HAKIM 1 - SURAT BARASIH BARITA BAHALAP

Suku Yuda tuntang Simeon manawan Adoni-Besek

¹ Limbah Yosua matei, ungkup Israel misek Tuhan, “Tuhan, suku je kueh bara ikei patut sola-solake haguet manyarang oloh Kanaan?”

² Tuhan tombah, “Suku Yuda. Ewen jari inenga-Ku kuasa uka marabut lewu te.”

³ Palus koan suku Yuda dengan suku Simeon, “Dohop ikei mamarang oloh Kanaan tuntang marabut tanah je inukas Tuhan akan ikei. Kareh ikei kea handak mandohop marabut tanah je inukas Tuhan akan keton.” Palus suku Simeon

⁴ tuntang Yuda haguet parang haya-hayak. Tuhan manenga akan ewen kamanang malawan oloh Kanaan tuntang oloh Peris. Sapuluh koyan biti tantara musoh matei intu Besek.

⁵ Ewen sondau Adoni-Besek, rajan lewu te tuntang manyarang ie.

⁶ Ie hadari tapi ewen manggoang tuntang manawan ie palus manetek tunjok indu lengee tuntang tunjok indu paie.

⁷ Koan Adoni-Besek, “Bihin uju biti raja jari inetek awiku tunjok indu lengee tuntang paie, palus inaluaku ewen kuman kare tisan panginan bara mejangku. Toh Hatalla mawi aku sama kilau aku mawi ewen.” Adoni-Besek limbah te iimbit akan Yerusalem, tuntang intu hete ie matei.

Suku Yuda mampakalah Yerusalem tuntang Hebron

⁸ Oloh Yuda manyarang Yerusalem, palus marabut tuntang mangehu lewu te hayak mampatei oloh lewu te.

⁹ Limbah te ewen haguet tinai manyarang oloh Kanaan je melai intu tanah je petake habukit, tuntang intu kare biring bukit; tuntang kea je melai intu tanah je petake keang hila salatan,

¹⁰ tuntang intu lewu Hebron, iete lewu je bihin inggare Kiryat-Arba. Intu hete oloh Yuda mampakalah jalahan Sesai, Ahiman tuntang Talmai.

Otniel mampakalah lewu Debir

¹¹ Bara Hebron, oloh Yuda haguet manyarang lewu Debir, je metoh te bagare Kiryat-Seper.

¹² Ije biti bara suku Yuda te, je arae Kaleb, hamauh, “Eweh je tau marabut Kiryat-Seper, ie tau kawin dengan anak bawi aingku Akhsa.”

¹³ Otniel, anak bara andi Kaleb je arae Kenas, marabut lewu te. Palus Kaleb manenga Akhsa, anake, akan sawan Otniel.

¹⁴ Intu andau pangawin ewen, Otniel mamaksa Akhsa uka balaku ije kalambar petak bara bapae. Palus Akhsa mohon bara kalidaie, balalu Kaleb misek dengae taloh je ingahandake.

¹⁵ Akhsa tombah, “Aku handak pire-pire tahasak danum, awi petak je inenga bapa akangku te aton intu tanah je petake keang.” Maka Kaleb manenga akae tahasak danum intu hila ngaju tuntang tahasak danum intu hila ngawa.

Kare kamanang suku Yuda tuntang suku Benyamin

¹⁶ Turonan empo Moses, iete kare oloh Keni, manuntut oloh Yuda balua bara Yerikho, lewu kurma, tuntang haguet akan tanah je petake keang intu hila salatan Arad intu Yuda. Intu hete ewen manetep hong bentok bangsa oloh Amalek.

¹⁷ Limbah te haya-hayak dengan suku Simeon, suku Yuda te haguet manyarang tuntang mampakalah oloh Kanaan je melai intu Sepat. Ewen manyapa lewu hai te, limbah te mampalomose palus manggaree Horma.

^18-19 Tuhan mandohop oloh Yuda sampai ewen tau marabut daerah tanah je petake habukit. Tapi ewen dia tau marabut Gasa, Askelon atawa Ekron dengan kare tanah hakalilinge, awi kare bangsa je melai intu hapus saran laut aton kare kareta parang bara sanaman; awi te oloh Yuda dia olih maharak ewen.

²⁰ Sama kilau je jari irentah awi Moses, Hebron inenga akan Kaleb, awi solake telo baris jalahan turonan Enak jari iharak Kaleb bara lewu te.

²¹ Suku Benyamin dia tau maharak oloh Yebusi balua bara lewu Yerusalem. Jete sababe oloh Yebusi magon melai intu hete sama-sama dengan oloh Benyamin.

Kare turonan suku Yosep mampakalah Betel

^22-23 Suku Epraim tuntang Manase turonan Yosep, haguet manyarang lewu Betel, je metoh te arae Lus. Tuntang Tuhan mandohop ewen. Hong katika oloh kalati inyoho manalih lewu te,

²⁴ ewen hasondau dengan ije biti oloh hatue je dumah bara lewu. Koan ewen dengae, “Amon ikau handak mandohop ikei uka ikei tau tame akan lewu toh, ikei kareh malalus kahalap dengam.”

²⁵ Palus oloh te maninjok akan ewen jalan tame akan lewu te. Balalu kare oloh Epraim tuntang Manase tame lewu te hayak mampatei oloh hapus lewu, kacuali oloh te dengan tondah kolae.

²⁶ Ie limbah te bindah akan lewun oloh Het, palus mamangun ije lewu intu hete tuntang manggare arae Lus. Lewu te magon tetep inggare kalote.

Kare bangsa je dia iharak awi oloh Israel

²⁷ Suku Manase dia maharak oloh intu lewu Bet-Sean, Taanakh, Dor, Yibleam tuntang Megido tuntang kare kampung hakalilinge. Jadi oloh Kanaan tetep melai intu hete.

²⁸ Aloh oloh Israel sasar abas, ewen baya mamaksa oloh Kanaan bagawi akan ewen, tapi ewen sama sinde dia maharak kare oloh Kanaan te bara hete.

²⁹ Intu lewu Geser, suku Epraim dia kea maharak oloh Kanaan, oloh je melai lewu te. Jadi, oloh Kanaan magon tetep melai intu hete belom marak ewen.

³⁰ Oloh je melai lewu Kitron tuntang Nahalol dia kea iharak awi suku Sebulon. Jete bukue suku Kanaan magon tetep melai intu hete belom marak ewen, tapi kare oloh Kanaan te imaksa bagawi akan ewen.

³¹ Oloh lewu Akho, Sidon, Ahab, Akhsib, Helba, Apek tuntang Rahob dia kea iharak awi suku Aser.

³² Jete sababe oloh Kanaan, oloh asal je melai lewu te magon melai hete sama-sama dengan oloh Aser.

³³ Oloh lewu Bet-Semes tuntang Bet-Anat mahin dia iharak awi suku Naptali. Jete bukue oloh Kanaan, oloh asal je melai lewu te magon melai intu hete belom marak oloh suku Naptali. Tapi, ewen imaksa bagawi akan oloh Naptali.

^34-35 Bangsa Amori magon tetep melai intu Ayalon, Saalbim tuntang Bukit Heres, awi suku Dan ihupi awi ewen haluli akan tanah je petake habukit, tuntang dia ewen manaluae mohon akan tanah janah je petake rampar. Tapi bangsa Amori te harajur ihenyek awi suku Epraim tuntang Manase hayak imaksa bagawi akan due suku te.

³⁶ Intu hila utara Sela, helat dengan tanah oloh Amori mahalau Lungkoh Akrabim.