Daniel 11 - Nivaclé Bible

¹ Ya lhech shta tsifayueshem ti qu'efenesh jan t'aplhueshch'e ja Darío, lhanvacle ja Media, ja vatjutsa' nincôôp ti lhcaanvacleesh.

² Pa nôqueesh c'atôyjata jayu na yijô': Jôjjeclay chinvacleyansha'ne jayu yiey ja Persia papi pu'jana lhcaanvacles, pa nijooylhach'e jayu papi lhech nicôyôjesh'e pa t'unaj pa yichatjulheyshi lhcaanvacle pa lhech ya'shesh jayu ti acôjiinc'oya papi pu'jana. Pa tôlhesha pava lhavanjas ti ya'shesh pa uj t'unaj, pa vaniyiteshjulh jayu lhacôm'a ti t'ajuyeshjulh na lhanvacleyash na Grecia.

Papi lhcaanvacles tavayjulh na fchenajjulh shi' na fiyatjulh

³ Taj ti nijooylhach'e ti chinvacleyan jayu pa lhcaanvacle yaash ti vatclônjanaj, pa tif'apee jayu pa t'unajesh pa uj lhanvacleyash pa yisnatesh jayu pava yôyinch'e.

⁴ Taj ti nich'a pa vacalhtajesh pa lhanvacleyash ti vômji' pa vacôtsônsham ti yichatjulhsham. Pa t'unaj pa lhech lhcaanvacle tanca namjam jayu papi nich'ac lhcles, pa nilhecha pa lhanvacleyash ca nit'un'in jayu pan lhjunash ti nich'a, pa vacôtsônsham jayu, vooy pap'elh lhcaanvaclesesh jayu pan yi'taj'e.

⁵ Pa lhcaanavcle yiey na fiyatjulh t'un'in jayu, taj ti ve'lha pa yôsjat'e t'ajuyish ya'shesh'apee jayu pa t'unaj pa uj jayu pa nash'e pa lhanvacleyashc'oya.

⁶ Ca ninôjtaj pava t'ajôôj jô nincôpes, papi lhech napu' pa yisnatesh jayu pa vatpeya'esh: vooy pa lhcaanvacle fiyatjulh yijutem jayu lhpa lhôse ti lhjaya'esh pa lhcaanvacle fchenajjulh, pa lhech tôlh'ejop ti piiy'elhvach papi napu'jam lhtachifas. Taj ti pa yôyintajch'e pa vômji' jayu, lhayaash lhpa lhech, nan lhjunash pa lhaôs, pa lhch'acfa shi' papi lhcavosesh ti tinclônjasesh.

⁷ Taj ti caaj pa ve'lha tôlhshaam pa t'ajôôjam t'eclet'elha jayu papi lhcavos yiey na fchenajjulh ti vaniyitesha jayu pa lhanvacleyash pa ya'shelh'apee jayu papi lhcavos.

⁸ Jô'tajesh ti yichajey'in jayu ja Egipto pava lh'dioseclesh pava vatajpeclesesh pava chiyisnatesh pa clesanilh, pa yu'ja shta pav'elh isis pa clesanilh cojiyaj shi' pa clim. Ca ninôjtajeshch'e pava t'ajôôj jô nincôpes pa ama pa lhavatclônjayasha papi napu'jam lhtachifas,

⁹ vooy pa lhcaanvacle fchenajjulh pa yaychavalhey jayu ca nôcjaam yiey na fiyatjulh, taj ti vatyôji' jayu ca nitayjop'in.

¹⁰ ‘Taj ti papi lhcles pa lhcaanvacle yiey na fchenajjulh pa vataasclanesha'ne jayu pa lhavatclônjayash pa nasclanvatich'ejop papi acloj lhcavos. Pa ve'lha jayu papi lhech pa nit'eclet'elha papi lhcavos yiey na fiyatjulh, pa nivômjatsha'ne lhacôm'a nan lhjunash pa tovôc ti yifach'anfach'ee; pa nijooylhach'e ti vapecla jayu shta ti t'eclet'a pa yamjey jayu pava yijôt'as lhavtsates pa lhcaanvacle fiyatjulh.

