TATUM 1 - SURAT BARASIH BARITA BAHALAP

Kasusah Yerusalem

¹ Lalehan kabenyem Yerusalem metoh toh, lewu je bihin rami toto. Bihin tamam marak kare bangsa, toh manjadi kilau balo. Bihin lewu inara toh jari injadian jadi rewar.

² Hapus alem ie manangis paham, danum mata mahasor hong pipi. Jaton ije biti oloh je eka sintae je maku mampong ie. Ie indarhaka awi kare sobat je jari hobah manjadi musoh.

³ Oloh Yuda haguet malihi lewue, awi ihajipen tuntang paham kajake. Katika toh ewen melai marak kare bangsa beken jaton eka je tau manenga kasanang. Musoh mangapong ewen metoh ewen buah kajake.

⁴ Hong kare andau hai, jaton ije biti je dumah akan Human Hatalla. Kare bawin panyanyi intu hete kapehe, tuntang kare imam bakotok. Dia aton oloh intu kare lawang, Lewu Sion inyangkulep kapehen atei.

⁵ Kare musohe uras gagah awi ewen olih manguasae. Tuhan mawi ie manyarenan kapehe, tagal kare dosae. Kare oloh je melai tanahe jari inawan, tuntang iunda akan eka tawanan.

⁶ Katamam lewu Yerusalem baya saritae metoh bihin. Kare pamimpine jari balemo kilau bajang je paham balau. Ewen dia olih mawat arepe taharep musoh je manggoang.

⁷ Limbah manjato tuntang buah kasusah, Yerusalem mangenang kare katika je jari mahalau, metoh ie magon are panataue; kilen ampie kare oloh je melai tanah te manjato akan lengen musoh, tuntang jaton oloh dumah mandohop. Kare musohe baya tatawe mite karusake.

⁸ Yerusalem mamapa arepe kabuat awie nguan are dosa je eka kajilek. Uras oloh je bihin mahormat ie, metoh toh manawah ie awi mite ie halowai. Ie bakotok awi jari buah kahawen.

⁹ Kapapae gitan batantu, tapi ie dia paduli narai je jari buah ie. Paham hai karusake, tapi jaton ije biti je handak mampong ie. Maka ie balaku asi intu Tuhan, karana kare musohe jari manang.

¹⁰ Kare ramoe jari irabut awi kare musohe. Ie baya manampayahe bewei ewen tame Human Hatalla, gawi je ingahana awi Tuhan akan oloh je dia ungkup Ayue.

¹¹ Marak kakotoke kare oloh melai tanah te manggau rote; ramo barega inakiri dengan rote, baya mangat ewen magon olih belom tuntang dia matei. Yerusalem hamauh, “O Tuhan, tampayah aku, ite kare kajakengku.”

Yerusalem bakotok

¹² “O kare oloh je mahalau hong jalan, ite bua-buah! En aton kajake je inanggong toh, kapehe je iawi Tuhan akangku, awi kasangit Aie je paham hai te?

¹³ Bara langit injakah Awie apui je mangehu sampai akan atei huangku. Ie manenan jarat intu hila baungku je mampalongkang aku. Palus Ie manalua aku kabuat kapehe hapus andau.

¹⁴ Ie manduan uras dosangku, palus mametenge jadi ije, tuntang manyalinge intu uyatku, sampai ehate mampalemo aku. Tuhan manyarah aku akan musoh; dia olihku malawan ewen.

¹⁵ Tuhan manawah uras pahlawan ayungku je menteng. Ie mirak tantara uka uras oloh tabela ayungku binasa. Ie mahunje bangsa ayung-Ku sampai rotek, sama kilau oloh mahamis bua anggor.

¹⁶ Awi te danum matangku hasor-hasora, jaton je manenga samangat tuntang ampong. Bangsa ayungku jari kanihauan urase, awi musoh labih hai kuasae.

¹⁷ Aku manggatang lengengku balaku dohop, tapi jaton je mampong. Bara hete-hete Tuhan mangirim musoh; ewen dumah mantakan aku. Aku iawi kilau rotik, taloh kajilek intu marak ewen.

¹⁸ Tapi Tuhan bewei je bujur, awi parentah Aie jari ilangkahku. Hining auhku o kare bangsa, ite aku huang kasusah. Kare oloh hatue tabela tuntang bawi tabela ayungku jari inawan, tuntang iunda akan eka tawanan.

¹⁹ Aku mantehau kare sobatku je heret tapi ewen mandarhaka dengangku. Kare imam tuntang kare pamimpin bangsa urase jari matei intu jalan kare lewu. Metoh manggau panginan mangat belom.

²⁰ O, Tuhan tampayah aku, ateiku susah tuntang paham balisah, rusak awi kadarhakangku bihin. Intu kare jalan oloh hapuno, intu huang huma aton pampatei.

²¹ O Tuhan, hining auh lakungku, jaton je mampong aku. Kare musohku hanjak, awi Ikau mawi aku calaka. Keleh mampadumah andau je injanji Awim te; keleh mawi ewen kapehe sama kilau aku.

²² Keleh manantuani uras kapapan ewen te, tuntang awi ewen sama kilau Ikau mawi aku tagal uras dosa je iawiku Akam. Aku manarahing huang kapehe ateiku susah tuntang paham asi-asi.”