Daniel 2 - Nivaclé Bible

Pa lhtsamaat pa lhcaanvacle Nabucodonosor

¹ Ti yicheshch'e java napu'eyshi nincôpes ti chinvacleyan, vooy ja lhcaanvacle Nabucodonosor pa caaj java lhtsamatas, pa tôlh'ejop java lhech pa uj ti yaychavalhjamatan'in pa ninmôjayan.

² Pa tayôjijanesh ti chiytône'mey japi lhavcajôyshinjas, japi tôyjesesh, japi vôntôyitesh pava catiis shi' japi caaj pa lhtôycheyash, ca jaspa ninôclitemch'e pava lhech lhtsamatas. Japi lhech pa yicheyshi ja lhcaanvacle,

³ jô lhech pa yit'esha: —Caajyam ja yitsamaat uj ti tsaychavalhjamatan'in jayeetajesh ca nastôyc'oya.

⁴ Vooy japi caaj pa lhtôycheyash pa yit'esha ts'ivee ja lhcaanvacle: —¡Yajatesh ti mônlha na Yinvacle! Anfaclemch'e na Yinvacle napuque acavos pan lhanjujôm, pa vooy yivaatsheelh pa janôclitelhch'e'am pa t'ônashch'e.

⁵ —Nôque lhjunash ti jaychavalhey —yit'esh ti yicuulh ja lhcaanvacle—: Ca nianfactajeelhyam na lhech yitsamaat shi' pa t'ônashch'e, pa c'at'iyayanelhsha'ne jayu pa vooy java ajpôyjeyelh pa chinaclapjuqu'e pa t'iyaseesh.

⁶ Taj ti ca anfactajelhyam ja janjujôm shi' pa t'ônashch'e, pa c'atiselh jayu yivaatsha, shi' pa anch'anjayashelh shi' pa uj anôclôjqueyashelh. Pa nôque lhjunash pa anfacleelhyam ja lhjunashch'e ja janjujôm, pa anôclitelhch'eyam pa t'ônashch'e.

⁷ Japi caaj pa lhtôycheyash pa napu'esh ti yachajeshjulh ts'ivee: —Anfacleelhyam na Yinvacle pa lhanjujôm, vooy yivaatsheelh pa janôclitelhch'e'am pa t'ônashch'e,

⁸ —Tsitô'yish jô nôqueesh —yit'esh ti yicuulh ja lhcaanvacle— avaatsheelh lhenelh ca aashelh pa analhu'elh, lhayaash ti lhpe'yeelhch'e na jaychavalh'e.

⁹ Pa lhe'naa ca nianfactajeelhyam ja janjujôm, pa alhacôm'aaelh ti naclôyitelh jayu pa anivalhcheyashelh, lhayaash ti p'alha ti lhavaatculheshelh ca asculheshelhjulh pa vatcuts'aji shi' pava vat'ôôlhjônjavos, pa lhach'aneshelhjop pa ac'aplhueshelh ca anvaych'aclajtajeshelh pa afanisheshelh. Anfacleelhyam ja yitsamaat pa tsitô'ya jayu vitsha ca anôôclhanitajelhch'eyam pa t'ônashch'e.

¹⁰ —Ampapu ca nôvey na cotsjaat ca nitôyc'oya— yit'esh ti yachajeshjulh japi caaj pa lhtôycheyash— ca isa'emjop ca niteetshema na lhcaanvacle nava yen ca nitô'ya. Nan lhjunash shta ti nive'lhaa pa lhcaanvacle ti yaash shi' ti t'unesh'in pa lhfanishlhavach'in ti iseemjop ti t'a'lhajop nan lhjunash ti lht'a'lhajop napi lhavcajôyshinjas shi' napi avitôyjes shi' shta napi caaj pa lhtôycheyash.

¹¹ Na Yinvacle, nava lht'aalhtaja nic'ôôjlhaach'e pa ampapu ca niteetshaam, ameesh ca lhecha nava a'diosec; ¡taj ti pava lhech ninôvji' napi nivacle!

¹² C'oya ti yipe'yach'e côque ja lhcaanvacle pa yivôcôyan pa tayôjijanesh ca chinclônsha'ne lhacôm'a japi caaj pa lhtôycheyash yiey ja Babilonia.

