Daniel 3 - Nivaclé Bible

Chiyôclôj pa vatajpeclesh pa clesanilh cojiyaj

¹ Ja lhcaanvacle Nabucodonosor tayôjijanesh ti chiyisnatesh ja vatajpeclesh clesanilh cojiyaj, pa treinta metros pa t'aplhuquishaam pa pu'jana metros pa lhjuc'ach'e, pa tayôjijanesh ca chinan'e' yiey ja tavashay yiey ja Dura, yiey ja yitsaat Babilonia.

² Pa nijooylha ti tayôjijanesh ti chiytôney lhacôm'a japi lhanvaclesesh pava chiyie' ts'ivee, japi lhanvacles japi c'afoquelhay, japi lhanvaclesesh java yitsates, japi lhanvaclefas, japi pesoc lhavosesh, japi tcaasclanchaych'e, japi vôntôyitesh pa vatyôjijat shi' jap'elh lhcaanvaclesesh java yitsates, jaspa nachey'in ti tc'aeshvane ja vatajpec jan tayôjijanesh ti chiyisnatesh.

³ Lhacôm'a japi lhech chiyashjatesh ti lhcaanvaclesesh japi lhchifas pa tc'aevane ts'ivee yiey t'ajuyish ja vatajpec ti yisnatesh pa lhc'usiyashesh'in.

⁴ Jô lhech ti nifac ja tôlhesh'e ja vatc'usiyashesh'in pa tayôjijanesh ti yisitsenesh: “Ach'anelh'atshi nivacle lhacôm'a napi lhtatvelhavot, napi lhtachifas shi' napi vena t'ônash na lhcliish:

⁵ Vooy ca ape'yatajelh avaatsheelh ca chinfuyu'tajch'e nava vat'ônjanchey, shi' nava lhanôtas, shi' nav'elh vatôclôy pa acjatsuyelhshichamch'e pa ôclôjelh na vatajpeclesh clesanilh cojiyaj nan tayôjijanesh ti chiyisnatesh ja lhcaanvacle Nabucodonosor.

⁶ Lhacôm'a papu ca nint'acjatsuytajashichamjop ca nôclôj nôque vatajpec, pa chinuqu'e tasham jayu tatsha lhpa cotsjatishiy chiylhônch'e.”

⁷ Pa nôque lhjunash ti yipe'ya japi acloj tayvane pa t'ôjôj java chiyclôqui', pa t'acjatsuyshichamch'e ti yôclôj ja vatajpeclesh ja clesanilh cojiyaj.

⁸ Pa t'ajôôj jô japi caldeos pa yaychavalheyc'oya pa yiisinat'ejop ti yiyôytanesha japi judíos yiey t'ajuyish ja lhcaanvacle Nabucodonosor,

⁹ pa yit'esha ts'ivee: —¡Yajatesh ti mônlha na Yinvacle, pa yajatesh ti chivôntôyich'e na lhey!

¹⁰ Na Yinvacle apis ti yiyôjiesh'apee lhacôm'a napi yiey nôque cotsjaat pa t'acjatsuyshichamjop'in tatsha ti yôclôj na vatajpeclesh clesanilh cojiyaj ti yipe'yaan pa t'ôjôj nava chiyclôqui' vatôclôy,

¹¹ papu ca ni lhech lhfanishtaja lhavach pa chinuqu'een lhja cotsjatishiy chiylhônch'e.

¹² Taj ti caaj japi t'ajôôj jô judíos, japin yan'e' t'ajuyish na Yinvacle ti yinvacleyanesh nava yitsates yiey na Babilonia, ti niiy'a ca nach'ana na Yinvacle pa tanca nôclôj nava lh'diosec pa nilhecha ja vatajpeclesh na clesanilh cojiyaj nan tayôjijanesh na Yinvacle ti chiytsemaaj. Japi lhech ja Sadrac, ja Mesac shi' ja Abed-nego.

¹³ Vooy ja Nabucodonosor pa uj ti yivôcôyan pa tayôjijanesh ti chiychajeyshi ja Sadrac, ja Mesac shi' ja Abed-nego. Pa meelh ti yameyshi jan yie',

¹⁴ pa niy'ôs'in: —¿Yijô' avaatsheelh ti niôclôjelh nava yi'diosec, nilhecha na vatajpeclesh clesanilh cojiyaj nan jayiyôjijanesh ti chiyisnatesh?

¹⁵ ¿Avaatsheelh tajulhelhey'am jayu tatsha ca ape'yatajelh ti chiyclôqui' java vataclôy pa a'vuyelh'e t'ajuyish ja vatajpec ti jayiyôjijanesh ti chiyisnatesh shi' ca ôclôjelh? Lhayaash ca niôclôjtajeelh pa tatshaa ca chinu'elhch'e lhja cotsjatishiy chiylhônch'e; pa lhechesh, ¿she dios pa nalhjeneshelh jayu?

¹⁶ —Amelhyam pa ca naashelh'ejop côque —yit'esh ti yicuulh japi pu'jana nich'acsha'ne—.

