NUMERI 12 - SURAT BARASIH BARITA BAHALAP

Miryam ihukum

¹ Moses jari manduan ije biti bawin oloh Kus akan indu sawae. Hal te jadi alasan akan Miryam tuntang Aron hapa manyalan Moses.

² Koan ewen, “En baya mahalau Moses bewei Tuhan hakotak? En dia mahalau itah kea Ie hakotak?” Tuhan mahining kare taloh je imander ewen.

³ Moses te oloh je paham randah ateie, labih bara kakare oloh beken je belom hong kalunen toh.

⁴ Salenga Tuhan hakotak dengan Moses, Aron tuntang Miryam, “Keton telo lius akan Kemah-Ku.” Palus ewen haguet akan hete.

⁵ Tuhan mohon intu tihang baunandau. Tuhan mendeng intu baun tonggang Kemah Ayue hayak mantehau Aron tuntang Miryam. Due-due oloh te manalih

⁶ tuntang Tuhan hamauh, “Hining kare auh-Ku toh! Amon intu marak keton aton due biti nabi, aku mamparahan arep-Ku akae huang kare paite, tuntang hakotak dengae huang nupi.

⁷ Tapi dia kalote dengan rewar-Ku Moses. Ie te oloh je panumon bara marak ungkup-Ku.

⁸ Tuntang Aku hakotak dengae hataharep bau, dengan tarang tuntang dia dengan lelei. Tinai baung-Ku kea jari gitae! Mbuhen keton bahanyi malawan Moses, rewar-Ku te?”

⁹ Tuhan balait toto dengan ewen ndue, palus ie haguet.

¹⁰ Metoh baunandau te malihi Kemah Tuhan, te Miryam buah panyakit kulit je bakaike-ikeh ampie. Pupuse baputi sama kilau kapas. Metoh Aron tampaliau mite Miryam tuntang mite je ie jari buah panyakit te,

¹¹ ie palus hamauh dengan Moses, “Dohop Tuangku, ela manalua ikei ingapehe ganan dosa je iawi ikei huang kahumong ikei.

¹² Ela manalua ie jadi sama kilau awau je inakan jari matei, hayak isie satengah maram.”

¹³ Palus Moses mangkariak dengan Tuhan, “O, Hatalla, aku balaku, pakeleh ie!”

¹⁴ Tuhan tombah, “Amon baun oloh iluja awi bapae, en dia katahin uju andau ie musti buah kahawen? Keleh mangejau ie bara kare kemah katahin uju andau tuntang limbah te ie tau tame haluli.”

¹⁵ Palus Miryam impalua bara kare kemah katahin uju andau, tuntang bangsa te dia bindah bara hete sampai Miryam tau haluli akan kare kemah.

¹⁶ Limbah te ewen malihi Haserot tuntang mampendeng kemah intu padang Paran.