¹³ Pa c'oya ti chiypeya' lhacôm'a pa vatyôjijat pa vooysha'ne shta ja Daniel shi' japi t'iyôyjafas jaspa chinclônsha'ne.*xd*

Pa Daniel yashinitjatem pa lhtsamaat pa lhcaanvacle

¹⁴ Pa lhechesh ja Daniel pa yisclaneshic'oya shi' ti tcajôyshaych'e ti tasinô'yelh ja Arioc ja lhanvacleesh japi lhc'afoquelhay ja lhcaanvacle, ti palha ti chinvôncaclônjatsu'esh japi caaj pa lhtôycheyash.

¹⁵ Pa niyôsesh: —¿Ta t'e lhayaash ja lhcaanvacle ti tayôjijanesh ti lhfanishesh'in côque? Ja Arioc pa nôclitemch'e pa tôlh'ejop.

¹⁶ Pa lhechesh ja Daniel pa yichey ja lhcaanvacle ti vatants'aclansha ca nivashanem cum ca ninôclitemch'e pa lhtsamaat shi' pa t'ônashch'e.

¹⁷ Pa nijooylha ti yichey ja lhajpôyich ti nifaclemch'e lhacôm'a japi t'iyôyjafas ja Ananías, ja Misael shi' ja Azarías,

¹⁸ ca jaspa t'aalhshey pa Dios yiey pa vôôs ca nefenesh pa lhech t'astaay, pa jaspa tanca chinclôneelhsha'ne vatjuulh jap'elh caaj pa lhtôycheyash yiey ja Babilonia.

¹⁹ Jô lhech tulh ti chinôclitem ja t'astaay ja Daniel ti chiyvanjiyinesh, vooy jô lhech Daniel ti yôclôjeshey pa Dios yiey pa vôôs

²⁰ java lhech lhclishay: “Chiyôclôjeshey yajatesh pa lhey pa Dios, lhayaash ti yitsôt'ajesh pa pa vatôycheyash shi' pa t'unaj.*xe*

²¹ Lhavaatsha yuyjatvanôcji java nalhus shi' java t'ajô'jesh ti ve'lha yincôôp; ti yivômjatesh shi' ti yinvacleyansha'ne papu, pa yijutem pa lhtôycheyash japi caaj pava yitô'yish shi' ti yijutem pa lhcajôysha japi caajem pa lhcajôysha.

²² Lhavaatsha nôclit pava nayieyshi shi' pava t'astaya; pa nitôfaclesh pava yi'tajshi pa tulhitaj, lhayaash ti yi'shi' pa lhech pa vatqu'isjuyaj.*xf*

²³ Avaatsha, lh'Dios'ash japi yinavot, jajut'am na yishami'ash shi' ti c'ôclôj, lhayaash ti lhascajôyshiyan shi' ti lhts'unitjat; pa nôqueesh lhastôyjata na jaya'lhesh'a: lhastôyjatelha nava yaychavalhjamatan'in na lhcaanvacle.”

²⁴ Ti nôjeshch'e côque, pa yichey ja Daniel ja Arioc, jan yiyôjiesha ja lhcaanvacle ca chinclônsha'ne japi caaj pa lhtôycheyash yiey ja Babilonia, pa yit'esha: —Ya aj ca aclônsha'ne japi caaj pa lhtôycheyash. Aschajey t'ajuyish ja lhcaanvacle, vooy yivaatsha janôclitemch'e jayu lhacôm'a pa lhtsamaat.

²⁵ Pa yicha'jeyshi tatsha ja Arioc ja Daniel yiey t'ajuyish ja lhcaanvacle Nabucodonosor, pa yit'esha ja lhcaanvacle: —Tôlhshaam japi judíos japin chiysas'in ti javan na ve'lha nivacle yinôôclhanitemch'e jayu na Yinvacle pa t'ônashch'e pa lhtsamaat.

²⁶ Pa lhechesh pa yit'esha ja lhcaanvacle ja Daniel, jan lhqueyesh Beltsasar: —¿Isjop'am avaatsha ti lhteetshayam na yitsamaat shi' pa t'ônashch'e?