¹⁷ Pa yi'Dioselh, pan jôclôjelhey'in, iseemjop lhavaatsha ca natvayeelhjulhyam pava tach'acjes lhpa cotsjatishiy shi' shta lhacôm'a pa niysa' ti lhfanishelhyish na Yinvacle, lhavaatsha tsilhjeneshelh jayu.

¹⁸ Taj ti ca ni lhech lhfanishtajeshelhyam pa yitôôyshelhyi jayu na Yinvacle ti tanca yôclôjelh java lh'diosec pa tanca yicjatsuyelh'e t'ajuyish ja vatajpeclesh clesanilh cojiyaj.

Papi pu'jana nich'acsha'ne ti chiyilhjeneshey lhpa cotsjatishiy chiylhônch'e

¹⁹ C'oya ti yipe'ya ja Nabucodonosor java lhclishay, pa yiyucliyanchisham ja lhtaco ja lhavôôc ti t'ajuyjulh japi pu'jana nich'acsha'ne. Pa lhechesh pa tayôjijanesh ca chincusiyanch'e lhja cotsjatishiy pa yashjat'apee ti napu'nôjesh ti chiylhônch'e yiey jan lhfanishesh'in;

²⁰ pa nijooylha ti yiyôjiesha japi t'ajôôj jô c'afoquelhay ya'shesh ti t'unesh'in ti yôcfa'sha'ne ja Sadrac, ja Mesac shi' ja Abed-nego, ti yujam java tach'acjesesh lhja cotsjatishiy.

²¹ Japi pu'jana nich'acsha'ne jôjjeclay mônlhach'e java t'uyjatshiyisjop ti lhcaanvaclesesh, ti chiyôcfeesha ts'ivee pa chiyu'qu'e lhja cotsjatishiy tujaam.

²² Jan lhjunash ja lhcaanvacle ti tayôjijanesh ti chiyôfisjatemch'e tatsha, lhjô lhech cotsjatishiy uj ti pjumtsejch'e, vooy java tach'acjes pa yama ti yivômjatsha'ne capi c'afoquelhay capin yu'tajch'e tasham japi pu'jana nich'acsha'ne,

²³ japi lhech nach'etasham lhja cotsjatishiy ti vanôôcfasha'ne.

²⁴ Pa lhechesh ja Nabucodonosor pa nitshaam tatsha pa uj ti nitôyiyjat, pa yit'esha japi lhanvaclefasesh: —¿Nishtu'elhsham t'e na itôj japi pu'jana nivacle vanôôcfasha'ne? —Lhech lhjunash —yit'esh ti yachajeshjulh ts'ivee.

²⁵ —Lhayaash ti javaneyshi napi yichatjulh nivacle ti tanuqueeshch'e ts'ivee, ti yachajshiin na lhcachivatshi na itôj pa ampa ca lhjunasheesh, vooy na yichatjulhesh nivacle lhayasha pa ángel.

²⁶ Ti yit'esh côque ja Nabucodonosor pa tac'uya ja lhashiesh lhja cotsjatishiy pa tôneyshi: —¡Na Sadrac, na Mesac shi' na Abed-nego, lhcavosesh pa Dios yaashchisham, ayelhch'e ca nôque anachelh'e! Japi lhech pu'jana tayshi java itôj tach'acjes,

²⁷ pa lhacôm'a japi lhcaanvaclesesh japi lhchifas lhech yie' pa tac'uya ts'ivee japi lhech nivacle, vooy java lhavuuvtes pa ampa ca lhjunasheesh pa itôj, pa yiclôvalhtajesh ts'ivee ti nive'lhaa pava lhayees ca nisucfayôqu'e pa nilhecha shta java yuych'e ca nivutunsha'ne, pa nilhecha ca chinansits'a'esh pa lhclot'aj.

²⁸ Pa lhech t'aplhuqu'e ja Nabucodonosor pa tônesh'in: “¡Chiyôclôjesh pa lh'Dios na Sadrac, na Mesac shi' na Abed-nego, ti nicheney ja lh'ángel pa jaspa yilhjenesh napi yivo'yeshch'esha'ne lhcavos, napin ninjôneshch'e na lhayôjijat na lhcaanvacle, yajulhjatajey ca nivafsha'ne ca nint'acjatsuyashicham ca nit'a'lha nav'elh chiydiosiyan pa nilhechtaja pa lh'Dios ts'ivee!

²⁹ Pa nôqueesh jayiyôjijanesh pa ca nôôvtaj'e pa nivacle ti yasinôquiesh pa niysa' pa lh'Dios napuque nich'acsha'ne, pa chint'ôvôôsshisha'ne pa vooy pava lhajpôyjey pa chinaclapju pava t'iyas, pa ca nôôvtaj'e papi lhavelhavot papi lhchifas, ja't'ajesha pa vena t'ônash pa lhcliish, lhayaash ti ampa ca'elhchaa ca diosa ca lhech lhjunasha ca natqu'ilhjey.”

³⁰ Pa nijooylhach'e ja lhcaanvacle ti yijutem japi pu'jana nich'acsha'ne ti yashjatesh java lhavtsates yiey ja Babilonia.