GENESIS 50 - SURAT BARASIH BARITA BAHALAP

¹ Yosep mahukop bapae hayak manangis tuntang manyium baue.

² Palus Yosep marentah oloh tukang pahaga hantu mangat mararampah hantun bapae, Yakob.

³ Gawi te mahapan katika epat puluh andau katahie, iete katika je bahut ihapan mararampah hantu. Oloh Misir manatum Yakob, uju puluh andau katahie.

⁴ Limbah hapus wayah tatum, Yosep hakotak dengan kare oloh ain raja, “Nyampai peteh toh akan raja,

⁵ ‘Katika bapaku jari handak mahutos, ie manyoho aku hajanji dengae, mangat aku mangubur ie intu kubur je jari inatape hong tanah Kanaan. Awi te, soho aku haguet mangubur bapaku te. Limbah te aku handak haluli tinai.’ ”

⁶ Raja hamauh, “Keleh haguet mangubur bapam kilau je jari injanjim dengae.”

⁷ Yosep palus haguet mangubur bapae. Uras oloh ain raja, kare oloh bakas istana tuntang hapus oloh hai intu Misir, haguet haya-hayak dengan Yosep.

⁸ Kare oloh bara keluarga Yosep, paharie, tuntang kolae je beken haguet kea. Baya kare anak korik tuntang meto ain ewen ih ji ilihi intu tanah Gosen.

⁹ Pasukan bakareta tuntang bakuda omba kea, sampai barisan te panjang toto awi kare kalunee.

¹⁰ Amon ewen sampai intu eka oloh mihik hong Goren Atad, intu hila timor Sungei Yordan, ewen manatum tuntang pehe atei hayak hai auhe. Yosep mawi gawin manatum uju andau katahie.

¹¹ Metoh oloh Kanaan mite tatum intu Goren Atad te, ewen hamauh, “Lalehan auh tatum oloh Misir te!” Jete bukue eka te inggare Abel-Misraim (tatum oloh Misir).

¹² Tumon te kare anak Yakob malalus taloh je imeteh Yakob akan ewen.

¹³ Ewen meton hantue akan Kanaan tuntang mangubure into goha Makhpela hila timor Mamre, intu tana je imili Abraham bara Epron oloh Het te, akan jadi eka kubur.

¹⁴ Limbah Yosep mangubur bapae, ie haluli tinai akan Misir haya-hayak dengan kare paharie tuntang hapus oloh je omba ie mangubur bapae te.

Yosep mampong atei kare kakae

¹⁵ Limbah bapa ewen matei, kare kaka Yosep hamauh, “Kilen amon Yosep kareh basingi tuntang mamaleh kapapan itah bihin?”

¹⁶ Tagal te ewen mangirim peteh toh akan Yosep, “Helo bara bapa itah mahutos,

¹⁷ ie manyoho ikei mansanan akam kilau toh, ‘Keleh mampun kasalan je helo bihin je ilalus awi kare kakam dengam.’ Maka, kilau kare rewar ain Hatalla je inyembah bapa itah, ikei balaku, keleh mampun kasalan je jari iawi ikei.” Yosep manangis metoh manarima peteh te.

¹⁸ Palus kare paharie te kabuat dumah tuntang sontop intu taharepe hayak hamauh, “Ikei toh rewarm.”

¹⁹ Tapi Yosep hamauh dengan ewen, “Ela mikeh; awi aku mamenda Hatalla.

²⁰ Keton jari pakat mawi kapapa dengangku, tapi Hatalla mobah kapapa te jadi kahalap. Mangat hapan kare taloh je manjadi bihin te are oloh je belom metoh toh tau inyalamat.

²¹ Ela gugop. Aku kareh manyukop taloh je imerlu keton tuntang kare anak keton.” Tumon te ie mampong atei ewen hapan auh je bahalap, je manggerek atei ewen.

Yosep matei

²² Yosep tetep melai intu Misir dengan tundah paharie, ie belom sampai umure saratus sapuluh nyelo.

²³ Ie magon mite anak eson Epraim. Ie sampet kea mian kare anak Mahir, iete eson Manase, kilau anake kabuat.

²⁴ Koae dengan kare paharie, “Pampateiku jari tokep, tapi Hatalla batantu kareh mahaga keton tuntang mimbit keton balua bara tanah toh, akan tanah je jari injanjie hapan sumpah dengan Abraham, Isaak tuntang Yakob.”

²⁵ Palus Yosep manyoho kakare tundah paharie sumpah, koae, “Keleh hajanji dengangku, amon Hatalla mimbit keton akan tanah te, keton kareh mimbit hantungku kea.”

²⁶ Limbah te Yosep matei intu Misir hong umur saratus sapuluh nyelo. Ewen mangasai hantue hapan rarampah tuntang manameae huang kakurong.