NUMERI 10 - SURAT BARASIH BARITA BAHALAP

Kare tarompet bara perak

¹ Tuhan hamauh dengan Moses,

² “Tampa due tarompet bara perak ininih hapa mantehau rayat hapumpong atawa manyoho ewen haguet.

³ Amon kadaduee impahiau panjang, rimae hapus ungkup musti hapumpong kaliling baun bauntonggang Kemah-Ku.

⁴ Tapi amon ije bewei je impahiau, rimae baya kare pamimpin je musti hapumpong kalilingm.

⁵ Amon tarompet impahiau panda-pandak, jete tandae kare suku je mampendeng kemah intu hila timor musti haguet.

⁶ Amon impahiau panda-pandak tingkat je kaduee, maka kare suku intu hila salatan musti haguet. Maka auh je panda-pandak rimae ungkup musti haguet.

⁷ Tapi auh je panjang rimae ungkup musti hapumpong.

⁸ Kare tarompet te musti impahiau awi kare imam, kare anak Aron. Jete atoran je musti keton manumue sampai katatahie.

⁹ Tinai amon keton nguan parang intu lewun keton akan manyalamat arep keton bara musoh je mantakan, pahiau kare tarompet te. Palus aku Tuhan, Hatallan keton, kareh mandohop tuntang manyalamat keton bara kare musoh keton.

¹⁰ Tinai intu kare andau je keton mawi kahanjak, iete intu kare pesta Bulan Taheta tuntang kare pesta je beken, tarompet te musti impahiau metoh keton maluput parapah je ingehu tuntang parapah hapa badamai akang-Ku. Palus Aku kareh mandohop keton Aku Tuhan Hatallan keton.”

Oloh Israel haguet

¹¹ Intu nyelo kadue limbah bangsa Israel malihi Misir, hong tanggal due puluh bulan due, baunandau palus mandai bara hunjun Kemah Tuhan.

¹² Maka oloh Israel babaris tumon gilire haguet bara padang pasir Sinai. Baunandau te tende metoh ewen sampai padang Paran.

¹³ Jete tingkat je solake ewen haguet hapan parentah Tuhan hajamban Moses.

¹⁴ Pangkahelo haguet tentara penda bandera pasukan Yuda, mije-mije pasukan: Nahason, anak Aminadab mamimpin barisan suku Yuda.

¹⁵ Netaneel anak Suar mamimpin barisan suku Isaskhar.

¹⁶ Tuntang Eliab anak Helon mamimpin barisan suku Sebulon.

¹⁷ Palus Kemah Tuhan iungkar, tuntang jalahan Gerson dengan Merari je meton kemah te.

¹⁸ Limbah te tentara je mamenda bandera pasukan suku Ruben haguet, mije-mije pasukan: Elisur anak Sedeur mamimpin barisan suku Ruben;

¹⁹ Selumiel anak Surisadai mamimpin barisan suku Simeon;

²⁰ Eliasap anak Rehuel mamimpin barisan suku Gad.

²¹ Limbah te haguet kea kare oloh Kehat je meton kare ramo barasih. Amon ewen sampai eka mampendeng kemah je limbah te, Kemah Tuhan jari impendeng haluli.

²² Limbah te kare tentara je mamenda banderan pasukan Epraim manuntut, mije-mije pasukan: Elisama anak Amihud mamimpin barisan suku Epraim;

²³ Gamaliel anak Pedasur mamimpin barisan suku Manase;

²⁴ Abidan anak Gideoni mamimpin barisan suku Benyamin.

²⁵ Pangkarahiae tentara je mamenda pasukan Dan haguet. Ewen te pangawal likut akan kare pasukan. Ewen mananjong mije-mije pasukan: Ahieser anak Amisadai mamimpin barisan suku Dan;

²⁶ Pagiel anak Okran mamimpin barisan suku Aser;

²⁷ Ahira anak Enan mamimpin barisan suku Naptali.

²⁸ Jete gilir babaris oloh Israel, mije-mije pasukan, genep katika ewen haguet uka bindah.

²⁹ Moses hamauh dengan sindahe, Hobab anak Rehuel oloh Midian, “Ikei handak haguet akan eka je tumon auh Tuhan handak inenga akan ikei. Tuhan jari manjanji taloh je bahalap akan oloh Israel. Keleh omba ikei, ikei kareh malalus kataun ikei dengam.”

³⁰ Tombah Hobab, “Tarima kasih, tapi aku handak haluli akan huma serokku.”

³¹ “Ela ah malihi ikei,” koan Moses, “ikau kareh jadi panunjuk jalan akan ikei, awi ikau katawan intu kueh ikei tau mampendeng kemah hong padang pasir.

³² Amon ikau omba, uras taloh bahalap je ilalus Tuhan akan ikei, kareh ilalus kea akam.”

Bangsa Israel haguet

³³ Limbah bangsa Israel malihi Sinai, Bukit eka Tuhan melai, ewen mananjong telo andau katahie. Patin Janjin Tuhan harajur imbit helo bara baun ewen indu manggau eka mampendeng kemah akan ewen.

³⁴ Amon ewen haguet bara eka kemah, baunandau Tuhan harajur aton intu hunjun ewen hong katika handau.

³⁵ Sining katika Patin Janji te handak ieton, Moses hamuah, “Keleh harikas, o, Tuhan, keleh mamisah darai musohm sampai ewen je basingi dengam hadari.”

³⁶ Tuntang genep katika Patin Janji te sampai intu eka tende, Moses hamauh, “Keleh buli, o, Tuhan, akan kare bakoyan keluarga Israel.”