LEWITIKUS 2 - SURAT BARASIH BARITA BAHALAP

Parapah taloh kinan

¹ Amon ije biti oloh maluput parapah taloh kinan akan Tuhan, parapah te musti mahapan tepong je pangkahalape inusoh undus saitun hayak iandak manyan intu hunjue.

² Ie musti mimbite akan kare imam turonan Aron. Imam je bagawi musti manduan ije karakop bara tepong te dengan undus saitun tuntang uras manyan; ie palus mamapuie intu hunjun mesbeh kilau tanda je taloh handiai te jari iluput akan Tuhan. Ewau parapah taloh kinan te manyanang atei Tuhan.

³ Parapah taloh kinan je tisae iete akan kare imam. Parapah te paham barasih awi jari induan bara taloh kinan je jari iluput akan Tuhan.

⁴ Amon je inenga te rote je imapui intu huang eka mamapui, rote te musti inampa dia mahapan ragi. Rote te tau bakapal, inampa bara taloh ewoi bara tepong halus dengan undus saitun, tau kea wadai je baya iohos dengan undus saitun.

⁵ Amon je iluput te rote je imapui intu huang eka mamapui rote, rote te musti inampa bara tepong halus dengan undus saitun, tapi dia mahapan ragi.

⁶ Rote je iluput te musti ingiwak-ingiwak, palus inata hapan undus saitun.

⁷ Amon je iluput te rote je impakasak huang ketel, rote te musti inampa bara tepong halus tuntang undus saitun.

⁸ Rote je inampa dengan cara te musti iluput akan Tuhan tuntang inyarah akan imam je mimbite akan mesbeh.

⁹ Imam manduan belah bara rote te balalu mamapuie hunjun mesbeh kilau tanda je kakare taloh te jari iluput akan Tuhan. Ewaue manyanang atei Tuhan.

¹⁰ Je kalabie inenga akan kare imam. Rote te paham barasih awi induan bara taloh kinan je jari iluput akan Tuhan.

¹¹ Parapah taloh kinan akan Tuhan dia tau iewoi dengan mado atawa ragi, awi mado tuntang ragi dia tau ingehu indu iluput akan Tuhan.

¹² Bara hasil petak je solake genep nyelo, belahe musti iluput akan Tuhan, tapi dia tau imapui intu hunjun mesbeh.

¹³ Genep parapah taloh kinan musti inenga uyah jadi tanda janjin Hatalla dengan keton. Maka kakare parapah musti inenga uyah.

¹⁴ Amon keton maluput parapah taloh kinan akan Tuhan bara gandom je solake inggetem, keleh mimbit gandom taheta je jari inepe sampai halus atawa imanggang.

¹⁵ Gandom te musti inata hapan undus saitun je iandak manyan intu hunjue.

¹⁶ Imam musti mamapui belahe gandom tuntang undus te hayak dengan kakare manyan, kilau tanda je urase te jari iluput akan Tuhan.