HAKIM 4 - SURAT BARASIH BARITA BAHALAP

Debora tuntang Barak

¹ Limbah Ehud malihi kalunen, bangsa Israel badosa tinai intu taharep Tuhan.

² Palus Tuhan manalua ewen impakalah awi Yabin, raja Kanaan je melai intu lewu Hasor. Pangkalima pasukan parange iete Sisera je melai intu Haroset-Hagoyim.

³ Ain Yabin aton 900 kareta parang bara sanaman. Due puluh nyelo katahie ie manguasa oloh Israel hayak dengan katulase. Limbah te ewen mangkariak balaku awat dengan Tuhan.

⁴ Katika te je mamimpin Israel iete ije biti nabi bawi bagare Debora, sawan Lapidot.

⁵ Debora bahut mondok intu penda batang korma, helat Rama dengan Betel, intu tanah habukit Epraim. Tuntang intu hete kare oloh Israel dumah uka balaku tirok dengae.

⁶ Sinde katika ie manyoho oloh mantehau Barak, anak Abinoam, bara lewu Kedes intu tanah Naptali. Ie palus hamauh dengan Barak, “Jetoh parentah Tuhan, Hatallan Israel akam: ‘Mumpong 10.000 oloh hatue bara suku Naptali tuntang Sebulon, tuntang imbit ewen akan bukit Tabor.

⁷ Kareh Aku mawi Sisera, pangkalima pasukan parang Yabin, talih ikau intu Sungei Kison impahayak awi tantarae tuntang kare kareta parange mangat manyarang ikau. Tapi Aku kareh manenga kamanang akam huang parang te.’ ”

⁸ Barak hamauh dengan Debora, “Amon ikau omba, aku maku haguet.”

⁹ Debora tombah, “Yoh, aku kareh omba! Tapi ingat, dia ie ikau je kareh mandino hormat. Mahalau ije biti oloh bawi Tuhan kareh mampakalah Sisera.” Palus Debora haguet haya-hayak dengan Barak akan Kedes.

¹⁰ Palus Barak manantiring suku Sebulon tuntang Naptali akan Kedes. Je omba Barak tuntang Debora metoh te aton 10.000 biti.

¹¹ Metoh te Heber, ije biti oloh Keni, jari mamisah arep bara bangsa ayue. (Bangsa Keni iete turonan Hobab, sindah Moses). Heber jari haguet mampendeng kare kemahe darah kare batang kayu jati intu Saanaim, dia kejau bara Kedes.

¹² Sana Sisera mahining je Barak jari haguet akan Bukit Tabor,

¹³ ie mamumpong jalatien ratus kareta parange je bara sanaman te, haya-hayak dengan hapus pasukae palus mimbit ewen bara Haroset-Hagoyim akan Sungei Kison.

¹⁴ Palus koan Debora dengan Barak, “Ayo, miar! Tuhan bewei je mamimpin ikau. Andau toh ie manenga kamanang akam malawan Sisera.” Barak balalu mohon bara bukit Tabor haya-hayak dengan sapuluh koyan oloh ayue,

¹⁵ limbah te manyarang Sisera. Tuhan mampanyanyau hapus pasukan Sisera tuntang kare kereta parange, sampai Sisera mohon bara keretae, palus mandari arepe mananjong.

¹⁶ Barak manggoang kare kareta parang tuntang pasukan musoh te sampai Haroset-Hagoyim balalu hapus pasukan Sisera te impateie; jaton ije je inalua belom.

¹⁷ Metoh te Sisera jari hadari akan kemah Yael, sawan Heber, oloh Keni te. Awi, raja Yabin tuntang Hasor bakawal dengan jalahan kaluarga Heber te.

¹⁸ Katika Sisera dumah, Yael manyambut ie tuntang hamauh, “Kantoh tuan palus wei akan huang kemahku; dia usah mikeh.” Sisera tame akan huang kemah te, palus Yael manutupe hapan dinding benang mangat ie basahokan.

¹⁹ Koan Sisera dengan Yael “Dohop tenga akangku danum isut akan ihop; aku teah belai.” Balalu Yael muap sarangan danum bara upak, eka mingkes susu, tuntang mampihop Sisera, limbah te manutupe tinai mahapan dinding benang.

²⁰ Palus Sisera hamauh dengan Yael, “Lius mendeng intu baun bauntonggang kemah. Amon oloh dumah tuntang misek dengam en aton oloh intu hetoh, suman jaton.”

²¹ Sisera paham heka sampai ie mangantok balalu tapatiroh bakalis. Yael manduan ije tukul sanaman tuntang pasak akan kemah, balalu luwa-luwah ie manokep Sisera. Limbah te ie malantak pasak te intu salipan bungai sampai tembus akan petak. Kalote Yael mampatei Sisera.

²² Metoh Barak dumah manggau Sisera, Yael manambang tuntang hamauh dengae, “Palus, aku kareh mamparahan akam oloh je inggaum te.” Barak tame hayak Yael, palus ie mite Sisera jari matei, halelek intu petak dengan pasak kemah ilantak huang salipan bungaie.

²³ Andau te Tuhan manenga kamanang akan oloh Israel malawan Yabin raja Kanaan.

²⁴ Raja te sasar tahi sasar ihenyek awi oloh Israel sampai kajariae ie binasa.