Daniel 5 - Nivaclé Bible

Pa vani'sesh'e pa jpôyich

¹ Ja Belsasar, lhanvacleesh ja Babilonia, pa t'alhajop pa uj vatôc japi mil chiyashjatchisham lhanvaclesesh japi lhchifas; lhavôjeshch'ejulh ja lhôc ja lhcaanvacle shi' japi t'alhajop, ti ujesh ti yiyô'jisha'neen ca ôtjayetas t'i'.

^2-3 Nishclôjqu'e ts'ivee ca ôtjayetas t'i', vooy ja lhcaanvacle Belsasar tayôjijanesh ti chinchajey java t'iyôjatshiyis shi' java tacfeyisesh pa clesanilh cojiyaj shi' java climsha'ne javan yicha'jey ca lhtata Nabucodonosor ja vatishjanjavat yiey ja Jerusalên. Java t'iyôjatshiyis shi' java tacfeyis pa chinchajey ti yiyô'jelh japi lhech ja lhcaanvacle, japi lhjayas, japi yictsôyansha'ne atesha shi' shta lhacôm'a jap'elh nachey'in ja vatôc.

⁴ Lhacôm'a ti yiyô'jisha'ne ts'ivee ca ôtjayetas t'i', pa yôclôjesh pava lh'diosec, chiyisnatesh pa clesanilh cojiyaj, pa clim, pa yucch'e shi' pa yacutch'e, pava yeclôy shi' pava utes.

⁵ Pa lhech t'aplhuqu'e ti tanôclitem pa lhpôcôt pa nivacle, pa nôclita pa lhqu'isjuyaj pava itôtas, pa yi'sesh'e pa lhpasch'e pa yinesh ja jpôyich yiey pa tasham. C'oya ti yi'van ja lhcaanvacle pa vatpôcôôt ti yi'sesh'e,

⁶ pa yiclimiyanchisham, pa nijovayshi ti yi'ôcji, pa lhechesh pa yits'anaanjat java lhafoc pa yamjey lhshatech.

⁷ Pa nijooylha ti tôn'in ti t'a'lheyjop japi lhavitôyjes, japi caaj pa lhcajôysha shi' japi vôntôyitesh pava catiis yiey ja Babilonia, ti yit'esha: —Papu ca netôntajch'e ja chiyi'sesh'e shi' ca ninôclitajch'eyam pa yich'e', pa nuych'e jayu pava yacutinilhesh, pa nitinshichi pava vatinshesesh pa clesanilh cojiyaj pa nôv'e' jayu pa pu'jana'eyshi lhc'ovat na yinvacleyash.

⁸ Pa lhacôm'a japi caaj pa lhtôycheyash japin t'acumem'in ja lhcaanvacle pa yich'ôcji ts'ivee ja lhtôvash tasham, taj ti ampapu ca nitôyc'oya pa yich'e' pa chiyi'sesh'e ca ninôclitemch'e ja lhcaanvacle.

⁹ Pa lhechesh pa uj ti nijovayshi ja lhcaanvacle Belsasar, pa climemch'e lhacôm'a ja lhtaco. Vooy japi lhcaanvacleseshelh ja lhcaanvacle pa nintô'yish pa ca lhfanisheesh.

¹⁰ Taj ti lhja lhcaanvacle lhamimi, ti yipe'yeey ja t'ôjôj ja lhaôs lhcaanvacle shi' japi chiyashjatesh ti chit'a'lhajop, ti yich'ôcji ja lhtôvash yiesh'ôcji ja vatôc, pa yit'esha: —¡Yajatesh ti mônlha na Yinvacle! Pa ya aj ca naychavalhjamatan'in pa ya aj ca naclimiyanchisham,

¹¹ na lhanvacleyash yi'shi' ja ve'lha nivacle yivoyjateshch'e pa lh'Espíritu pa issha'ne Dios. Meelh ca lhtata na Yinvacle ti lhcaanvacleesh, jô lhech nivacle nôclitem pa is lhaychavalhjayash shi' pa lhtôycheyash shi' pa uj lhcajôysha jan lhjunash nava diosec. Pa lhe'naa ca lhech lhcaanvacle Nabucodonosor, lhtata na Yinvacle, pa yetônesh jô lhech nivacle ti lhanvacleesh lhacôm'a napi lhavcajôyshinjas, napi vatvitôyjes, napi caaj pa lhcajôysha shi' napi vôntôyitesh pava catiis yiey napi lhchifas.

¹² Lhech ja Daniel, jan yanshi' ca lhcaanvacle ti lhqueyesh Beltsasar, ti yinôôlhjônchatem pa lh'epíritu shi' pa lhtôycheyash shi' ti yitôyc'oya nava matas ti vôntôyitc'oya pa t'ônashch'e pava vatatsamatas, ti nôclitch'e pa nash'e pava ya'clishay tastaych'e shi' ti yisclanvatich'e pava chiyisnatesh yuyvatsham'in. Ôneyjop na Yinvacle ja Daniel, vooy jô lhech natôyjatc'oya jayu pa t'ônashch'e na chiyi'sesh'e nôque jpôyich.

¹³ Vooy ja Daniel pa chiychajeyshi ja lhcaanvacle, vooy ja lhcaanvacle pa niy'ôs'in: —¿A'lhech avaatsha a'Daniel lhtô'lha japi judíos yôcfasha'ne ca tata lhcaanvacle Nabucodonosor ti tôlhesh'e ja Judea?

¹⁴ Chiyit'esh'yam ti caaj'am pa lh'Epíritu pa Dios, ti nôôclhach'e pa aychavalhjayash ti a'lhech ujesh ti natôyc'oya shi' ti caaj pa acajôysha.

