Daniel 4 - Nivaclé Bible

Lhcôccheyash pa lhcaanvacle Nabucodonosor

¹ *xg* “Yivaatsha, ya lhcaanvacle Nabucodonosor, jenelh'am na vatpiiyash shi' ca isa' pa lhjunash napi nivacle lhacôm'a napi lhtatvelhavot, napi lhtachifas shi' napi vena t'ônash pa lhcliish ti yiey ts'ivee na cotsjaat.

² Jen ca natôôyshelh java matas lhasnôyjes ti yisnateshyam pa Dios yaashchisham.

³ ¡Ti yaash java yinôôclhanita shi' java lhasnôyjes! Pa lhanvacleyash yajatesh jayu ti caaj, vooy pa t'unaj lhet lha yicheneshi jayu pa t'ajôôjam pa namjey papi nijooylhach'e lhcles.

⁴ Yivaatsha, ya Nabucodonosor, yacano ti yiey ja yijpôyich pa vaclanyam pava acloj matas isis.

⁵ Taj ti ve'lha ja tulh, ti jajo'jane, pa caaj ja yitsamaat ti tsijovatsjan, vooy java yaychavalhjanôc shi' java yi'shi' yitô'vat yamyich'een ja vatjovayiesh.

⁶ Pa lhechesh pa jayiyôjijanesh ca ninacheshyi lhacôm'a japi caaj pa lhtôycheyash yi'shi' ja Babilonia, ca jaspa ninôclitcheyam pa t'ônashch'e ja yitsamaat.

⁷ Pa nach'in lhacôm'a japi lhavcajôyshinjas, japi tôyjes, japi caaj pa lhcajôysha shi' japi vôntôyitesh pava catiis yiey na Babilonia, pa janfactajem ja yitsamaat, taj ti pa sasemjop ca niteetsheyam pa t'ônashch'e.

⁸ Pa nijooylhach'e ti nacheshyi ja Daniel, lhanquey shta Beltsasar ti yônasheshjop ja yi'dios, vooy pa lhamônlhajayash yivoyjateshemch'e pa lh'Espíritu pa issha'ne Dios, pa janfaclemch'e shta ja yitsamaat yiey jan yifanishesh tatsha:

⁹ ‘Na Beltsasar, lhanvacleesh japi vatvitôyjes, tsitô'yish'a ti navoyjateshch'e pa lh'Espíritu pa issha'ne Dios, ti natôyc'oya lhacôm'a pava t'astaay. Ach'anesh'yi cum jan ja'van ti janjujôm, pa anfacyam pa t'ônashch'e.

¹⁰ Cavôque yi'shi' yitô'vat ti jajo'jane ti jamô': Yiey na lhcachivat'eyshi na cotsjaat ti caaj lhpa ve'lha aacjiyuc ujquishaam.

¹¹ Lhpa lhech aacjiyuc tôlhshi' pa ujesh ti ujqu'e'; vooy ja tc'ach'e yameychisham pa vôôs pa chiyvaney'in lhôn ti yiey java yôj'esha'ne na cotsjaat.

¹² Pa isis pava lhsashay pa yaash pa t'ajôôj pava lhay, pa chitajulhsham lhôn ti chituj lhacôm'a pava lhay. Pava yaquisetes yi'shi' pava jotoy pa tajpecley'ôcji, vooy pava lht'oy pa tupiyshi pava ajôclôs pa tôlhesha lhôn ti yimônlhanit lhacôm'a napi yiey na cotsjaat.

¹³ Pa ya'lhatajesh ti ja'van ti yi'shi' yitô'vat ja ve'lha ángel ti yovalh'apee ti tôlhey pa vôôs,

¹⁴ ti yisitsenesh ti yit'esh: ‘Aflhitshicham lha aacjiyuc, ca at'ovôsch'e nava lht'oy, pa ayjat'een nava lhsashay pa acatsônjat'in nava lhay. Ca niclôt'in nava yaquisetes ti tajpecleyshi shi' shta nava ajôclôs ti yi'shi' nava lht'oy.

¹⁵ Taj ti yaajlhashi na cotsjaat lha lhtatsuc shi' nava lhfetatsiy; pa iyitsjatesh'e java calenasesh clesanilh yacutch'e shi' pa yucch'e, pa yaajlhee java yiteej yi'shi' na joot. Ca ninateyshicham pa yiyaas lha lhech, ca nivancufanesh'e nava yaquisetes nava yiteej yi'shi' na joot.

