GENESIS 9 - SURAT BARASIH BARITA BAHALAP

Janjin Hatalla dengan Noah

¹ Hatalla mamberkat Noah tuntang kare anake hayak hamauh, “Keleh manak majaria dahang-dahanga, uka kare turonam kareh manyuang hapus petak.

² Kare burong tuntang lauk dengan kare meto je beken mikeh dengam. Ewen samandiai uras penda kuasam.

³ Uras taloh te tau akan panginam. Kalote kea kare taloh imbul je bahijau; uras te inengaku akan indu panginam.

⁴ Baya ije bewei je dia tau ikau kumae iete isin meto je magon aton dahae.

⁵ Genep oloh tuntang meto je mampatei olon akan ihukum matei.

⁶ Olon injapa kilau gambar-Ku. Awi te ewe-eweh je mampatei olon, ie kea akan impatei awi olon.

⁷ Yoh, keton musti manak-majaria are, mangat turonan tayap hapus petak.”

⁸ Hatalla hamauh dengan Noah tuntang kare anake,

⁹ “Toh aku mampendeng janjing-Ku dengan keton tuntang turonan keton,

¹⁰ tuntang dengan uras kare taloh belom, iete kare burong tuntang uras kare meto hunjun petak, yoh uras je balua bara kapal te hayak dengan keton.

¹¹ Jetoh janjing-Ku dengan keton: Aku hajanji, uras taloh belom dia akan impalomos tinai awi danum soho. Jaton tinai danum soho je mampalomos petak toh.

¹² Tanda janji je impendeng-Ku dengan keton tuntang dengan kakare taloh belom,

¹³ maka liu ayung-Ku iingkes-Ku hong baunandau. Jete tanda janjing-Ku dengan kalunen.

¹⁴ Sasining Aku manutup langit hapan baunandan, maka liu aing-Ku te gitan.

¹⁵ Aku handak mingat janjing-Ku dengan keton tuntang dengan uras taloh belom. Iete danum soho dia tinai mampalomos uras taloh je belom.

¹⁶ Metoh liu ayung-Ku te gitan hong baunandau, Aku mitee hayak mingat janjing-Ku je katatahie te dengan uras kare taloh belom hong hunjun petak toh.

¹⁷ Jete tanda janjing-Ku je inenga-Ku akan uras kare taloh belom hong petak toh.”

Noah tuntang kare anake

¹⁸ Kare anak Noah je balua bara kapal te iete Sem, Ham tuntang Yapet. (Ham iete bapa Kanaan)

¹⁹ Telo anak Noah te je jadi tato hiang uras oloh kalunen.

²⁰ Noah oloh pamalan, tuntang iete je sola-solake manampa kabon anggor.

²¹ Limbah Noah mihop anggor, ie palus babusau. Iengkake kare pakaiae palus ie batiroh halowai hong pasahe.

²² Metoh Ham, iete bapa Kanaan, mite bapae halowai, ie balua palus mansanan taloh te akan due biti paharie.

²³ Limbah te Sem tuntang Yapet manduan ije karambar jubah tuntang mambirang hong hunjun bahan ewen. Ewen mananjong mundur likut tame pasah te palus mangahowut bapa ewen hapan jubah te. Ewen mules baue mangat dia mite bapa ewen je halowai te.

²⁴ Limbah Noah barendeng bara kabusaue tuntang mangatawan narai je awi anak busue dengae,

²⁵ ie hamauh, “Tarasapa Kanaan! Ie akan jadi jipen kare paharie.

²⁶ Tara Tuhan, Hatallan Sem! Kanaan akan manjadi jipen Sem.

²⁷ Keleh Hatalla mandahang berkat akan Yapet tuntang mampalombah ekae melai. Keleh turonae melai dengan turonan Sem. Kanaan akan jadi jipen Yapet.”

²⁸ Limbah danum soho te, Noah magon belom 350 nyelo tinai.

²⁹ Ie matei metoh umure 950 nyelo.