ESTER 8 - SURAT BARASIH BARITA BAHALAP

Bangsa Yehudi irentah malawan musohe

¹ Andau te kea Raja Ahasweros manenga akan Ratu Ester kare ramon Haman, musoh hai ain oloh Yehudi te. Ester mansanan akan raja je Mordekhai paharie ije tato. Palus bara katika te Mordekhai inenga hak akan manaharep raja dengan dia usah intehau helo.

² Raja mengkak tisie je jari induae haluli bara Haman tuntang manengae akan Mordekhai. Tuntang Ester mangkat Mordekhai jadi oloh je tukang mahaga ramon Haman.

³ Limbah te Ester manaharep raja tinai, ie sontop sambil manangis tuntang balaku uka raja manganan rencana papa je iawi Haman akan oloh Yehudi.

⁴ Raja manjuju tongkeh amase akan Ester, palus Ester harikas tuntang hamauh,

⁵ “Amon Tuan Raja nahuang tuntang sayang dengan rewarm toh, keleh Tuan Raja mampalua surat parentah uka mambalang kare surat Haman je basuang parentah uka mambinasa uras oloh Yehudi hong karajaan toh.

⁶ En rewarm tahan manampayah bangsa tuntang tundah kolan rewarm lepah inyambalih?”

⁷ Palus koan Raja Ahasweros dengan ratu Ester tuntang Mordekhai. “Toto, aku jari mangkoak Haman awi ie handak mambinasa oloh Yehudi, tuntang ramoe jari inengaku akan Ester.

⁸ Tapi surat je jari inyurat mahapan aran raja tuntang inenga cap raja, dia tau imbalang haluli. Tapi keton inyohoku manampa surat tahiu bangsa Yehudi, narai bewei je inirok keton bahalap. Nampa surat te mahapan arangku tuntang inenga cap karajaan.”

⁹ Andau te kea, iete hong tanggal 23 bulan telo, bulan Siwan, Mordekhai mantehau kare jurutulis raja. Ie marentah ewen manampa surat akan kare gubernur, kare bupati tuntang kare oloh hai hong 127 propinsi, bara India sampai Sudan. Kare surat te inyurat huang basa tuntang hurup je ihapan intu gagenep propinsi te. Ie kea mangirim surat te akan oloh Yehudi huang basa tuntang hurup ain oloh Yehudi.

¹⁰ Kare surat te ineken awi Mordekhai huang aran Ahasweros tuntang inanda dengan cap karajaan. Palus Mordekhai manyoho kare sarohan haguet uka magah kare surat te akan kakare propinsi intu karajaan mahapan kare kuda je balias ayun raja.

¹¹ Kare surat te mansanan iete raja manyoho oloh Yehudi intu genep lewu mamumpong arepe tuntang mawat tahasenge. Amon ewen inyarang awi kare tantara bara bangsa tuntang propinsi je kueh bewei, ewen tau malawan tuntang mampatei kare oloh je manyarang te dengan sawae tuntang kare anake; ewen tau manyambalih kare musohe te sampai lepah hayak marampas ramoe.

¹² Parentah te musti ilalus hong hapus karajaan Persia hong andau je jari inukas awi Haman akan mampatei kare oloh Yehudi, hong tanggal telo walas, bulan due walas, bulan Adar.

¹³ Surat parentah te impalua kilau atoran karajaan tuntang imbarita akan kakare oloh hong kakare propinsi uka bangsa Yehudi tata-tatap malawan musohe amon andau te sampai.

¹⁴ Palus kare sarohan te haguet manongkang kuda ayun raja. Tuntang kea intu Susan lewu eka raja marentah parentah te imbasa.

¹⁵ Limbah te Mordekhai malihi istana mahapan pakaian karajaan bara benang biru tuntang baputi, jubah ungu bara lenan lamos tuntang makota amas je bahalap toto. Lewu Susan basasurak awi hanjak.

¹⁶ Oloh Yehudi mangkeme salawah tuntang hanjak, sanang tuntang ihormat.

¹⁷ Kalote kea intu genep lewu tuntang propinsi, hong kueh bewei surat parentah raja te imbasa, kare oloh Yehudi hanjak, rami-rami tuntang mawi pesta. Tagal taloh je manjadi te are oloh bara bangsa je beken manamean arepe jadi ungkup bangsa Yehudi, awi ewen mikeh dengan bangsa te.