NUMERI 3 - SURAT BARASIH BARITA BAHALAP

Kare anak Aron

¹ Jetoh aran keluarga Aron tuntang Moses metoh Tuhan hakotak dengan Moses intu hunjun Bukit Sinai.

² Aron aton epat anake hatue: Nadab je bakas, limbah te Abihu, Eleasar tuntang Itamar.

³ Ewen intahbis jadi imam tumon atoran agama manata undus intu hunjun takoloke.

⁴ Tapi Nadab tuntang Abihu matei intu Bukit Sinai, metoh ewen manaharep Tuhan dengan apui je dia bahalap. Ewen due jaton bara anak. Katahin Aron magon belom, Eleasar tuntang Itamar bagawi kilau imam.

Kare oloh Lewi ininjok mangat bagawi akan kare imam

⁵ Tuhan hamauh dengan Moses,

⁶ “Soho suku Lewi dumah manaharep, tuntang maninjok ewen jadi kare pelayan akan Aron.

⁷ Ewen bagawi intu Kemah-Ku tuntang musti manyang kare imam tuntang hapus ungkup dengan gawin ewen intu Kemah-Ku te.

⁸ Gawin ewen iete maharago kakare pakakas Kemah-Ku tuntang malalus gawi intu Kemah-Ku te kilau gantin kare oloh Israel.

⁹ Bara bangsa Israel baya suku Lewi ih je nyoho-Ku jadi pelayan je tetep akan Aron tuntang turonae.

¹⁰ Tapi Aron tuntang kare anake musti iangkat-Ku uka malalus gawi kilau imam. Beken bara ewen, eweh bewei je hanyi-hanyi malalus gawi te musti ihukum matei.”

¹¹ Tuhan hamauh dengan Moses,

^12-13 “Toh kare oloh Lewi iintih-Ku jadi oloh ayung-Ku. Metoh Aku mampatei uras anak bakas bangsa Misir, ingabekeng-Ku akang-Ku kakare anak hatue tambakas ain oloh Israel tuntang uras meto ain ewen je solake inakan. Uras jete ayung-Ku. Kilau gantin anak hatue tambakas oloh Israel Aku manduan oloh Lewi akang-Ku; ewen kareh jadi oloh ayung-Ku, Aku Tuhan.”

Sensus oloh Lewi

¹⁴ Intu padang pasir Sinai Tuhan manyoho Moses,

¹⁵ manampa daptar kare oloh Lewi manumon jalahae tuntang keluargae mije-mije. Genep anake hatue je umure ije bulan akan hunjun musti incatet arae.

¹⁶ Palus Moses malalus parentah Tuhan te.

^17-20 Lewi aton telo anake hatue: Gerson, Kehat, Merari. Ewen te tato hiang kare jalahan je inyewut manumon aran ewen. Gerson aton due anake hatue: Libni tuntang Simei. Kehat aton epat anake hatue: Amram, Yishar, Hebron tuntang Usiel. Merari aton due anake hatue: Maheli tuntang Musi. Ewen te tato hiang kare keluarga je inyewut manumon aran ewen.

²¹ Jalahan Gerson iete keluarga Libni tuntang keluarga Simei.

²² Kare bitin oloh hatue jalahan Gerson je umure ije bulan akan hunjun je incatet iete 7.500 biti.

^23-24 Eliasap anak Yael mamimpin jalahan te. Intu kemah bangsa Israel, jalahan te aton intu hila barat hong likut Kemah Tuhan.

²⁵ Hong gawi maharago Kemah Tuhan, ewen mananggong paharagon Kemah tuntang tutupe, dinding benang bauntonggange,

²⁶ dinding parantaran je mangaliling Kemah tuntang mesbeh, tuntang dinding benang bauntonggang likut parantaran te. Ewen mananggong kakare gawi je aton hubungae dengan kare pakakas te.

²⁷ Jalahan Kehat iete, kare keluarga Amram, Yishar, Hebron tuntang Usiel.

²⁸ Kare oloh hatue je umure ije bulan kahunjun bara jalahan te samandiaie aton 8.600 biti. Ewen bagawi nantuani kare pakakas intu Kemah Tuhan.

^29-30 Elisapan anak Usiel mamimpin jalahan te. Intu Kemah jalahan te intu hila salatan aton Kemah Tuhan.

³¹ Ewen aton tanggong jawab akan Patin Janji, meja, tantahan sumbo, kare mesbeh, kare pakakas je ihapan imam intu Kamar Ije Barasih. Ewen aton tanggong jawab akan kare gawi je aton hubungae dengan kare pakakas te.

³² Kapalan suku Lewi iete Eleasar anak Aron. Ie manantuani kare oloh je bagawi intu Kamar Ije Barasih.

³³ Jalahan Merari iete bara keluarga Maheli tuntang keluarga Musi.

³⁴ Kare oloh hatue je umure ije bulan kahunjun bara jalahan te samandiaie aton 6.200 biti.

³⁵ Suriel anak Abihail mangapala jalahan te. Intu eka kare kemah, jalahan te aton intu hila utara Kemah Tuhan.

³⁶ Ewen aton tanggong jawab akan rangka Kemah te, kare baloke, kare tihange, lasehe, kakare pakakas tuntang kare gawi je aton hubungae dengan kare ramo te.

³⁷ Tinai akan kare tihang, kare laseh, kare pasak tuntang kare tali akan parantaran luar.

³⁸ Intu kemah, Moses tuntang Aron dengan kare anake musti aton intu baun Kemah Tuhan, intu hila timor. Ewen aton tanggong jawab akan upacara sombayang akan bangsa Israel intu Kamar Ije Barasih. Beken bara ewen, eweh bewei je hanyi-hanyi mado malalus gawi te musti ihukum matei.

³⁹ Uras oloh hatue hong suku Lewi je umure ije bulan kahunjun je indaptar Moses manumon genep jalahae tumon parentah Tuhan, samandiaie aton 22.000 biti.

Oloh Lewi jadi pangganti kare anak hatue je tambakase

^40-41 Tuhan hamauh dengan Moses, “Uras anak hatue ain oloh Israel te ayung-Ku. Catet kare aran ewen je umure ije bulan kahunjun. Tapi kilau gantin ewen, aku mansanan, je oloh Lewi uras jadi ayung-Ku. Aku Toh Tuhan! Tinai meto ain oloh Lewi kea jadi gantin kakare meto je solake inakan marak meto ain bangsa Israel.”

⁴² Moses malalus taloh je irentah Tuhan; ie mancatet aran uras anak hatue je tambakase

⁴³ je umure ije bulan kahunjun. Ewen samandiaie aton 22.273 biti.

⁴⁴ Palus Tuhan hamauh dengan Moses,

⁴⁵ “Ngabeken kare oloh Lewi akang-Ku, kilau gantin uras kare anak hatue je tambakase ain oloh Israel. Kea meto ain oloh Lewi kilau gantin meto ain oloh Israel.

⁴⁶ Karana kare anak hatue je tambakase ain oloh Israel 273 biti labih are bara jumlah oloh Lewi, maka kalabien te musti keton manewuse.

⁴⁷ Akan gagenep anak, keton musti mambayar lime duit perak manumon rega je aton intu Kemah-Ku.

⁴⁸ Tenga duit te akan Aron tuntang kare anake.”

⁴⁹ Moses malalus parentah Tuhan te.

⁵⁰ Ie manduan 1.365 duit perak,

⁵¹ tuntang manjuloke akan Aron tuntang kare anake.