¹⁶ Vooy pa lhaychavalhjayash pa tsisasinitesha'ne jan lhjunash pa yaquiset, pa lhech niysa' pa tsicheneshch'e pava napu'nôjesh nincôpes.

¹⁷ Côque lhivalhcheyash ti yinôôclhaniteyam papi isissha'ne ángeles ti yovalh'apee, jaspa nitô'ya lhacôm'a napi nivacle pa lhech Dios yaashchisham ti caaj pa t'unajop pava lhanvaclevshay napi nivacle, pa lhech yinvacleyan papin yie' ti yijutem*xh* shi' ti yinvacleyanesh papi vatachifas pan yashjat ti yachajshicham napi nivacle.’

¹⁸ Côque ana vatatsamat yivaatsha, ya lhcaanvacle Nabucodonosor, ti caajyam. Nôqueesh, na Beltsasar, pa anfacyam pa t'ônashch'e, lhayaash ti ampapu napi caaj pa lhcajôysha yi'shi' na yinvacleyash ca nitôyc'oya; taj ti avaatsha isjop'am jayu ca ashinitjatyam, lhayaash avaatsha ti yi'atshi pa lh'Espíritu pa issha'ne Dios.

¹⁹ “Pa lhechesh ja Daniel, jan lhanquey shta Beltsasar, pa yaychavalhjat'in ti yits'ecliyan tôlh'ejop pava lhaychavalhjanôc ti natey'in lhshatech. Taj ti yivaatsha, ya lhcaanvacle, jayeetshem: ‘Na Beltsasar, ya aj ca naychavalhjamatan'in na yitsamaat ti caajyam, pa ya aj ca lhecha ti lhnôclitch'e.’ Pa yit'esh ti yicuulh ja Beltsasar: ‘¡Pa yijô, lhacôm'a ca t'ônashch'e na atsamaat jentajem ca lhecha napi naac'utsfasa, na Yinvacle!

²⁰ Lhpa aacjiyuc ujquishaam ujqu'e' shta ti yi'van na Yinvacle, lhpa lhech ti yameychisham pa vôôs ti chiyvaney pava lhôtôj'e yiey pava tosey na cotsjaat,

²¹ ti isis pava lhsashay shi' ti yaash pava lhay ti chitajulhsham lhacôm'a ti chituj, pa tajpecleyshi pava yaquisetes yi'shi' pa joot shi' ti tupiyshi pava lht'oy pava ajôclôs,

²² lhpa lhech aacjiyuc lhech na Yinvacle, ti tôlhshi' shi' ti yaash pa t'unaj. Pa t'unaj na Yinvacle ti tanapshin'e pa yameychisham pa vôôs, vooy pa t'ashjayash yam'apee lhacôm'a na cotsjaat.

²³ Na Yinvacle ti yi'van shta pa ve'lha issha'ne ángel ti yovalh'apee tôlheychisham pa vôôs ti yit'esha: Aflhitshicham lha aacjiyuc pa at'ôvôssha'ne, taj ti yaajlhashi na cotsjaat lha lhtatsuc shi' nava lhfetatsiy; pa iyitsjatesh'e nava calenasesh na clesanilh yacutch'e shi' na yucch'e, pa yaajlhee nava yi'shi' yiteej yiey na joot. Ca ninateyshicham pa yiyaas lha lhech, pa nivancufanesh pava yaquisetes pava yiteej yi'shi' na joot ca nôqueshch'e pava napu'yama nincôpes.

²⁴ Côque nôque yich'e' pa lhivalhcheyash pa Dios yaashchisham ti yivaclhiteshjop ti t'ajuyjulh na Yinvacle.

²⁵ Vooy na Yinvacle tanuc'oya jayu napi nivacle pa yi'shi'in jayu pava yaquisetes; pa tuj jayu pa yiteej jan lhjunash pava vôcôc, pa vooy pa yiyaas pa yivayit jayu na lhavu'vat. Nôque lhjunash jayu pa ca nôôvtaj'e na Yinvacle pa nôqueshch'e pava napu'nôjesh nincôpes, namjey ca nitôôytajesha pa Dios yaashchisham caaj pa t'unajop lhacôm'a pava lhanvaclevshay napi nivacle, vooy lhavaatsha yinvacleyan pan yie' papi yenesh.

²⁶ Ti tanyôjijayesh ca yaajlhashi na cotsjaat lhpa lhtatsuc shi' pava lhfetatsiy nôque yich'e' ti chiyachajeyjop jayu na Yinvacle na lhanvacleyash ca natôôytajesha pa Dios ti caaj pa t'unaj.