¹¹ Pa lhnamjayashelhsham papi lhcavos tôlhey na fchenajjulh pa suya jayu pa lhcaanvacle fiyatjulh, pa yichjuulh jayu papi acloj nilhc'utsfasa pa tif'e' jayu lhacôm'a.

¹² Pa lhcôvjoyash ti caajtajem shi' papi aclojam nilhc'utsfasa chiyclônsha'ne pa yamjatch'een jayu pa lhnunatsjayash, taj ti pa t'unaj tanca caju'ach'e jayu pava lhnalhus.

¹³ Pa lhcaanvacle fchenajjulh yachajeyjop jayu ca nasclanvatich'e papi lhcavos pa nashjat'apee papi vatjutsa', ca nit'ôntajshi pava t'ajôôj jô nincôpes, pa vapecley jayu ca nit'eclet'elha yiey na fiyatjulh papi aclojam lhcavos pa yijôt'assham pava lhavatclônjavos.

¹⁴ Meelh ca navclantaj cavôque, pa acloj jayu papi vatjuyjatjulh pa lhcaanvacle yiey na fiyatjulh. Yi'shi' jayu papi lhech papi t'ajôôj jô nivacle ojiyis tô'lha japi Israel lhavos, jan lhjunash ti yi'shi' vatôvaat, taj ti vômji' jayu.

¹⁵ Pa lhcaanvacle fchenajjulh pa natajey jayu pa yisnateshjop jayu pa cotsjaat yitsac'uyan ti yifayjatjop pa yitsaat yijôt'aj, pa nijôôc jayu. Nilhecha papi t'unis c'afoquelhay yiey na fiyatjulh ca isa'emjop ca nôcjuulh papi nilhc'utsfasa.

¹⁶ Vooy pa lhech pa namjam pa yisnateshjop jayu pan yôyinch'ejop ca nash'apee, pa ampapu ca natjuyeshjulh, pa yamjey jayu pa Is'e' Cotsjaat pa nitif'e jayu lhacôm'a yiey pa nash'e.

¹⁷ Jô'tajesh ti yisclansha'nejop pa lhfanishesh ca nash'apee lhacôm'a pa cotsjaat fiyatjulh; pa yisnateshjop jayu pa vatpeya'shelh pa lhech lhcaanvacle shi' ti yijutey jayu lhpa lhôse ti lhjaya'esh, ca jaspa chinvômjatshic'oya pa lhanvacleyash, taj ti pava yôyintajch'e vômji' jayu.

¹⁸ Pa nijooylha jayu ca nit'eclet'a pava yitsates lhavjôych'e ja tovôc, pa acloj pava lhech ti yaflhiteshch'e jayu pa t'unaj; taj ti pa ve'lha yôsjat'e t'ajuyish pa lhech yôj'e' jayu pa lhavapenaj, pa vapenesh'in jayu pa lhanvacleesh yiey na fchenajjulh.

¹⁹ Pa lhech tôlh'e' pa lhcaanvacle ti vapecley pa lhavtsaat yijôt'aj; taj ti pa yicôjôssham'in jayu ti caaj pa lhanfanash ti tavijatay, pa tanca t'ôyi'sheey ca chinvan.

²⁰ Vooy pa lhc'o'vat nicôyôj'e jayu peelh lhcaanvacle, pan yicheney jayu pa ve'lha ti yivoyanesh pava chiyneyjop, ca nacônteshiin pa lhanvacleyash; taj ti ca ninôjtaj pava napu' nalhus pa chinclôn jayu, pa nilhecheey pan yiesh'e pa vatvatclônjayash.

²¹ Pa nanjooylheeshch'e jayu pa lhech pa ve'lha nivacle ojey ti nichinantajshi ti lhcaanvacleesh, lhavaatsha vatp'ooj jayu pava yitôlhjatlhatsham ti tôlhesha jayu pa t'unaj ti vancateejshiin.

²² Pa yivômjatesh jayu lhacôm'a pa t'unaj ti t'ajuyeshjulh, jô'tajesh ti yiclôn jayu pa lhanvacleesh pa chivatpeya'esh.

²³ Pa tejshiin jayu shta papi yisnatajesh pa vatpeya'esh ti lhtac'utsfasesh, lha'ma papi napu'taj nivacle ti yash'apee jayu.

