lhchifas shi' japi vena t'ônash ja lhcliish yiey na cotsjaat, ti yit'esh: “Jenelh'am avaatsheelh na vatpiiyash shi' ca isa' pa ajunashelh,

²⁶ pa tôlhyi' ti c'ayôjieshelh'a lhacôm'a napi yi'shi' na yinvacleyash ca avijatanelhjulh shi' ca ach'anelhjulh pa lh'Dios na Daniel. “Lhayaash pa lhech Dios ti mônlha, pa yajatesh ti caaj. Na lhanvacleyash tanca ve'lheesh ca nivôômjane shi' pa t'unaj ampa ca nôj'e'.

²⁷ Pa lhech lhavaatsha lhavqu'ilhjenaj shi' ti vancafamatan; pa lhech nôclit pava lhasnôyjes yiey pa vôôs yiey shta na cotsjaat. Lhavaatsha yilhjenesh na Daniel java lhpanôquey java jump'uvalhjetas.”

²⁸ Vooy ja Daniel pa lhetipa ti chiyanshi' ti chiyashjatesh ja lhanvacleyash ja Darío, shi' shta ja lhanvacleyash ja Ciro, lhanvacleesh ja Persia.