²⁷ Pa lhe'naa, ca lhetipaaesh na Yinvacle nôque ti c'acajôyshiyanesh: avaatcumjat'e pa yivo'yeshch'e pa ya aj na ca asnatesh t'ôyish'e pa niysa'; pa lhech ôjesh'e pava niysisa pa efenesh papi ts'aclaaysha'ne. Ca lhech lhjunashtaja na Yinvacle ti isjop ca nôvji' pa vatpiiyash shi' ca isa' pa lhjunash.’ ”

²⁸ Lhacôm'a cavôque matas ti chinfaclemch'e ja lhcaanvacle Nabucodonosor, pa yôfisjatch'e:

²⁹ Nôjeshch'e ja ve'lha nincôôp, lhan'e ja lhcaanvacle pa yich'apee ja lhôtôj'e ja lhajpôyich yiey ja Babilonia,

³⁰ pa yit'esh: “¡A'va yaash ti uj na Babilonia! Yivaatsha, uj na yunaj, ti jasnatesh na yivtsaatjop na yinvacleyash, jaspa chinôclit na yilhasnôycheyash.”

³¹ Jôjjeclay tasinôy ja lhcaanvacle ti yipe'ya pa vat'ôjôj tôlhey pa vôôs ti yit'esha: “Ach'aney nôque, lhcaanvacle Nabucodonosor. Na anvacleyash palha tanca natsôt'ajesh;

³² lhtanuc'oya jayu napi nivacle pa lhôvji'in jayu nava yaquisetes; lhtuj jayu nava yiteej jan lhjunash java vôcôc pa môôjqu'e pava napu'yama nincôpes, pa amjey jayu ca natôôytajesha pa Dios yaashchisham ti caaj pa t'unajop lhacôm'a napi vatachifas yiey na cotsjaat, vooy lhavaatsha yinvacleyan pan yie' papi yenesh.”

³³ Pa nivinshaa ti yôfi'semch'e pa lhnivalhcheyash ti chiychayeemjulh, pa vooy ja Nabucodonosor pa tanuc'oya napi nivacle pa tuj pava yiteej, jan lhjunash java vôcôc, vooy pa yiyaas pa yivayit ja lhavu'vat, pa yamjey ti tôôlh pa lhsaash shi' pava lhpanôquey jan lhjunash pava lhafas shi' pava lhpanôquey ja sheyônôc.

Pa lhavatsjancheyash pa Nabucodonosor

³⁴ “Meelh ti yôfisch'e jat'ajô'jesh ja yinivalhcheyash, yivaatsha, ya Nabucodonosor, jovalheychisham pa vôôs pa tsichavayeshyitay ti javatsjanesh na yicôccheycheyash; pa lhechesh pa javts'ôôj'e pa Dios yaashchisham shi' ti jôclôjesh navôque ya'clishay pan yajatesh ti mônlha: ‘Na t'unaj yajatesh jayu ti caaj; na lhanvacleyash mônlhashi jayu na t'ajôôjam namjey papi nijooylha.

³⁵ Yiey na t'ajuyish'e am'e napi tsitenas'e na cotsjaat. Lhavaatsha t'acu'mesh'in pava yen, pava yie' pa vôôs yiey shta na cotsjaat. Pa ampapu ca isa'emjop ca namateshc'oya pa t'unaj*xi* pa nichiniy'ôsesh'in ti t'acum'e yiey pa lhjunash ti t'acum'e.’*xj*

³⁶ Pa lhech t'aplhuqu'e ti chiyachajeyjop ti ya'isvatich'e, na lhasnôycheyash na yinvacleyash, na yinch'anjayash shi' na yunaj. Napi tsitsôt'ajesh yinvaclefas shi' napi chiyashjatesh na yinvacleyash pa nachyiy ts'ivee ti voyiysha'ne, pa ve'lheesh tsanshi' ti ya lhcaanvacleesh napi yichifas, pa jamjey ti ts'ashjatesh pa yunaj jan lhjunash ti nich'a.

³⁷ “Pa nôqueesh, yivaatsha, ya Nabucodonosor, pa jôclôj shi' ti jaych'anjulh shi' ti ts'ishamsha pa Lhcaanvacle tôlhey pa vôôs, lhayaash ti lhacôm'a pa ti yisnatesh yijô' shi' ti yivo'yeshch'e,*xk* pa iseemjop ti yachajshicham papi vatlheclôôjtaj ti vataanvacleyan.”