²⁷ Ja Daniel yit'esh ti yicuulh: —Nive'lhaa japi caaj pa lhcajôysha, pa vatvitôyej, pa lhavcajôyshinaj nilhecha pa vantôyitesh pava catiis, ca isa'emjop ca ninôclitemch'e na Yinvacle pa t'astaay ti yentaj ca nitôyc'oya.

²⁸ Taj ti caaj pa ve'lha Dios yi'shi' pa vôôs ti vancatôyjata pava t'astaay, pa lhech yitôyjataja na Yinvacle pava vaclan jayu. Pa janôclitemch'e jayu na Yinvacle ja lhtsamaat shi' ti yi'shi' lhtô'vat pa lhechesh ti yimô'.

²⁹ Na Yinvacle ti yi'apee ja lhmôjôvat; pa yaychavalhjat'in pava vaclan jayu, vooy pa lhech yitôyjata nava t'astaay ti nitôfacjatesh.

³⁰ Ya chi' shta tsitôyjata nôque t'astaay, taj ti niyalhecha ca ya'sheshc'oya pa ca nastô'yesh lhacôm'a napi nivacle, vooy ti janôclitemch'e na yinvacle pa t'ônashch'e ja lhtsamaat, pa nôque lhjunash na Yinvacle, ti isjop ca nitôyc'oya pava vataychavalhjanôc ti natsham'in.

³¹ “Ja lhtsamaat, na Yinvacle, yivan'e t'ajuyish ti chiytsemaaj pa uj vatajpec pa nôcshi' shta, pa t'e pa lhjunash.

³² Pa lhshatech pa vatajpec yiesh pa clesanilh cojiyaj tsi'sha; vooy pa t'oot shi' pava t'itjuy pa clesanilh clim; vooy pa lhcachi' shi' pava lhacoc pa clesanilh yucch'e;

³³ vooy pava lhcaclôy pa clesanilh yacutch'e; vooy pa pacham pava lhafoc pa clesanilh yacutch'e, vooy peelh pacham pa ayisjan.

³⁴ Meelh na Yinvacle ti yovalhey lhôn lhpa utiyuc ti tôlh'apee lhpa utej, ti ampapu ca nant'uqu'e', ti nat'esha'ne pava lhafoc pa vatajpec pa nicôtjatsha'ne.

³⁵ Pa nivinshaa lhôn pa clesanilh yacutch'e, pa ayisjan, pa yucch'e clesanilh, pa clim clesanilh shi' pa cojiyaj clesanilh pa lhacôm'a ti yalhalha ti lhamôqu'esh, jan lhjunash ti shnavôp'esh ti chiyisclanshi pa trigo vooy pa lhaviim ti yivôm'in pa ampa ca mônlhaae. Taj ti lhpa utej lhpa nateysha'ne pa vatajpec pa yalhalha'esh ti utiyuqu'esh pa yam'apee pa cotsjaat.

³⁶ Côque lhtsamaat. Pa nôqueesh janôclitemch'e na Yinvacle pa t'ônashch'e ti nijujôm.

³⁷ Na Yinvacle ya'sheshc'oya lhacôm'a nap'elh lhcaanvacles, lhayaash ti pa Dios yiey pa vôôs yijutem na lhanvacleyash, pa t'unaj, ti yicont'aj ti tanch'anjay.

³⁸ Na lhech tif'apee lhacôm'a jan yie' napi tsitenas nivacle, nava yaquisetes shi' nava ajôclôs; pa lhech yan'ôcji lhacôm'a pa t'unaj na Yinvacle ti lhshatech'esh na clesanilh cojiyaj.

³⁹ Pa nijooylhach'e jayu na lhanvacleyash na Yinvacle peelh lhcaanvacleesh shichamc'oya na yitsôt'ajesh, pa nijooylhach'e pa pu'janaeyshi pa lhanvacleyash jan lhjunash pa clesanilh yucch'e, pa tif'apee jayu lhacôm'a na cotsjaat.

