HAKIM 8 - SURAT BARASIH BARITA BAHALAP

Kakalah oloh Midian

¹ Oloh Epraim hamauh dengan Gideon, “Mbuhen ikau dia mimbit ikei metoh ikau haguet uka mamarang oloh Midian? Mbuhen ikei iawim kalote?” Kalote ewen bakotok dengan Gideon.

² Tapi Gideon tombah, “Taloh je iawiku dia lalau ati rimae amon inanding dengan taloh je ilalus keton. Aloh je ialalus keton isut, tapi je isut te kejau labih barega bara kare taloh je jari ialus awi hapus pasukan jalahangku.

³ Keton kau je mandino kuasa bara Hatalla sampai tau mampatei Orep tuntang Seeb, due kapalan Midian te! Inanding dengan jete, narai aton kalabien gawingku?” Limbah Gideon hamauh kalote, ewen dia sangit tinai.

⁴ Intu katika te Gideon dengan telo ratus oloh ayue sampai intu dipah Sungei Yordan. Ewen heka toto tapi magon ih manggoang musoh.

⁵ Limbah te ewen sampai intu Sukot. Intu hete Gideon hamauh dengan oloh lewu, “Dohop tenga akan oloh ayungku isut panginan. Ewen heka toto, maka ikei magon manggoang Sebah tuntang Salmuna, kare raja Midian te.”

⁶ Tapi kare pamimpin intu Sukot te tombah, “Ceh, keton magon hindai manyingkap Sebah tuntang Salmuna, jari keton balaku panginan! Akan narai oloh ayum impakanan?”

⁷ Koan Gideon, “Yoh! Kareh amon Tuhan jari manenga akangku kamanang bara Sebah tuntang Salmuna, keton kareh ihewesku hapan duhi tuntang rokam bara padang pasir!”

⁸ Limbah te Gideon marajur pangguete palus sampai intu Pnuel. Bara hete kea ie balaku panginan akan oloh ayue. Tapi panombah oloh Pnuel sama dengan panombah oloh Sukot.

⁹ Awi te Gideon hamauh dengan ewen, “Kareh aku haluli dengan salamat. Metoh te aku kareh manderep candin lewu toh!”

¹⁰ Metoh te kea Sebah tuntang Salmuna dengan hapus pasukan ewen kanjerae aton intu Karkor. Bara hapus pasukan kare oloh padang pasir, baya aton lakau 15.000 biti ih je batisa; 120.000 tantara jari matei.

¹¹ Gideon manyaroroi helat padang pasir intu silan hila timor Nobah tuntang Yogbeha palus manyarang musoh manantekas.

¹² Sebah tuntang Salmuna, kadadue raja Midian te hadari, tapi Gideon manggoang tuntang manyingkap ewen, sampai hapus pasukan parang ewen hadari kasaburan.

¹³ Limbah te huang pangguet buli bara parang, Gideon manggoang jalan je mahalau jalan eka mandai akan Heres.

¹⁴ Intu hete ie manyingkap ije biti oloh tabela bara Sukot. Palus ie misek oloh te tuntang kare aran bakas lewu intu Sukot. Oloh te manyurat kare aran te akan Gideon – samandiai aton 77 biti.

¹⁵ Limbah te Gideon haguet manyondau kare bakas lewu intu lewu te palus hamauh, “Batantu keton magon mingat, tahiu keton je puji dia maku mandohop aku, awi aku hindai manyingkap Sebah tuntang Salmuna, dia kalote? Keton dia maku manenga panginan akan kare oloh ayungku; padahal ewen metoh heka katika te. Item, toh Sebah tuntang Salmuna.”

¹⁶ Limbah te Gideon manduan duhi tuntang rokam bara padang pasir, palus manjera belai kare bakas lewu ain oloh Sukot te.

¹⁷ Intu Pnuel kea ie mampalongkang candi tuntang mampatei uras oloh hatue intu lewu te.

¹⁸ Limbah te Gideon misek Sebah tuntang Salmuna, “Kilen ampin kare oloh je impatei keton intu Tabor te?” Sebah tuntang Salmuna tombah, “Ewen uras kilau ikau, kilau turonan suku ayum.”

¹⁹ “Jete kare paharingku, kare anak induku,” Koan Gideon. “Jaka keton dia mampatei ewen, aku dia akan mampatei keton kea.”

²⁰ Palus koan Gideon dengan Yeter, anake je bakas, “Patei ewen!” Tapi Yeter magon tabela. Jadi, ie mikeh sampai dia manjawut padange uka mampatei.

²¹ Koan Sebah tuntang Salmuna dengan Gideon, “Ayo, amon ikau hatue patei ikei dengan lengem kabuat!” Palus Gideon mampatei ewen balalu manduan uras barang amas je aton intu uyat onta ain ewen.

²² Limbah te ungkup Israel hamauh dengan Gideon, “Ikau jari malapas ikei bara kuasan oloh Midian. Awi te keleh ikau jadi pamimpin ikei, ikau tuntang turonam.”

²³ Tombah Gideon, “Dia, aku dia akan jadi pamimpin keton, anakku kea dia. Tuhan te je pamimpin keton.”

²⁴ Tapi limbah te Gideon hamauh, “Baya ije palakungku; sowang je irabut keton bara musoh, sarah urase akangku.” (Oloh Midian bahut mahapan sowang amas; sama kilau kare oloh beken je melai intu padang pasir).

²⁵ “Yoh,” tombah ewen, “dengan sanang atei ikei kareh manenga akam.” Palus ewen mambirang ije kalambar benang, limbah te genep biti dumah tuntang mingkes intu hete kare sowang je jari irampase bara musoh.

²⁶ Uras sowang amas je inyarah akan Gideon metoh te ehate tokep due puluh kilo, hindai tatame kare ramo beken, galang, benang ungu je ihapan kare raja Midian, tuntang rantai je aton intu uyat kare onta ain ewen.

²⁷ Bara amas te Gideon mawi ije hampatong dewa, palus mandake intu lewue, iete intu Opra. Uras oloh Israel haguet akan hete uka manyembah hampatong dewa te, sampai ewen dia tinai paduli dengan Hatalla. Taloh te jadi sama kilau jarat akan Gideon tuntang keluargae.

²⁸ Oloh Midian jari dia bakotik tinai, ewen jari impakalah awi ungkup Israel. Palus lewu te tadoh sanai epat puluh nyelo katahie katahin Gideon magon belom.

Pampatei Gideon

²⁹ Limbah parang te, Gideon buli akan ekae tuntang melai intu hete.

³⁰ Ie aton anake hatue uju puluh biti, awi sawae are.

³¹ Aton kea gundike intu Sikhem; bara gundike toh ie mandino ije biti anak hatue je inggaree Abimelekh.

³² Limbah umure bakas toto, Gideon anak Yoas te matei. Ie ingubur intu kubur Yoas, bapae. Kuburan te aton intu Opra, iete lewu jalahan Abieser.

³³ Limbah Gideon matei, oloh Israel dia baketep tinai dengan Hatalla. Ewen manyembah kare dewa Baal tuntang mawi Baal-Berit jadi dewan ewen.

³⁴ Ewen dia sombayang tinai intu Hatalla, Tuhan ewen, je jari maliwus ewen bara kuasan kakare musoh intu hakaliling ewen.

³⁵ Ewen kea dia mambaleh kahalap gawin keluarga Gideon akan ungkup Israel.