LEWITIKUS 1 - SURAT BARASIH BARITA BAHALAP

Parapah je Ingehu

¹ Bara Kemah Ayue, Tuhan mantehau Moses tuntang manenga akae kare atoran

² je musti inumon awi oloh Israel. Amon ije biti oloh maluput meto akan parapah je ingehu akan Tuhan, ie tau manenga sapi, tabiri atawa kambing.

³ Amon je iluput te ije kongan sapi, duan meto te je hatue hayak jaton cacate. Sapi te palus imbite akan bauntonggang Kemah Tuhan, mangat Tuhan mangilak oloh te.

⁴ Ie balalu mandak lengee intu hunjun takolok meto te, maka parapahe akan inarima Tuhan akan ampun dosae.

⁵ Limbah te sapi te inyambalih intu baun bauntonggang Kemah. Dahae musti iluput awi kare imam turonan Aron akan Tuhan, palus inata akan kaepa-epat dinding mesbeh intu bauntonggang kemah.

⁶ Oloh te balalu mangupake tuntang maraga meto te.

⁷ Kare imam musti membelom apui intu hunjun mesbeh palus mamandok kayu intu hunjue.

⁸ Kare ragan parapah, tamput takolok tuntang enyake, musti ewen mandake intu hunjun apui.

⁹ Palus oloh te musti menyau kanain tuntang sapak sapi te; tinai kare imam je bagawi musti mamapuie lepe-lepah. Ewau parapah je ingehu te manyanang atei Tuhan.

¹⁰ Amon je inenga te ije kongan tabiri atawa kambing, meto te musti hatue je jaton cacate.

¹¹ Oloh te musti manyambalih meto te intu hila utara mesbeh; balalu kare imam manata dahae intu kaepa-epat dinding mesbeh.

¹² Limbah meto te iraga, uras ragae tamput takoloke tuntang enyak banahate, musti iandak awi imam intu hunjun apui intu mesbeh.

¹³ Palus oloh te musti menyau kanain tuntang sapak meto te. Limbah te imam musti maluput urase akan Tuhan, tuntang mangehue intu hunjun mesbeh. Ewau parapah je ingehu te manyanang atei Tuhan.

¹⁴ Amon je iluput te ije kongan burong, maka je ihapan musti burong kuku atawa burong dara tabela.

¹⁵ Imam musti mimbit burong te akan mesbeh, palus manyopek uyate tuntang mamapui takoloke intu hunjun mesbeh. Dahan burong te musti ihamis intu saran mesbeh.

¹⁶ Bungkoke tuntang hapus kare taloh huange, palus inganan akan hila timor mesbeh intu eka kawo.

¹⁷ Limbah te burong te balalu imisak intu upon palapase. Tapi palapase ela sampai bageto. Burong te musti imapui intu hunjun mesbeh. Ewau parapah je ingehu te manyanang atei Tuhan.