Daniel 10 - Nivaclé Bible

¹ Ti yicheshch'e ti pu'jana'esh ja nincôôp ja lhcaanvacleesh ja Ciro yiey ja Persia, vooy na Daniel, lhey shta Beltsasar, pa chiyvanjiyinesh pa yijô', taj ti pa t'ônashch'e tavijatayem ca nitôyc'oya. Taj ti na Daniel ujesh ti tach'anch'e ca isa'emjop ca nitôyc'oya pa nash'e pava chiyvanjiyinesh.

² “Java lhech nalhus, yivaatsha, ya Daniel, ujesh ti jatacshin'in jôqueshch'e java pu'jana ti chiyamqu'e.

³ Pa nituj java vatcôs isis, pa niyc'alhtana ca tuj pa t'asjaan nilhecha ca ôtjayetas t'i', nilhecha ca vatp'aclanshi java vatshachivos jamjey ti jayônshi java pu'jana ti chiyamqu'e

⁴ Ja nalhu ti veinticuatro ja vatjutsa' jive'cla ja nincôôp, pa jôv'e' ja lhavôj'e ja uj tovôc Tigris.

⁵ Pa tatsha ti jovalhey pa ja'van ja ve'lha nivacle yuych'e java clim shi' ti vanucfeesh ja clesanilh cojiyaj tsi'sha.

⁶ Ja lhavu'vat nôcshi' jan lhjunash lhja utej lhey topacio, vooy ja lhtaco pjumtsej jan lhjunash ja tachin, java lhtôsjey lhjunashjulh java itôtas ti chiytseclô'lhey, vooy java t'itjuy shi' java lhafoc pa nôcshisha'ne jan lhjunash ja clesanilh yucch'e, vooy ja t'ôjôj lha'yasha papu ti aclojam.*xp*

⁷ “Ya ve'lhajop ti ja'van ti yi'shi' yitô'vat, pa lhan'e jap'elh nivacle ti tavo'yich'e pa nintô'ya ts'ivee, lhayaash ti nijovayjulh ti yash'apee ts'ivee pa vacumajvatich'ec'oya ti vant'ôfiitsha'ne.

⁸ Yivaatsha yave'lhajop ti jôvjop ja uj yi'shi' yitô'vat. Pa tsiclimiyanchisham lhacôm'a pa tsicha'vayey ti ampa yunajajop.

⁹ Meelh ti jape'ya ti tasinôyam, pa tsicôt'esha'ne ti tsivômjat'e pa yamônlhee cotsjaat.

¹⁰ Pa nivinshaa ja vatpôcôôt ti t'acum'yi ti tsinenjatchisham yamjey ti jiyitsjatch'esha'ne nava yipôcôtôy shi' nava yicjatsuy.

¹¹ Pa nijooylhach'e ti yit'eshyam: ‘Daniel, nan yen pa Dios, ach'anesh'yi jum nava jayeesh'a jayu: aneetsham, lhayaash yivaatsha ti chitsichen'ay.’ Pa tatsha ti meelh ti tifeshch'e java lhclishay, pa yats'a'nanan'in ti javatsavat'in.

¹² Pa lhechesh pa yit'eshyam: ‘Ya aj ca anjovaayshi, Daniel, lhayaash ti tôlhesh'e ja vatjutsa' nalhu ti lhen ca natôyc'oya java matas tavijataych'e shi' ti lhaychavalhey ti lhtants'aclan'e t'ajuyish ja a'Dios, jô lhech tach'anesh'a java lht'aalhshey. Cavôque janachesh'ay yivaatsha.

¹³ Ja ángel chinvacleyanesh ja lhanvacleyash ja Persia apis ti vatjuyjatyijulh yicheshch'e java veintiún nalhus; taj ti ja Miguel,*xq* jô lhech tô'lha japi ángeles chiyashjatesh ti lhcaanvaclesesh, namyi ti ts'efenesh, pa jave'lhan ti janôôyjop japi lhcaanvaclesesh ja Persia.

¹⁴ Nôque lhjunash ti janach'ay ti janôclitch'e'am pava vaclanem jayu napi achifas, lhayaash na yi'shi' atô'vat ti caaj'am chiyenjop pava lhech nalhus.’

¹⁵ Jôjjeclay mônlheesh ti yit'eshyam cavôque, pa jovalha cotsjaat yivaatsha pa nive'lhaach'a pa ca yit'esh ca yicli'sha.

¹⁶ Pa tatsha ti caaj pa lha'yasha ja nivacle lhaôs ti t'ajaya na yashi. Pa lhechesh pa jayeetsha jan yie' yijuyish: ‘Lhcaanvacle, nôque yi'shi' yitô'vat yamjatyich'een na yitanaputsjayash pa yiamiyan pa yunaj.

¹⁷ ¿Ta lhjunash ca isa'jop ca nitasinôy'am na acavo avaatsha, ti yivaatsha amyam lhacôm'a na yunaj yamjey ti amc'oyayam na yiyalh?’

¹⁸ Pa lhech lha'yasha na nivacle lhaôs ti tapecl'yi ti t'ajay'yi, pa nijutyam ja nich'a yunaj

¹⁹ pa yit'eshyam: “Yaj aj ca anjovaayshi pa ya aj ca vena aychavalhjaniyasha. Nen ja Dios; ¡anfayu'in shi' ca avatfiyit!’ “Jôjjeclay tasinôyam'in pa tsicha'vayey ti tsifayujat'in, pa jayeetsha: ‘Lhcaanvacle, asinôyam, lhayaash ti lhnachajyam na yunaj.’

²⁰ Lhechesh pa yit'eshyam: ‘¿Natô'yish pan lhayaash ti janach'ay ti c'avan? Lhayaash nôqueesh tajulheyam ca japecley ca c'ashanelh ja ángel lhanvacleesh ja Persia. Meelh ca javaclhitajesh ti c'ashanelh jô lhech, pa ninam jayu jeelh ángel lhanvacleesh ja Grecia.

²¹ Nôqueesh jayeetshaam jayu ja chiyi'sesh'e ja vatqu'isjayanach yi'shi' pa yijô': Ja yishanjayasha japi lhech ve'lha ja Miguel ti ts'efenesh,*xr* jô lhech ángel lhanvacleesh japi Israel lhavos.