Apocalipsis 1 - Nivaclé Bible

Pa vatôychiyashc'oya pa Jesucristo

¹ Nôque vatôychiyashc'oya ti yijutey pa Dios ja Jesucristo, pa jaspa yitôyjata jayu japi lhcavos pan lhjunash pava ca navclantaj tatsha. Jô lhech Jesucristo yiyôjiesha pa lh'ángel nôque vatôychiyashc'oya jaspa yitôyjata na lhcavo Juan.

² Na lhech yijô' ti yit'esha lhacôm'a java yi'van. Pa nifacch'e cava lhasinôc pa Dios shi' java yiyitsjatesh ja Jesucristo.

³ Nishamesh papi yiclôvalhshi nôque, pa nishamesh shta papi yipe'ya nôque chiyclôvalhshi nan tô'lha pa Dios, pa jaspa niqu'ishamesh nôque chiyi'sesh'e. Lhayaash ti palha shalhac'oya pa t'aplhuc'oya pa nalhu.

Pa Juan yiisshem'e papi napu'yama t'ajôj'esham papi lhtatvelhavot'esh pava iglesias

⁴ Yivaatsha, ya Juan, qu'iisshem'e japi napu'yama t'ajôj'esham lhtatvelhavot'esh java iglesias yiey ja cotsjaat Asia. Chiyjutelh'ay pava isis vatcufayjates shi' pa vatcanoyash tô'lha pa Dios. Pa lhech caaj, pan p'alha ti caaj pan nam jayu shta. Tô'lha shta pava napu'yama vatsôc'ôctis lhshayc'uc (espíritus) papin yiey t'ajuyish pa lhc'o'vat pa Dios.*xa* *xb*

⁵ Tô'lha shta ja Jesucristo, jan yivo'yeshch'e ti chayeshch'e. Jô lhech vatjutsa'c'oya ti nitshamshi pa vatvafi'. Pa chiyashjateshc'oya pa t'unaj papi lhcaanvacles'e na cotsjaat. Shinen ja Cristo pa yicleesheyjoom pava cassasch'e pava lhavoyey.*xc* *xd* *xe*

⁶ Jô lhech shinvacleyansha'ne shi' ti lhcavoseshjajop cava lhasinôc jaspa shtacu'mem'in pa Lhtata Dios. ¡Chiyôclôj jô lhech pa chiyjutey pa t'unaj ôyjôlhôyech'esh! Amén.,,,,,

⁷ ¡Ja Jesucristo nacheyshicham nava vôsey! Pa lhacôm'a ti yi'van jayu, pa yi'van jayu shta papin yivo'matan; pa yipvatsham'in jayu lhacôm'a papi lhtachifas yiey na cotsjaat ca nivantaj. Jech nôque lhjunash jayu.*xg* *xh* ,,

⁸ “Yivaatsha ja vatjutsa' pa janjooylha shta, jan lhjunash java vatca'niscôtey lhja A shi' lhja Z”. Nôque yit'esh ja Lhcaanvacle jan ya'shesh pa t'unaj. Jan caaj, jan p'alha ti caaj jan nam jayu shta.*xj* ,

Chiyvanjulh pa Cristo lhasnôycheyash

⁹ Yivaatsha, ya Juan, avelhelhyish avaatsheelh. Pa casve'lheelhsham pa vatclôyitsjayash shi' pa lhanvacleyash pa Dios. Casve'lheelhsham shta pa vatcheclanjayash pan nijutjooy ja Jesucristo. Janôôcfee ja cotsjaat yichjop'in ja yinôôt, lhey Patmos. Tôlh'ejop ti janfacl'e cava Dios lhasinôc shi' java jasinôquiesh ja Jesucristo.

¹⁰ Ve'lha ja lhnalhu ja Lhcaanvacle ti vaclan ti natyitapee pa t'unaj pa Espíritu Santo pa jape'yayitch'e pa uj t'ôjôj. Pa lhech t'ôjôj t'ônashch'ejulh pa vat'ônjanche,

¹¹ pa yit'eshyi: —Yivaatsha ja vatjutsa' pa janjooylha shta, jan lhjunash java vatca'niscôtey lhja A shi' lhja Z. “I'sesh'e pa vatqu'isjayanach nava lhavan. Pa acheney navôque japi napu'yama t'ajôôjam lhtatvelhavot'esh java iglesias yiey na cotsjaat Asia. Navôque lheyis: ja Efeso, ja Esmirna, ja Pérgamo, ja Tiatira, ja Sardis, ja Filadelfia shi' ja Laodicea.”

¹² Jovalheyitapee pa jaspa ja'van japin t'ôjôj ti tasinôyam'in. Pa ja'van java napu'yama chitseclô'lha cojiyas.

¹³ Yi'shi' lhcachivat java lhech napu'yama chitseclô'lha, pa ja'van ja ve'lha lhjunashjulh ja nivacle lhaôs. Jô lhech yuych'e lhja pitej t'uyjatshiy yamey java lhafoc. Pa yôcfeesh t'oot ja cojiyaj clesanilh vatanucfat.*xl* *xm*

¹⁴ Java lhayees uj ti climch'esha'ne lhjunashjulh ja tashinshtaj lhsaash uj ti isshaam. Java lhtôsjey lhjunashjulh ja itôj t'ach'aclech.*xn*

¹⁵ Java lhafoc uj ti pjumtses lhjunashjulh pa clesanilh ti tôjiyaj; nôcshi' ti chiyanch'e lhpa itôjiy. Vooy ja t'ôjôj uj ti sitsej jan t'ônash java tovjôy ti t'ôôy.*xñ* *xo*

¹⁶ Yiey ja lhpôcôt lhfayishey java napu'yama catiis. Vooy ja lhashi tôlhey ja clesataj napu'esh java chiyeclôs'ech'e. Ja lhtaco lhjunashjulh na jumcuclaay ti uj ti pjumtsej. , ,

¹⁷ Ti javantaj, pa tsicôôtsha'nejop java lhafoc jan lhjunash papi ti vaf. Taj ti tanajayeshi ja lhpôcôt lhfayishey pa yit'eshyi: —“Ya aj ca anjovay'in; ya lhech ja vatjutsa' pa janjooylha shta,*xp*

¹⁸ nan mônlha. Apis ti javaf, taj ti nôqueesh pa yajatesh ti yamônlha. Caajyam nava t'ajuya ti chincat'eshey nava lhashic na vatvafi' shi' na lhc'o'vat capi vafsha'ne.

¹⁹ I'sesh'e navan lhavan, navan caaj nôqueesh shi' nava nijooylha jayu shta.

²⁰ Navôque napu'yama catiis tastayeem nava lhavanesh na yipôcôt yifayishey shi' nava napu'yama chitseclô'lha cojiyas: nava napu'yama catiis chinôôclhanitajop japi napu'yama yiclôvalh t'ajuya java napu'yama t'ajôôjam java iglesias. Vooy java napu'yama chitseclô'lha chinôôclhanitajop java napu'yama t'ajôôjam java iglesias. Nava chinfacleem papi lhtatvelhavot'esh pa iglesia yiey pa yitsaat Efeso