ESTER 6 - SURAT BARASIH BARITA BAHALAP

Raja mahormat Mordekhai

¹ Hong alem te kea raja dia tau batiroh. Awi te ie balaku oloh manduan buku catetan sajarah kerajaan tuntang manyoho oloh mambasae.

² Intu huange ie sondau catetan je Mordekhai jari mansanan tahiu Bigtan ewen due Teres, pejabat khusus raja je manjaga kamar jaga, handak mampatei raja.

³ Raja misek, “Narai hormat tuntang baleh gawi bahalap je jari inenga akan Mordekhai te?” Kare ayange tombah, “Ie jaton manarima taloh en-en.”

⁴ Palus raja hamauh, “Eweh bara pagawai aingku je aton intu istana metoh toh?” Tabarong metoh te Haman harue ih tame akan parantaran istana; ie handak balaku dengan raja uka mangkoak Mordekhai intu tihang je jari impendeng te.

⁵ Kare ayang te tombah auh raja, “Haman aton intu istana tuntang ie handak manaharep Tuan Raja.” “Soho ie tame,” koan raja.

⁶ Limbah Haman tame, raja hamauh dengae, “Aton oloh je handak inengaku hormat hai akae. Narai kareh je iawiku akae?” Tirok Haman, “Eweh beken je kareh inenga hormat kalote kahai awi raja? Batantu aku!”

^7-8 Awi te ie tombah, “Keleh oloh te inenga pakaian kahai je bahut ihapan awi Tuan Raja kabuat. Palus kuda ain Tuan Raja imakaian hapan kare tanda karajaan.

⁹ Ije biti bara oloh hai hong karajaan je bara utus gantong patut mangkepan pakaian te akan oloh je handak ihormat awi Tuan Raja balalu maarak oloh te mahapan kuda ain Tuan Raja mahalau alun-alun lewu. Oloh hai te kareh mananjong helo baue sambil mangkariak, ‘Kilau toh ampie raja manara oloh je ihormat awie!’ ”

¹⁰ Palus raja hamauh dengan Haman, “Gulong duan pakaian tuntang kuda te tuntang tenga kakare hormat te akan Mordekhai, oloh Yehudi te. Lalus tumon je insanan nah, ela sampai aton je tapas. Ie tau inyondaum metoh mondok intu baun istana.”

¹¹ Palus Haman manduan pakaian tuntang kuda te tuntang mangkepan pakaian te intu Mordekhai. Limbah Mordekhai lumpat akan hunjun kuda te, Haman maarak ie mahalau alun-alun lewu, sambil mangkariak, “Ite toh ampin raja marega oloh je ihormat awie!”

¹² Limbah te Mordekhai haluli akan lawang istana. Tapi Haman kaje-kajeng buli. Ie dia maku gitan oloh awi mahamen toto, awi te ie manyandurong baue.

¹³ Akan sawae tuntang kare sobate ie manyarita taloh je ingkemee. Limbah te sawae tuntang sobate je pintar te hamauh dengae, “Ikau nampara kalah kaabas awi Mordekhai. Ie oloh Yehudi tuntang ikau dia baka olih malawan ie. Ie batantu mampakalah ikau.”

Haman ihukum matei

¹⁴ Metoh ewen magon hakotak dengan Haman, kare pejabat khusus istana dumah kaje-kajeng handak magah Haman akan pesta je iawi Ester.