²⁴ Meelh ti ampapu ca nivatjumtiin pa yitshaamc'oya jayu pa lhcootsjat ya'shesh ti acôjeshiin pa lhavtsaat pa yisnatesh jayu pavan ninasnatesh lhapesh papi lhacchevot; pa vatlhiseshelhch'e jayu papi lhc'afoquelhay pava isis shi' pava lhcaqueclitôy tô'lha pa vatvatclônjayash. Yôyinch'ejop jayu ca nit'ecletaja pava yitsates yijôt'as, lha'ma ti tiqu'intaj pa lhnalhu'esh.

²⁵ Pa nifayuesh'in pa t'unaj shi' ti yifiiy, pa t'eclet'a jayu pa lhcaanvacle fiyatjulh pa tanefeneshelh papi acloj lhcavos. Pa lhcaanvacle fiyatjulh pa vatfiyitjulh jayu, pa yicheelhsham jayu papi acloj lhcavos pa vatvatclônjayash pa t'uniseesh; taj ti facjanjasesh jayu, pa sasemjop jayu ca ninijôtjat ca nit'eclet'a papi nilhc'utsfasa.

²⁶ Papin t'a'lhajop pa lhech ti tsaccunelh'e pa lhtsaccunjavat pa chiyisclanshanejop jayu ca chintifshicham, lhayaash papi lhcavos ti chitif'e' pa acloj papi lhc'afoquelhay vafsha'ne jayu.

²⁷ Pa lhechesh papi napu' lhcaanvacles pa tsi'sha ti yaychavalhey ca nic'amen, ti tsaccunelh'e jayu pa lhtsaccunjavat pa yit'eshaan pa vatcuts'aji pap'elh, taj ti nive'lhaa papi lhech napu' ca nicôôjôvcheshi jayu pa ca lhfanisha'esh lhayaash ti jôjjeclay nilhechee.

²⁸ Pa lhcaanvacle fchenajjulh vapecley jayu pa lhavtsateyish pa tjôcjanesh lhacôm'a pava vatvanjas yiey pa vatvatclônjayash, pa lhechesh pa t'ajuyjulh jayu pa is chivatpeya'esh; pa yamey lhac'o' jayu pava yôyintajch'e, pa nijooylhach'e ti vapecley jayu pa lhcootsjat.

²⁹ Meelh ca namtajeyjop pa t'aplhu'a ti chinôôclhanitey, pa yicheney jayu shta papi lhcavos yiey na fiyatjulh; taj ti pa lhecheshch'e ti yitshaam pa tanca navjoyanesh jayu jan lhjunash ti vatjutsa'esh.

³⁰ Papi lhcavos pa taneclet'a jayu papi tôlhey na nuutch'e yi'shi'jop jayu pava lhôvjatshiyis, pa nijovatsjanesh jayu pa t'unaj pa tay'ec'oyaan jayu. Pa lhechesh pa lhcaanvacle yiey na fchenajjulh pa yicônitshi jayu pa is chivatpeya'esh, yifiychatesh papi vantanesh'in pa chivatpeya'esh ti t'acuumjelh'in pa lhech.

³¹ Papi lhc'afoquelhay yisasiyan jayu pa vatishjanjavat shi' pava yijôt'as jpôyjey, pa yivômjatshi jayu pava chiycufa'yesh t'ajuya pava nalhus pa suych'e pava vancasasinatesh.*xs*

³² Pa lhcaanvacle pa yôôlhjônem'in jayu papi vantanesh pa chivatpeya'esh, taj ti papi lhtachifas yentaj pa Dios pa vaniyiteshc'oya jayu pava ca nasnatajesh.

³³ Papi caaj pa lhcajôysha yi'shi' papi lhchifas pa yitôychata jayu papi acloj nivacle, taj ti nijooylhach'e ti chiyiclônsha'ne jayu, pa chinapjunsham jayu ts'ivee, pa chit'acuteshc'oyaan jayu lhacôm'a pava caajem, pa lhcumteseesh jayu papi tôlhey pa tavujuya cotsjaat. Côque tiqu'in jayu pa lhnalhu'esh.