⁴⁰ Pa nijooylhach'e jayu ti nam pa yichatjulheyshi lhcaanvacle t'un jayu jan lhjunash pa clesanilh yacutch'e; pa nôque lhjunasha pa clesanilh yacutch'e ti yoflhitshisha'ne lhacôm'a shi' ti yivômjatsha'ne, pa nôque lhjunash jayu pa lhanvacleyash pa noflhitshisha'ne shi' ca nivômjatshisha'ne jayu lhacôm'a pav'elh vatvaclevshay.

⁴¹ Na Yinvacle ti yi'van shta pa yiey lhafoc shi' pava lhafjusesh pa ayisjan shi' peelh clesanilh yacutch'e; côque nôque yich'e' ti vacôtsônsham jayu pa lhanvacleyash, lhama'taj ti caajtaj pa t'unjaniyash pa clesanilh yacutch'e, nan lhjunash ti yi'van na Yinvacle pa clesanilh yacutch'e ti vanacshentajelh pa ayisjan.

⁴² Pava lhafjus ti yiesh pa clesanilh yacutch'e vooy peelh pacham yiesh pa ayisjan, nôque yich'e' pa lhech vatvacleyash pa t'un'in jayu pa nincont'aj jayu tatsha pa lhech nalhu.

⁴³ Yiey nan lhjunash ti yi'van na Yinvacle pa clesanilh yacutch'e ti vanacshenelh pa ayisjan, pa nôque lhjunasha papi chinvacleyanesh pa ve'lhaasham jayu tôlh'ejop ti lhtats'avot ti vanijayachisha'ne; taj ti tanca ve'lhaasham pa lhavu'vat ts'ivee, nan lhjunash ti nisa'jop ti vanacshentajelh pa clesanilh yacutch'e pa ayisjan.

⁴⁴ Pan lhavôjesh ti chinvacleyan papuque lhcaanvacles, vooy pa Dios yiey pa vôôs, pa yivclanjatshi jayu pa vatvacleyash ti tan jayu ca chinvômjatshi pa tanca na'shesh'apee pap'elh lhtachifas, vooy pa lhech pa tif'e' jayu lhacôm'a pav'elh vatvaclevshay, pa yajateesh jayu ca nicaaj.

⁴⁵ Côque yich'e' lhpa utej ti yi'van na Yinvacle ti tôlh'apee lhpa utiyuc ti ampapu ca nit'uqu'e; lhpa lhech utej ti yimcôyansha'ne pa clesanilh yacutch'e, pa clesanilh yucch'e, pa ayisjan, pa clesanilh clim shi' pa cojiyaj. Pa uj Dios ti yivanjiyinesh na Yinvacle pava vaclan jayu. Yijôqu'e ca lhtsamaat, shi' ti nôclitemch'e yijôqu'e shta.

⁴⁶ Pa lhechesh ja lhcaanvacle Nabucodonosor pa t'acjatsuy'e t'ajuyish ja Daniel ti yamjata cotsjaat ja lhshatech pa tayôjijanesh ca chinlhôneemsham pava vatcufayjates shi' pa acôjqu'e pa lhniish.

⁴⁷ Pa nijooylhach'e ti yit'esha ja Daniel: —Yijô' pa a'Dios'elh avaatsheelh ti ya'sheshc'oya lhacôm'a nav'elh chiydiosiyan; pa lhech Lhanvacle napi chinvacleyansha'ne pan vancatôyjata pava t'astaay, taj ti avaatsha isjop'am ti lhnôclit côque t'astaay.

⁴⁸ Pa nijooylha ja lhcaanvacle ti yashjatesh ja Daniel shi' ti acloj pava tanch'anjayesh shi' ti acloj pava tisesh; jô'tajesh ti yetônesh ti lhanvacleesh ja yitsaat Babilonia pa chiyashjatesh ti lhanvacleeshjop lhacôm'a japi caaj pa lhtôycheyash yi'shi' japi lhchifas.

⁴⁹ Pa t'aalhshe'ma ja Daniel ja lhcaanvacle ca nanshi' ja Sadrac, ja Mesac shi' ja Abed-nego ca niclôvalhchiyinesh pa lhcumjayashesh'in yiey ja yitsaat Babilonia. Vooy lhavaatsha ja Daniel pa mônlhee jan yie' ja lhcaanvacle.