¹⁵ Caajtaj japi nivacle ti yaashtajesh pa lhcajôysha yiey napi lhchifas nôque namtaj'e ca netônch'eyam nava ya'clishay shi' ca ninôclitch'eyam pa t'ônashch'e, taj ti pa ampa ca nitôy'ec'oya ts'ivee.

¹⁶ Taj ti jaypeeychay'ash ti chiyit'esh'a ti lhnôclitch'e pa ti nic'ôôjlha'ach'e shi' ti lhasclanch'e pava chitay'ôtsjanesh tavijataych'e. Ca natôôytajesh ti lhetônch'e navôque ya'clishay pa at'esheyam pa t'ônashch'esha'ne, pa c'uyjatch'e jayu java yacutinilhesh pa c'atinshiyanesh jayu java vatinshesesh pa clesanilh cojiyaj pa lhôv'e' jayu na pu'jana'eyshi vatc'ovaatjop na yinvacleyash.

¹⁷ Pa lhechesh pa yit'esh ti yicuulh ja Daniel: —Yaajlhee na Yinvacle nava acufayjates pa ajutem pap'elh tanch'anjayesh yiey na ajpôyich. Yivaatsha janôclitch'eam jayu lhacôm'a na lhjunashch'e na Yinvacle nava yit'esh'in navôque ya'clishay ti chiyi'sesh'e na jpôyich.

¹⁸ “Pa Dios yaashchisham pa yijutem na lhanvacleyash shi' pa t'unaj, pa lhasnôycheyash shi' pa lhanch'anjayash ca atata Nabucodonosor na Yinvacle.

¹⁹ Pa lhech t'unaj ti yijuteyjop lhacôm'a napi lhavelhavot, napi lhchifas shi' napi vena t'ônash pa lhcliish pa tach'anjulh shi' ti nijovayjulh cô lhech. Cô lhech vancaclôn ja't'ajesha ti yimônlhanit pa yie' papu ti yen; caaj papi ti yashjatchisham vooy pap'elh ti yachajshicham.

²⁰ Taj ti meelh ti yamqu'een pa lhnunatsjayash pa t'acu'mesh'in pa lhav'ojiyash shi' ti vanashjatchisham pa chinjôclesh'in pa t'unaj shi' pa lhnôclôjqueyashesh ti lhcaanvacletajesh.

²¹ Pa tanuc'oya japi nivacle pa yalhatajesh ti yaquiset'esh; pa yishi'in pava cuvôyutas yalhanashch'een, pa tuj pava yiteej jan lhjunash java vôcôc vooy pa yiyaas pa yivayit pa lhavu'vat, yamjey ti yitôôysha pa Dios yaashchisham ti caaj pa t'unajjop lhacôm'a pava lhanvaclevshay napi nivacle, pa lhech yijutem pa lhanvacleyash pan yie' papi yenesh.

²² Vooy nôqueesh, na Yinvacle Belsasar, nan lhô'sesh cô lhech ti natôôysha pava vaclanem, pa naalhecha ca vi'shi' pa vatants'aclanjayash.

²³ Pa vena ajunash, na Yinvacle ti lhanvaclematan pa Lhcaanvacle yiey pa vôôs ti lhtôyôjijanesh ti chinchaj'ay yiey na vatsaccunjavat nava vat'iyôjatshiyis shi' nava tacfeyis ti yi'ôcji ja vatishjanjavat, pa ave'lheeshelhsham napi lht'a'lhajop ti t'iyôjelhshi ca ôtjayetas t'i' shi' ti lhôclôjeshelh nava dioseclesh ti chiyisnatesh na clesanilh cojiyaj, na clim shi' na yucch'e, na yacutch'e, nava yeclôy shi' nava utes; nava diosec ampa lhtôvat'a, ninatpeeychey, pa nintô'yish pa'na. Pa naalhechiyan ca ôclôjelh pa Dios pan caajem pa amônlhajayash na Yinvacle*xl* pan acaclecsha lhacôm'a pa ti lhasnatesh.

²⁴ Pa lhe'naa ti t'ajayeshey pa lhpôcôt ti yi'sesh'e navôque lhclishay,

²⁵ MENE, MENE, TEKEL y PARSIN,

²⁶ nava lhech nôque yich'e': MENE: Pa Dios ti yitsjuulhshi java lhnalhusesh na lhanvacleyash na Yinvacle, shi' ti yinôôclhanitey pa yôjat'e;

²⁷ TEKEL: Na Yinvacle chiyitsjuulhshi pa lhcaclecli pa shichaam pa lhcaclecli;

²⁸ PARSIN: na lhanvacleyash na Yinvacle ti chiycatsônjatvatsham pa chiyjuteem jayu papi Media shi' papi Persia lhavos.

²⁹ Pa tayôjijanesh tatsha ja lhcaanvacle Belsasar ti chiyuyjatch'e ja Daniel java yacutinilh shi' ti chiytinshiyanesh pava vatinshesesh pa clesanilh cojiyaj, pa nifaclem lhacôm'a tatsha jô lhechesh ja Daniel ti yan'e' ja pu'jna'eyshi lhc'ovatjop ja lhanvacleyash.

³⁰ Jô lhech tulh chiyclôn ca Belsasar, lhanvacle japi caldeos,

³¹ *xm* vooy ja Darío Media lhavo' pa chincayôjatsham ja lhanvacleyash. Vooy ja Darío jô lhecheshch'e ti sesenta y dos java lhnincôpes pa t'aplhuqu'e.