³⁴ Meelh ca namtajeyjop pa t'aplhu' pa lhancôntayash, pa tiqu'in'esh jayu ca chinefen, yamsha ca acloja jayu papu ca ve'lhaeelhsham pa tsi'sha ti yitôlhjatlhavne ti yajulhjatey.

³⁵ Shi' shta ti chinachan papi t'ajôôj jô papi nitôychata papi lhchifas, jaspa chiyc'alhtaneshi ca nivat'isinatsha'ne shi' ca nivo'yeshch'e, pa namjey pa t'aplhu'a pa yôj'esha'ne ti chinôôclhanita.

³⁶ Pa lhcaanvacle fchenajjulh yisnatesh jayu lhacôm'a pava yenlhatam. Pa vanashjatesh jayu ti vatlheclô'jesh ti ya'sheshchisham lhacôm'a pava lh'diosec,*xt* pa suych'e pava yit'esh jayu ca nav'ojiyantaj pa yijô' Dios;*xu* pa lhacôm'a ti iseem jayu pa namjey ca nanchentajey pa Dios pa lhclôyitsjayash; lhayaash pa Dios pa ti lhfanishesh pa yisnatesh jayu.

³⁷ Pa lhech lhcaanvacle tan jayu ca nivôntayitey pava lh'diosec papi lhacchevot, pa nilhecha pava lh'diosec ti yôclôj'in papi ôcjeclôy, pa nilhecha pav'elh diosec, lhayaash ti vatlheclô'jesh jayu ti yashc'oya lhacôm'a pava lhech.

³⁸ Pa vooy ti yôclôj jayu pa lh'diosjop pava chiyijôtjat jpôyjey; pa tach'ana jayu pa lhech dios ti ninôclôj lhapesh papi lhacchevot, pa yijutem jayu pa clesanilh cojiyaj, pa clim, pava utes isis shi' pav'elh yaash ti isis.

³⁹ Ti yivayjatjulh pava chiyijôtjat jpôyjey pa yicheneshjop jayu papi nivacle ti yôclôj pa lh'dios vena tôlheshi; pa lhacôm'a papi yôclôj pa lhech lhcaanvacle, vooy lhavaatsha yisnatshem jayu pa uj lhch'anjayasha, pa yinvacleyansha'ne jayu pa yijutem pava cotsjativshay ti yishayanesh.

⁴⁰ Meelh ca namtajey pa yôj'e', vooy pa lhcaanvacle fiyatjulh pa t'eclet'a jayu pa lhcaanvacle fchenajjulh; taj ti pa lhech pa vatvaneelh jayu ti lhfactsiniyashch'ejulh pa lhavimitaj, pa t'eclet'a jayu pa yiey fiyatjulh, pa namjeylhac'o' lhacôm'a pa lhavtsateyish pava lhcaletas vatvatclônjayash t'ajuya, papi cuvoyuyjas shi' pava acloj lhôvjatshiyis.

⁴¹ Pa yitshaam jayu shta ja Is'e' Cotsjaat pa yiclônsha'ne jayu papi acloj nivacle; taj ti pa vanilhjensha'ne jayu papi tsitenas'e pa Edom shi' pa Moab, pa yaash papi tô'lha pa lhcootsjat Amón.

⁴² Vooy papi lhcavos pa ya'sha pav'elh vatavtsativshay, pa nilhecha shta pa Egipto ca ninilhjenesh jayu.

⁴³ Pa yichaj'in jayu pava lhcaqueclitoyesh pa clesanilh cojiyaj shi' pa clim, pa lhacôm'a shta pava isis tô'lha pa Egipto; pa nijooylha ti tac'uya jayu pa Libia shi' pa Etiopía.

⁴⁴ Taj ti ca naya'tajulh jayu papi tôlhey na lhum'ôcjinuc shi' ti tôlhey na fchenajjulh, pa tanapunjulh jayu; pa lhechesh pa tavacôyjulh jayu, pa yaychavalhey ti acloj papu ca niclônsha'ne,

⁴⁵ pa yisnateshjop jayu pa t'ichavatjop lhavôj'e pa tovôc shi' lhpa is'e' utiyuc yiey pa Lhasnôyech'e cotsjaat. Taj ti pa lhech'e jayu ti yameyjop ti chiyclôn lhavaatsha, pa ampapu jayu ca nefenesh.