HAKIM 7 - SURAT BARASIH BARITA BAHALAP

Gideon mampakalah oloh Midian

¹ Sinde andau Gideon dengan salepah oloh ayue misik hanjewu toto. Ewen haguet tuntang mampendeng kemah intu tokep tahasak danum Harod. Kemah oloh Midian aton intu hila utara bara ewen, intu janah tokep bukit More.

² Tuhan hamauh dengan Gideon, “Oloh ayum lalau are. Aku dia maku manenga kamanang akan ewen malawan oloh Midian, awi kareh tirok ewen kamanang ewen awi kaabase ewen kabuat, sampai ewen dia manara Aku.

³ Jadi, sanan akan oloh ayum eweh je mikeh, jele-jeleng malihi bukit Gilead toh tuntang buli akan huma.” Balalu aton 22.000 biti je buli; baya 10.000 je melai.

⁴ Palus Tuhan hamauh tinai dengan Gideon, “Oloh ayum magon lalau are. Imbit ewen akan sungei. Intu hete Aku kareh mintih ewen akam. Amon Aku hamauh dengam, ‘Oloh toh tau haguet dengam,’ ie musti haguet. Tapi amon Aku hamauh dengam, ‘Oloh toh dia tau haguet dengam,’ ie dia tau haguet.”

⁵ Gideon mimbit kare oloh te akan sungei, palus Tuhan hamauh dengan Gideon, “Oloh je manjelap danum kilau aso, ingabeken bara oloh je mandeko utut uka mihop.”

⁶ Maka aton 300 biti je manjelap danum bara lokap lengee; uras je beken mandeko utut uka mihop.

⁷ Limbah te Tuhan hamauh dengan Gideon, “Hapan telo ratus biti je manjelap danum te, Aku kareh maliwus ikau tuntang manenga kamanang akam malawan oloh Midian. Soho ewen je beken buli.”

⁸ Awi te Gideon manyoho uras oloh Israel je beken buli kacuali je telo ratus te. Uras bahata tuntang tarompet induan bara kare oloh je buli te. Oloh Midian aton hong janah intu ngiwa bara eka oloh Israel mampendeng kemah.

⁹ Alem te Tuhan hamauh dengan Gideon, “Misik, Gideon! Lius manyarang kemah oloh Midian. Aku manenga kamanang akam malawan ewen.

¹⁰ Tapi amon ikau mikeh, imbit Pura, jipem te haguet haya-hayak dengam akan kemah musoh.

¹¹ Kareh ikau akan mahining taloh je inahiu musoh, tuntang taloh te mampalembut kahanyim haguet manyarang.” Palus Gideon haguet dengan Pura, akan helat watas kemah musoh.

¹² Oloh Midian, Amalek tuntang kare oloh je beken bara padang pasir, tayap hete-hete intu janah te. Ampie kilau sangkalap je hakarimbong. Kare onta ain ewen are toto kilau pasir huang saran pantai.

¹³ Katika Gideon sampai intu hete, ie mahining pander ije biti oloh metoh manyarita nupie akan kawale. Oloh te hamauh kalotoh: “Aku nupi aton ije kabawak rote tagaling tame akan eka kare kemah itah palus manantarang ije kemah. Kemah te balongkang sampai jadi sama karatae dengan petak.”

¹⁴ Koan kawale, “Hau, jete batantu padang Gideon anak Yoas, oloh Israel te! Rimae Hatalla jari manenga kamanang akae malawan oloh Midian tuntang hapus pasukan parang itah!”

¹⁵ Metoh Gideon mahining tahiu auh nupin oloh te tuntang rimae, ie palus sontop manyembah Hatalla. Limbah te ie haluli akan kemah Israel tuntang hamauh, “Keleh batata-tatap! Tuhan manenga kamanang akan keton malawan pasukan parang Midian!”

¹⁶ Palus Gideon mambagi telo ratus oloh ayue jadi telo pasukan. Genep pasukan inenga ije tarompet tuntang ije kandi je basuang obor.

¹⁷ Koan Gideon dengan ewen, “Amon aku sampai akan helat watas kemah oloh Midian, ite taloh je iawiku, tuntang lalus taloh je ilalusku.

¹⁸ Amon aku tuntang pasukan ayungku mahimon tarompet, keton kea mahimon tarompet. Balalu mangkariak hakaliling kemah te, ‘Akan Tuhan tuntang akan Gideon!’ ”

¹⁹ Tokep bentok alem, Gideon tuntang kare oloh ayue sampai intu helat watas kemah musoh. Metoh te oloh je manjaga kemah te, haru ih baganti jaga. Palus Gideon tuntang pasukan ayue mahimon tarompet hayak mamusit kandin ewen.

²⁰ Due pasukan je beken mawi kalote kea. Palus ewen uras manggatang kare obor ewen dengan lenge sambil, tuntang mahimon tarompet je aton hong lenge gantaun ewen. Ewen mangkariak, “Padang akan Tuhan tuntang akan Gideon!”

²¹ Ewen uras tetep mendeng genep bitie intu ekae hakaliling kare kemah te. Palus salepah pasukan parang musoh hadari bantap-baning hayak mangkariak.

²² Metoh Gideon tuntang kare oloh ayue kanjeran mampahiau tarompet, Tuhan mawi pasukan parang musoh hasarang sama arepe hapan padang. Ewen hadari manintu Serera sampai tikas Bet-Sita tuntang lewu Abel-Mehola tokep Tabat.

²³ Suku Naptali, Aser, tuntang suku Manase oloh je silan hila timor atawa je silan hila barat Sungei Yordan intehau kea. Palus ewen manggoang tantara Midian.

²⁴ Tinai akan hapus tanah Epraim, Gideon mangirim barita parentahe toh, “Keleh mohon mamarang oloh Midian. Jaga toto-toto Sungei Yordan, tuntang hapus sampang sungei sampai tikas Bet-Bara. Ela nalua oloh Midian dimpah bara hete.” Palus kare oloh Epraim iirak, balalu ewen manjaga Sungei Yordan tuntang uras sampang sungei sampai tikas Bet-Bara.

²⁵ Due tokoh suku Midian inawan awi ewen. Orep impatei intu batu Orep tuntang Seeb impatei intu eka mahamis anggor Seeb. Kare oloh Epraim te palus manggoang oloh Midian, balalu mimbit takolok Oreb tuntang Seeb akan Gideon intu dipah Sungei Yordan silan hila timor.