ESTER 5 - SURAT BARASIH BARITA BAHALAP

Ester marawei raja tuntang Haman akan pesta

¹ Hong andau puasa je kateloe, Ester mahapan pakaian ratu, palus haguet akan parantaran istana tuntang mendeng intu baun bauntonggang parantaran ije hila huang. Metoh te raja mondok intu hunjun padadusae je manaharep bauntonggang te.

² Metoh ie mite ratu Ester mendeng intu luar, ie mangkeme sayang dengae tuntang manjuju tongkeh amase akae. Palus Ester miar uka manigong tapakan tongkeh te.

³ Limbah te raja misek, “Aton narai Ratungku Ester? Narai kahandakm? Sanan! Aloh taloh je ilakum te saparo bara karajaangku, kareh inengaku kea.”

⁴ Ester tombah, “Amon Tuan Raja nahuang, keleh alem toh Tuan Raja tuntang Haman dumah akan pesta je ilalus rewarm akan Tuan Raja.”

⁵ Raja manyoho Haman bagulong dumah, mangat ewen tau manalih pesta tumon parawei Ester. Palus ewen dumah manalih pesta je ilalus Ester te.

⁶ Metoh mihop anggor raja misek, “Toh sanan narai kanahuangm. Narai bewei je ilakum kareh inengaku, aloh saparo bara karajaangku!”

^7-8 Ester tombah, “Amon Tuan Raja nahuang malalus palakun rewarm, keleh Tuan Raja tuntang Haman dumah tinai akan pesta je iawiku alem jewu. Kareh hong pesta te rewarm mansanan palakun reawarm dengan Tuan Raja.”

Haman mangarangka mampatei Mordekhai

⁹ Haman buli bara pestan Ratu Ester dengan atei je hanjak rantang. Tapi metoh intu lawang istana ie mite Mordekhai je dia hingkat mahormat ie, balalu ie sangit toto.

¹⁰ Tapi ie manyarenan kasangite tuntang buli akan humae. Sana ie sampai, ie manyoho kare sobate dumah tuntang balaku Seres, sawae, uka mondo-mondok dengan ewen.

¹¹ Palus Haman mangamburau dengan ewen tuntang manara panataue, kare anak hatue ayue, kuasae je mambatang je jari inarimae bara raja, tuntang pangkate je kejau labih gantong bara kare pagawai beken.

¹² Koae kea, “Tinai Ratu Ester mahin baya marawei aku tuntang raja bewei akan pesta je iawie akan ikei. Tuntang alem jewu, ikei irawei tinai.

¹³ Tapi uras taloh te jaton rimae, katahin aku magon mite Mordekhai aton intu lawang istana.”

¹⁴ Mahining auh te sawae tuntang kakare sobate manenga tirok tumon toh, “Soho aku manampa tihang gantongan kambue due puluh due meter. Palus hanjewu jewue, laku dengan raja uka mangkoak Mordekhai intu tihang te. Limbah te ikau tau haguet akan pesta te dengan atei je sanang.” Auh te bahalap toto manumon tirok Haman, awi te ie balalu manyoho oloh manampa tihang gantongan te.