OBAJA 1 - SURAT BARASIH BARITA BAHALAP

Tuhan akan mahukum Edom

¹ Jetoh tujum Obaja; ie manyampai peteh Pangkahai Tuhan tahiu bangsa Edom: Tuhan jari mangirim sarohan Aie akan kare bangsa, tuntang itah jari mahining peteh je iimbite kalotoh, “Tatap arep akan parang! Ayo itah haguet manyarang Edom.”

² Tuntang akan Edom Tuhan hamauh, “Ikau impalemo-Ku sampai inawah awi kakare bangsa.

³ Ikau taratipu awi ateim je bajoho. Lewun rajam te bukit batu je badehen; ekam melai intu tantan bukit je gantong. Awi te ikau manirok, ‘Eweh je olih mampakalah aku?’

⁴ Aloh ikau olih manampa humam tumon kagantong sarangan burong rajawali, tuntang tumon kagantong kare bintang intu langit, ikau batantu impanjato-Ku kea.

⁵ Oloh panakau atawa parampok je dumah hamalem, baya manduan taloh je ingahandake. Oloh je mamutik anggor intu kabon, harajur manisa pire-pire kabawak. Tapi ikau impalepah awi kare musohm.

⁶ O turonan Esau, ikau iriksa titip tuntang ramom je basahokan mahin irampas.

⁷ Ikau inipu awi kare pakatm, tuntang iharak bara lewum. Ikau impakalah awi kare sobatm, injabak awi oloh je kuman hayak dengam. Ewen misek tahiu ikau, ‘Kueh metoh toh kare kapintare?’

⁸ Hong andau Aku mahukum Edom, kare oloh ayue je pintar imbinasa awi-Ku. Tuntang kare kaharatin ewen kareh nihau, jaton aton awae.

⁹ Kare oloh menteng bara Téman kareh mikeh, tuntang uras tantara Edom kareh matei.”

Kare sabab Edom buah hukum

¹⁰ “Ikau jari paham katulasm dengan kare paharim turonan Yakob. Awi te ikau kareh imbinasa, tuntang inyalan oloh sampai rahian andau.

¹¹ Ikau mendeng bara kejau, metoh musoh manelak bauntonggang Yerusalem tuntang mampakalah lewu te. Ikau mambenyem arepm ih katika ewen munda lepah kare panatau Yerusalem tuntang mambagi-bilahe marak ewen. Ikau sama kapapae dengan musoh te.

¹² Dia tumon kapatute ikau sanang dengan kasusah kajake je buah oloh Yuda tuntang hanjak hong andau paharim te binasa. Dia patut ikau mangamburau metoh ie buah kasusah.

¹³ Dia patut ikau tame lewun ungkup-Ku tuntang basasurak mawi kare oloh je metoh kasusahe, mahin tinai sampai marampok kare ramoe hong andau kajakee!

¹⁴ Dia putut ikau mendeng intu simpang jalan, tantai mimpa kare oloh je hadari bara musoh, atawa manyarah ewen akan musoh hong andau ewen buah kasusah.”

Hatalla mamutus pakaran kare bangsa

¹⁵ “Toto, jari tokep andaue, Aku, Tuhan mamutus pakaran kare bangsa. Taloh je ilalus Edom kareh imbaleh akae. Ie kareh mangkeme kea taloh je jari ilaluse.

¹⁶ Intu hunjun bukit-Ku je barasih ungkup-Ku jari mihop taloh ihop je mananda hukumae. Tapi taloh ihop kare bangsa hong kalunen toh labih bapait tinai. Hukuman te dia olih ewen mahakae. Ewen musti mihop jete sampai lepah, limbah te ewen kareh lilap jaton bara awan.”

Kamanang Israel

¹⁷ “Tapi intu bukit Sion kareh aton je salamat, tuntang bukit te jadi eka je tantai akang-Ku. Palus turonan Yakob kareh mandino haluli petak danum je puna ain ewen.

¹⁸ Ungkup-Ku Israel kareh sama kilau apui je manusul lepah turonan Esau, sama kilau apui mangehu lingis tampilai intu tana. Jaton bara turonan Esau kareh tau liwus. Aku, Tuhan jari hakotak!

¹⁹ Kare oloh Yuda Salatan kareh marentah Edom. Kare oloh bara kare bukit hila barat kareh mampakalah tanah Palestina. Suku Benyamin kareh marentah Gilead, tuntang Israel ungkup-Ku kareh marentah hapus Epraim tuntang Samaria.

²⁰ Oloh Israel utara kareh haluli bara eka tawanan tuntang marentah Fenisia sampai akan Sarpat. Kare oloh Yerusalem je tawanan intu Sardis kareh haluli tuntang mandino kare lewu intu hila salatan Yuda.

²¹ Oloh Yerusalem je manang kareh manyarang Edom tuntang mampakalahe. Palus aku Tuhan kareh marentah kilau raja.”