Daniel 12 - Nivaclé Bible

Yameyjop pa yôj'esha'ne

¹ Pa lhech t'aplhuqu'e' ti tanôclit jayu ja Miguel,*xv* ja ujaam ti yovalh'apee ti tavayemjulh napi achifas. Pa lhech t'ôplhu'a jayu pa vatanaputsjayash, pa lhech t'ôplhu'a ti nive'lhaeesh ca lhech lhjunasha ti tôlhesh'e ti caaj napi vatachifas.*xw* Meelh ca namtajeyjop pa vanilhjensha'ne jayu lhacôm'a papi achifasesh papin chiyi'sesh'e pa lhey na vatqu'isjayanach.

² Acloj papi mônlhach'e pava nivalhjey, ti nachfach'eeen jayu: caaj jayu papi ôyjôlhôyech'esh ti mônlha, vooy pap'elh pa nivapenvatsham'in pa ôyjôlhôyech'eesh pa lhjovaycheyash.*xx*

³ Papi nivacle tcajôyshaysha'ne papin yivoyjatey papi acloj pa nôyish yitsôt'aj, pa pjumtses jayu jan lhjunash na nalhuyish ti pjumtsej; ¡pa pjumtses jayu yajatesh jan lhjunash nava catiis!*xy*

⁴ “Taj ti avaatsha, Daniel, astanjat cum ca asclansha'ne pa i'sesh'apee na vatqu'isjayanach*xz* pa namjey ca namtajeyjop pa yôj'esha'ne. Acloj jayu papi nivacle nôque tôlh'e'in ti nôque yamjiin, pa vooysha'ne ti napshin'een pa lhtôycheyash.’

⁵ “Yivaatsha, ya Daniel, pa ja'van jap'elh napu' nivacle ti vatsavatch'e ti yie' ts'ivee lhavôôj ja tovôc.

⁶ Ja ve'lha pa niy'ôsey jeelh nivacle yuych'e java climsha'ne, jan yi'apee ja yinôôt: ‘¿Ta t'elhesh ca ninôjeshch'e cavôque ti chiytamp'oyem?’

⁷ Ja nivacle yuych'e java clim pa t'ajayesheychisham java lhpôcôtôy yiey pa vôôs, pa yetônjop pa lhey pa Dios mônlha, ti yit'esha:*xa* ‘nôqueshch'e nava pu'jana ti t'ôplheeshch'e nôquee pa lhcachivat'eshi,*xb* ti meelh ca chinvômjatshisha'ne pa t'unaj japi lhchifas ja Dios, pa lhecheesh pa ninôjeshch'e jayu lhacôm'a cavôque.’

⁸ “Jape'yataj pava yit'eshyam taj ti pa ampa ca nostôyc'oya. Pa lhechesh pa janiy'ôsesh: Lhcaanvacle, ¿She pa vaclan jayu ca nôjtajeshch'e cavôque?’

⁹ Jô lhech pa yit'esh ti tsicuulh: ‘Lhetipaa na lhatjuyshi, Daniel, navôque tajulhey ca iyitesh ca astanjat cum namjey ca namtajeyjop pa yôj'e'.

¹⁰ Acloj jayu papi vaclanem pa lhanclôyitsjayash nava chinfac, pa tôlhesh'e jayu papi lhech ti vat'isinatesha'ne shi' ti yivo'yeshch'esha'ne. Papi ojiyis lhetipa'esh jayu ti yisnatesh pava niysisa,*xc* pa tanca nitôyc'oya pava vaclanem, taj ti vooy papi tcajôyshay yitôyc'oya jayu lhacôm'a.

¹¹ Mil doscientos noventa nalhus ti vaclan jayu pa lhech nitôlhesh'e ti chiyvômjatshi pava vatcufayjates t'ajuya pava nalhus pa chinsasinatesh pa lhishjanajavat ja Lhcaanvacle.*xd*

¹² Nishamesh papi tach'anc'oya shi' ti yicafiyan pa yamjey ti t'ônshi' java mil trescientos treinta y cinco pava nalhus.

¹³ Taj ti avaatsha, Daniel, alhun na'sheesh yiey pa t'ôj'esha'ne shi' ca ichay, vooy pava nijooylha nalhus pa lhneetsham jayu ti chiyjut'ay pa asha'.’ ”