LEWITIKUS 4 - SURAT BARASIH BARITA BAHALAP

Parapah akan kare dosa je dia tantai ihat

¹ Tuhan manyoho Moses

² mansanan akan bangsa Israel, eweh bewei je dia tantai ihate jari mawi dosa awie malanggar ije bara kare parentah Tuhan, musti manumon atoran toh.

³ Amon oloh je mawi dosa te Imam Hai, sampai bangsa Israel omba mawi kasalan, ie musti maluput parapah ije kongan sapi hatue tabela je jaton cacate akan Tuhan mangat dosae iampun.

⁴ Sapi te iimbite akan bauntonggang Kemah Tuhan. Imam Hai mandak lengee intu hunjun takolok meto te, palus manyambalihe intu baun kemah.

⁵ Belahe bara dahae musti iimbite tame akan huang Kemah.

⁶ Palus ie mansulop tunjoke akan huang daha te tuntang mambirike uju tingkat intu baun dinding benang je mamisah Kamar Ije Barasih.

⁷ Belahe bara daha te musti iohos intu kare tandok hong kare puting mesbeh garo je mangat ewaue intu huang kemah, tuntang tisae musti inusoh intu penda mesbeh parapah je ingehu je aton intu baun bauntonggang kemah.

⁸ Imam musti manduan uras enyak sapi hatue te, iete banahate

⁹ bua kahange dengan enyake tuntang bara bagian ateie je pangkahalape.

¹⁰ Kare taloh te musti imapui hunjun mesbeh parapah je ingehu kilau je ilalus amon maluput parapah hapa badamai.

¹¹ Tapi isin sapi te, upake, takoloke, paie, tisan kanaie tamput bajakah kanaie,

¹² maka kakare taloh awang te suali bara bagian je jari imisah, musti imbit balua bara watas kakare kemah. Intu hete sapi te musti ingehu intu hunjun apui intu eka manganan kawo, iete eka je inantu akan jete.

¹³ Amon oloh je mawi dosa te uras ungkup Israel, tagal dia tantai ihat malanggar ije bara parentah Tuhan,

¹⁴ maka sana dosa te ingatawan, ungkup musti mimbit ije kongan sapi hatue tabela akan hila baun Kemah Tuhan. Meto te musti iluput indu parapah ampun dosa.

¹⁵ Kare pamimpin bangsa musti mandak lengen ewen intu hunjun takolok meto te, palus manyambalihe intu eka te.

¹⁶ Imam hai musti mimbit belah dahan meto te tame akan huang kemah.

¹⁷ Intu hete ie mansulop tunjoke akan huang daha te balalu mambirike uju tingkat intu baun dinding benang je mamisah Kamar Ije Barasih.

¹⁸ Belahe tinai iohos intu kare tandok hong kare puting mesbeh garo intu huang kemah, tuntang tisae balalu inusoh akan penda mesbeh eka parapah je ingehu je aton hila baun bauntonggang Kemah.

¹⁹ Kakare enyak meto te induan palus imapui intu hunjun mesbeh.

²⁰ Ampin cara malalaluse sama kilau ampin cara malalus parapah sapi hatue akan parapah ampun dosa. Tumon te cara Imam Hai maluput parapah akan kare dosan ungkup, maka kare dosa te akan iampun Tuhan.

²¹ Limbah te sapi te musti iimbit balua, tuntang imapui intu luar watas kare kemah, kilau intu parapah sapi hatue akan parapah ampun dosan Imam Hai te kabuat. Tumon te cara maluput parapah ampun dosan ungkup.

²² Amon je mawi dosa te ije biti oloh je marentah awi dia tantai ihat malanggar ije bara parentah Tuhan,

²³ maka sana ingatawae, ie musti maluput parapah ije kongan kambing hatue je jaton cacate akan ampun dosae.

²⁴ Ie musti mandak lengee intu hunjun takolok meto te, palus manyambalihe intu silan hila utara mesbeh, eka manyambalih meto akan parapah je ingehu.

²⁵ Imam musti mansulop tunjoke akan huang dahan meto te palus mohose intu kare tandok intu kare puting mesbeh tuntang manusoh tisae akan penda mesbeh.

²⁶ Limbah te uras enyak meto te musti imapui intu hunjun mesbeh, kilau intu parapah hapa badamai. Kalote cara Imam maluput parapah akan dosan oloh je marentah, maka oloh te akan iampun Tuhan.

²⁷ Amon ije bara kare rayat mawi dosa awi dia tantai ihat malanggar ije bara parentah Tuhan,

²⁸ maka sana ie mangatawae, ie musti maluput parapah ije kongan kambing bawie je jaton cacate.

²⁹ Ie musti mandak lengee intu hunjun takolok meto te, palus manyambalihe intu silan utara mesbeh, eka manyambalih meto akan parapah je ingehu.

³⁰ Imam musti mansulop tunjoke akan huang dahan meto te, palus mohose intu kare tandok hong kare puting mesbeh tuntang manusoh tisae akan penda mesbeh.

³¹ Uras enyak meto te musti induan kilau indu parapah hapa badamai. Enyak te musti imapui awi imam intu hunjun mesbeh, mangat ewaue manyanang atei Tuhan. Kalote cara imam maluput parapah akan dosan ije biti oloh bara rayat biasa, maka oloh te akan iampun Tuhan.

³² Amon ije biti oloh maluput parapah ije kongan tabiri akan ampun dosae, tabiri te musti bawie tuntang jaton cacate.

³³ Ie musti mandak lengee intu hunjun takolok meto te, palus manyambalihe intu hila utara mesbeh, eka manyambalih meto akan parapah je ingehu.

³⁴ Imam musti mansulop tunjoke akan huang dahan meto te, palus mohose intu kare tandok intu kare puting mesbeh, tuntang manusoh tisae akan penda mesbeh.

³⁵ Limbah te uras enyak meto te musti induan kilau intu parapah hapa badamai. Enyak te musti imapui intu hunjun mesbeh, haya-hayak dengan parapah taloh kinan je inenga akan Tuhan. Kalote cara Imam maluput parapah akan dosan oloh te, maka ie akan iampun Tuhan.